ສຳນັກຂ່າວຣອຍເຕີລາຍງານວ່າ ສິນຄ້າອາກາດຍານ ເຄື່ອງຈັກ ລົດຍົນ ເຄມີ ແລະ ອຸປະກອນທາງການແພດ ເປັນສິນຄ້າລາຍການໃຫຍ່ທີ່ຄະນະກຳມາທິການຢູໂຣບ (European Commission) ສະເໜີໃຫ້ບັນຈຸໃນບັນຊີສິນຄ້ານຳເຂົ້າຈາກສະຫະລັດທີ່ອາດຖືກເກັບພາສີຕອບໂຕ້ ຫາກການເຈລະຈາການຄ້າກັບວໍຊິງຕັນບໍ່ສາມາດບັນລຸຂໍ້ຕົກລົງໄດ້

ທັງນີ້ ແຜນພາສີດັ່ງກ່າວເປັນແພັກເກຈບັບທີ່ສອງທີ່ຄະນະກຳມາທິການຢູໂຣບ ຊຶ່ງດູແລນະໂຍບາຍການຄ້າຂອງສະຫະພາບຢູໂຣບ (EU) ສະເໜີຂຶ້ນ ເພື່ອຕອບໂຕ້ພາສີນຳເຂົ້າທີ່ສະຫະລັດເອີ້ນເກັບພາສີກັບລົດຍົນ ແລະ ຊິ້ນສ່ວນຍານຍົນ ໂດຍປັດຈຸບັນກຳໜົດພາສີຖານໄວ້ທີ່ 10%

ແນວໃດກໍ່ຕາມ ໂດນັລດ໌ ທຣຳ ປະທານາທິບໍດີສະຫະລັດ ຂູ່ວ່າຈະປັບເພີ່ມພາສີຖານສຳລັບສິນຄ້ານຳເຂົ້າຈາກ EU ເປັນ 30% ຕັ້ງແຕ່ວັນທີ 1 ສິງຫາ ຊຶ່ງເຈົ້າໜ້າທີ່ຂອງຢູໂຣບເບິ່ງວ່າເປັນລະດັບທີ່ຍອມຮັບບໍ່ໄດ້ ແລະ ຈະສົ່ງຜົນໃຫ້ການຄ້າລະຫວ່າງສອງຕະຫຼາດໃຫຍ່ຂອງໂລກລົ່ມສະຫຼາຍ

ລາຍການພາສີໃໝ່ທີ່ສະເນີ ຊຶ່ງຮ່າງສົ່ງໃຫ້ປະເທດສະມາຊິກ EU ແລະ ສຳນັກຂ່າວ Reuters ເຫັນເມື່ອວັນອັງຄານ ຄວບຄຸມສິນຄ້ານຳເຂົ້າຈາກສະຫະລັດ ມູນຄ່າ 72,000 ລ້ານຢູໂຣ ຫຼື ປະມານ 84,100 ລ້ານໂດລາສະຫະລັດ ໂດຍລວມເຖິງອຸປະກອນໄຟຟ້າ ອຸປະກອນຄວາມແມ່ນຍຳ ຕະຫຼອດຈົນສິນຄ້າກະສິກຳ ແລະ ອາຫານ ເຊັ່ນ: ຜັກໝາກໄມ້ ໄວນ໌ ເບຍ ແລະ ສຸລາ ລວມມູນຄ່າ 6.35 ພັນລ້ານຢູໂຣ

ກ່ອນໜ້ານີ້ແພັກເກຈທຳອິດທີ່ມີສິນຄ້າສະຫະລັດ ມູນຄ່າ 21,000 ລ້ານຢູໂຣໄດ້ຮັບການອະນຸມັດເມື່ອເດືອນເມສາ ແຕ່ຖືກລະງັບທັນທີເພື່ອເປີດທາງໃຫ້ການເຈລະຈາດຳເນີນຕໍ່ ແລະ ການລະງັບນີ້ຂະຫຍາຍເວລາເຖິງວັນທີ 6 ສິງຫາ

ນອກຈາກນີ້ເຈົ້າໜ້າທີ່ EU ຢືນຢັນເມື່ອວັນຈັນວ່າ ພວກເຂົາຍັງພະຍາຍາມຫາຂໍ້ຕົກລົງເພື່ອຫຼີກລ່ຽງການເກັບພາສີຂັ້ນຮຸນແຮງຈາກທຣຳ ແຕ່ ມາໂຣຊ ເຊັຟໂຊວິຊ (Maros Sefcovic) ກຳມາທິການການຄ້າຂອງ EU ກ່າວວ່າ ປະເທດສະມາຊິກເຫັນວ່າ ຫາກການເຈລະຈາລົ້ມເຫຼວ EU ຈຳເປັນຕ້ອງດຳເນີນມາດຕະການຕອບໂຕ້

ແນວໃດກໍ່ຕາມ ຂໍ້ສະເໜີແພັກເກຈທີ່ສອງຖືກສະເໜີຄັ້ງທຳອິດເມື່ອເດືອນພຶດສະພາ ເພື່ອເປີດຮັບຟັງຄວາມຄິດເຫັນຈາກສາທາລະນະ

ໂດຍຂະນະນັ້ນຄວບຄຸມສິນຄ້າສະຫະລັດ ມູນຄ່າ 95,000 ລ້ານຢູໂຣ ແລະ ຈະມີການປັບຫຼຸດລາຍການລົງ ແຕ່ສິນຄ້າແກນຫຼັກຍັງຄົງຢູ່ ໂດຍຂະນະນີ້ຍັງບໍ່ມີກຳໜົດມື້ຊັດເຈນ ສຳລັບການໃຫ້ຄວາມເຫັນຈາກປະເທດສະມາຊິກ EU

ສະແດງຄຳຄິດເຫັນ