ໄຟໄໝ້ເວທີຫຼັກ Tomorrowland ເທດສະການດົນຕີລະດັບໂລກໃນເບລຢຽມກ່ອນເປີດງານພຽງບໍ່ເທົ່າໃດມື້ ເຖິງວ່າເສຍຫາຍໜັກແຕ່ຜູ້ຈັດງານຢືນຢັນບໍ່ຍົກເລີກ

ເກີດເຫດໄຟໄໝ້ຮຸນແຮງທີ່ເວທີຫຼັກຂອງເທດສະການດົນຕີເອເລັກໂຕຣນິກມີຊື່ສຽງລະດັບໂລກ Tomorrowland ຊຶ່ງຈັດຂຶ້ນທີ່ເມືອງບູມ ປະເທດເບລຢຽມ ກ່ອນວັນເປີດງານພຽງບໍ່ບໍ່ເທົ່າໃດມື້

ເຮັດໃຫ້ເວທີທີ່ຖືເປັນສັນຍາລັກສຳຄັນຂອງເທດສະການໄດ້ຮັບຄວາມເສຍຫາຍຢ່າງໜັກ ສ້າງຄວາມສະເທືອນໃຈແກ່ທີມງານແລະແຟນເພງທົ່ວໂລກທີ່ລໍຖ້າງານນີ້ມາຕະຫຼອດທັງປີ

ເຫດໄຟໄໝ້ເກີດຂຶ້ນເມື່ອວັນພຸດ(16/7/2025) ທີ່ຜ່ານມາ ໂດຍມີຄວັນດຳໜາພຸ່ງຂຶ້ນຈາກບໍລິເວນງານ ຂະນະນັ້ນຍັງບໍ່ມີຜູ້ຊົມຢູ່ໃນພື້ນທີ່ ແຕ່ມີພະນັກງານກວ່າ 1,000 ຄົນທີ່ກຳລັງກະກຽມງານ ຊຶ່ງໄດ້ຮັບການອົບພະຍົບຢ່າງປອດໄພ ບໍ່ມີລາຍງານຜູ້ໄດ້ຮັບບາດເຈັບ

ຜູ້ຈັດງານຢືນຢັນວ່າເຫດການຄັ້ງນີ້ເປັນ “ເຫດການຮ້າຍແຮງ” ແລະຍັງບໍ່ສາມາດລະບຸສາເຫດຂອງໄຟໄໝ້ໄດ້ໃນຂະນະນີ້

ຈາກລາຍງານຂອງນັກຂ່າວສາທາລະນະເບລຢຽມ VRT ລະບຸວ່າ ເວທີຫຼັກຖືກໄຟເຜົາຈົນເກືອບຈະບໍ່ເຫຼືອຊາກ ຂະນະທີ່ຫນ່ວຍດັບໄຟຍັງຄົງພະຍາຍາມຄວບຄຸມສະຖານະການ ແລະ ປະເມີນຄວາມເສຍຫາຍ

ໂດຍໃນຊ່ວງເກີດເຫດມີສຽງດອກໄມ້ໄຟດັງຂຶ້ນ ເຮັດໃຫ້ຫຼາຍຄົນໃນພື້ນທີ່ໃກ້ຄຽງຊຶ່ງອາໄສຢູ່ບໍ່ໄກຈາກຈຸດເກີດເຫດ ຮູ້ສຶກຕົກໃຈ ແລະ ບັນຍາຍວ່າ “ເປັນຕາຍ້ານຫຼາຍ” ເພາະເຫັນກຸ່ມຄວັນຂະໜາດໃຫຍ່ລອຍຢູ່ເທິງເຮືອນຂອງຕົນ

ເທດສະການ Tomorrowland ຖືເປັນຫນຶ່ງໃນງານດົນຕີເອເລັກໂຕຣນິກທີ່ໃຫຍ່ທີ່ສຸດໃນໂລກ ມີຜູ້ເຂົ້າຮ່ວມງານກວ່າ 400,000 ຄົນຈາກທົ່ວທຸກມຸມໂລກ

