ສັນຍານການເພີ່ມຂຶ້ນສູງຂອງເງິນເຟີ້ໃນສະຫະລັດທີ່ມາຈາກພາສີຂອງ “ໂດນັລ ທຣຳ”

ຈາກຂໍ້ມູນຫຼ້າສຸດ ບົ່ງຊີ້ວ່າເງິນເຟີ້ໃນສະຫະລັດ ປັບຕົວສູງຂຶ້ນຈາກເດືອນກ່ອນໜ້າທຸກລາຍການ ແລະ ກາຍເປັນປັດໄຈທີ່ຕະຫຼາດກັງວົນວ່າຈະເຮັດໃຫ້ທະນາຄານກາງສະຫະລັດ ຍັງຄົງດອກເບ້ຍໃນລະດັບສູງຕໍ່ໄປ

ກະຊວງແຮງງານສະຫະລັດເປີດເຜີຍດັດຊະນີລາຄາຜູ້ບໍລິໂພກ (CPI) ເຊິ່ງເປັນມາດຕະວັດເງິນເຟີ້ຈາກການໃຊ້ຈ່າຍຂອງຜູ້ບໍລິໂພກ ປະຈຳເດືອນມິຖຸນາ

ພົບວ່າດັດຊະນີ CPI ທົ່ວໄປ (Headline CPI) ເຊິ່ງລວມໝວດອາຫານແລະພະລັງງານ ປັບຕົວຂຶ້ນຮ້ອຍລະ 2.7 ໃນເດືອນມິຖຸນາເມື່ອທຽບລາຍປີ ສູງກວ່າຕົວເລກຄາດການຂອງນັກວິເຄາະທີ່ຮ້ອຍລະ 2.6 ແລະ ເລັ່ງຕົວຂຶ້ນຈາກຮ້ອຍລະ 2.4 ໃນເດືອນພຶດສະພາ

ເມື່ອທຽບລາຍເດືອນ ດັດຊະນີ CPI ທົ່ວໄປ ປັບຕົວຂຶ້ນຮ້ອຍລະ 0.3 ສອດຄ່ອງກັບຕົວເລກຄາດການຂອງນັກວິເຄາະ ແລະ ເລັ່ງຕົວຂຶ້ນຈາກຮ້ອຍລະ 0.1 ໃນເດືອນພຶດສະພາ

ສ່ວນດັດຊະນີ CPI ພື້ນຖານ (Core CPI) ເຊິ່ງບໍ່ນັບລວມໝວດອາຫານແລະພະລັງງານ ປັບຕົວຂຶ້ນຮ້ອຍລະ 2.9 ເມື່ອທຽບລາຍປີ ຕ່ຳກວ່າຕົວເລກຄາດການຂອງນັກວິເຄາະທີ່ຮ້ອຍລະ 3.0 ແຕ່ເລັ່ງຕົວຈາກຮ້ອຍລະ 2.8 ໃນເດືອນພຶດສະພາ ແລະ ເມື່ອທຽບລາຍເດືອນ ດັດຊະນີ CPI ພື້ນຖານ ປັບຕົວຂຶ້ນຮ້ອຍລະ 0.2 ຕ່ຳກວ່າທີ່ນັກວິເຄາະຄາດການທີ່ຮ້ອຍລະ 0.3 ແລະ ຍັບຂຶ້ນຈາກຮ້ອຍລະ 0.1% ໃນເດືອນພຶດສະພາ

ທັງນີ້ ດັດຊະນີລາຄາຜູ້ບໍລິໂພກທີ່ດີດຕົວຂຶ້ນ ເປັນສັນຍານວ່າເງິນເຟີ້ຂອງສະຫະລັດກຳລັງເລັ່ງຕົວຂຶ້ນ ຈາກມາດຕະການເຮັດເກັບພາສີອາກອນຂອງປະທານາທິບໍດີໂດນັລ ທຣຳ ແລະ ຈະເປັນປັດໄຈໃຫ້ທະນາຄານກາງສະຫະລັດ (ເຟດ) ຍັງຄົງອັດຕາດອກເບ້ຍໃນລະດັບສູງ

ຂະນະທີ່ຄາດການອັດຕາດອກເບ້ຍຫຼ້າສຸດ ພົບວ່ານັກລົງທຶນ ຄາດວ່າທະນາຄານກາງສະຫະລັດຈະປັບຫຼຸດອັດຕາດອກເບ້ຍພຽງ 2 ຄັ້ງໃນປີນີ້

ໂດຍ FedWatch Tool ຂອງ CME Group ບົ່ງຊີ້ວ່າ ນັກລົງທຶນຄາດວ່າເຟດຈະປັບຫຼຸດອັດຕາດອກເບ້ຍຄັ້ງທຳອິດໃນອັດຕາຮ້ອຍລະ 0.25 ໃນການປະຊຸມເດືອນກັນຍາ ກ່ອນຈະປັບຫຼຸດອັດຕາດອກເບ້ຍລົງອີກຮ້ອຍລະ 0.25 ໃນການປະຊຸມເດືອນທັນວາ

ສະແດງຄຳຄິດເຫັນ