ໂດຍໃນປີ 2025 ມີກຳນົດຈັດຂຶ້ນຕະຫຼອດທ້າຍອາທິດ 2ອາທິດຕໍ່ເນື່ອງ ເລີ່ມຕັ້ງແຕ່ວັນສຸກນີ້ ຊຶ່ງເວທີຫຼັກທີ່ເກີດໄຟໄໝ້ນັ້ນມີກຳນົດໃຊ້ສະແດງຂອງສິນລະປິນມີຊື່ສຽງລະດັບໂລກເຊັ່ນ David Guetta, Swedish House Mafia ແລະ Steve Aoki

ຢ່າງໃດກໍຕາມ ເຖິງແມ່ນເວທີຫຼັກຈະຖືກໄຟໄໝ້ຈົນບໍ່ສາມາດໃຊ້ງານໄດ້ ແຕ່ຜູ້ຈັດງານຍັງຄົງເດີນໜ້າເປີດແຄມປ໌ DreamVille ໃນວັນພະຫັດຕາມກຳນົດເດີມ ໂດຍຄາດວ່າຈະມີຜູ້ເຂົ້າພັກກວ່າ 38,000 ຄົນ ພ້ອມຢືນຢັນວ່າຈະພະຍາຍາມຫາທາງແກ້ບັນຫາເພື່ອໃຫ້ເທດສະການທ້າຍອາທິດນີ້ຍັງຄົງດຳເນີນຕໍ່ໄປໄດ້

ເດັບບີ ວິລມ໌ເຊນ ໂຄສົກຂອງ Tomorrowland ເປີດເຜີຍວ່າທີມງານຫຼາຍຄົນຮູ້ສຶກເສຍໃຈຢ່າງຫຼາຍ ເພາະເວທີນີ້ໃຊ້ເວລາສ້າງຫຼາຍປີ ດ້ວຍຄວາມຮັກແລະຄວາມທຸ່ມເທ

“ພວກເຮົາຕັ້ງໃຈຈະເຮັດໃຫ້ເປັນເທດສະການທີ່ດີທີ່ສຸດເຖິງແມ່ນຈະບໍ່ມີເວທີຫຼັກ ເຮົາກໍຈະພະຍາຍາມຫາທາງສ້າງປະສົບການທີ່ດີທີ່ສຸດໃຫ້ກັບຜູ້ຮ່ວມງານ” ວິລມ໌ເຊນກ່າວ ພ້ອມເສີມວ່າຍັງບໍ່ສາມາດເປີດເຜີຍລາຍລະອຽດເພີ່ມເຕີມໄດ້ໃນຂະນະນີ້

ຕຳຫຼວດທ້ອງຖິ່ນໄດ້ໂພສຂໍ້ຄວາມຜ່ານ X (Twitter ເດີມ) ເພື່ອຢືນຢັນເຫດໄຟໄໝ້ ແລະ ຂໍຄວາມຮ່ວມມືປະຊາຊົນຫຼີກລ່ຽງພື້ນທີ່ ແລະ ເສັ້ນທາງຂອງເຈົ້າໜ້າທີ່ສຸກເສີນ ເພື່ອໃຫ້ການຄວບຄຸມສະຖານະການເປັນໄປຢ່າງວ່ອງໄວ

ຂະນະນີ້ຍັງບໍ່ມີລາຍງານທີ່ຊີ້ຊັດວ່າໄຟໄໝ້ຄັ້ງນີ້ເກີດຈາກຫຍັງ ແຕ່ຄວາມເສຍຫາຍທີ່ເກີດຂຶ້ນຖືເປັນບົດທົດສອບສຳຄັນສຳລັບຜູ້ຈັດງານ ທີ່ຕ້ອງເລັ່ງຫາທາງຟື້ນຟູ ແລະ ຈັດການສະຖານະການໃນເວລາອັນສັ້ນກ່ອນທີ່ຜູ້ຊົມຫຼາຍໝື່ນຄົນຈາກທົ່ວໂລກຈະເດີນທາງມາເຖິງເມືອງບູມ

ສະແດງຄຳຄິດເຫັນ