ສຳນັກຂ່າວຣອຍເຕີ ລາຍງານວ່າ ລັດຖະບານລັດເຊຍກຳລັງເດີນໜ້າຊຸກຍູ້ນະໂຍບາຍ “ອະທິປະໄຕທາງດິຈິຕອລ” ຢ່າງເຂັ້ມຂຸ້ນ

 
ລ່າສຸດ ສະມາຊິກສະພາດູມາ (State Duma) ຈາກຝ່າຍຄຸ້ມຄອງເທັກໂນໂລຢີ ແລະ ຂໍ້ມູນຂ່າວສານ ລະບຸວ່າ WhatsApp ແອັບສົ່ງຂໍ້ຄວາມຍອດນິຍົມພາຍໃຕ້ບໍລິສັດ Meta Platforms ອາດຕ້ອງຖອນໂຕອອກຈາກຕະຫຼາດລັດເຊຍໃນໄວໆນີ້
 

ຄຳເຕືອນດັ່ງກ່າວເກີດຂຶ້ນຫຼັງຈາກທີ່ປະທານາທິບໍດີວລາດິເມຍ ປູຕິນ ລົງນາມໃນກົດໝາຍໃໝ່ເມື່ອເດືອນທີ່ຜ່ານມາ ເພື່ອພັດທະນາແອັບສົ່ງຂໍ້ຄວາມທີ່ໄດ້ຮັບການສະໜັບສະໜູນຈາກລັດ ແລະ ສາມາດເຊື່ອມຕໍ່ກັບບໍລິການພາກລັດຂອງລັດເຊຍໄດ້ໂດຍກົງ ເຊິ່ງສະທ້ອນເຖິງຄວາມຕັ້ງໃຈຂອງມົສໂກໃນການຫຼຸດການອີງອາໄສ ແພລັດຟອມຕ່າງປະເທດ ເຊັ່ນ: WhatsApp ແລະ Telegram
 

ແອນຕອນ ໂກເຣລກິນ ຮອງປະທານຄະນະກຳມະການດ້ານເທັກໂນໂລຢີ ແລະ ຂໍ້ມູນຂ່າວສານສະພາດູມາ ໃຫ້ຄວາມເຫັນຜ່ານແພລັດຟອມ Telegram ວ່າ ເຖິງເວລາແລ້ວທີ່ WhatsApp ຄວນກຽມໂຕອອກຈາກຕະຫຼາດລັດເຊຍ ໂດຍໃຫ້ເຫດຜົນວ່າບໍລິສັດ Meta ເຊິ່ງເປັນເຈົ້າຂອງ WhatsApp ຖືກຂຶ້ນບັນຊີເປັນ “ອົງການຫົວຮຸນແຮງ” ພາຍໃນລັດເຊຍ

ທັງນີ້ ບໍລິການໂຊຊຽລມີເດຍອື່ນໃນເຄືອ Meta ຢ່າງ Facebook ແລະ Instagram ຖືກຫ້າມໃນລັດເຊຍມາຕັ້ງແຕ່ປີ 2022 ຫຼັງຈາກເກີດຄວາມຂັດແຍ້ງທາງທະຫານລະຫວ່າງລັດເຊຍກັບຢູເຄຣນ

ເຊິ່ງເຮັດໃຫ້ບໍລິສັດລາຍໃຫຍ່ຈາກປະເທດຕາເວັນຕົກຫຼາຍແຫ່ງຕັດສິນໃຈຖອນໂຕອອກຈາກຕະຫຼາດລັດເຊຍ

ໃນອາທິດດຽວກັນນີ້ ລັດຖະບານລັດເຊຍໄດ້ເຜີຍແຜ່ຄຳສັ່ງຢ່າງເປັນທາງການຈາກປະທານາທິບໍດີປູຕິນ ເຊິ່ງລວມເຖິງຂໍ້ກຳນົດໃນການຈຳກັດການໃຊ້ງານຊອບແວຈາກປະເທດທີ່ຖືກຈັດວ່າ “ບໍ່ເປັນມິດ” ຕໍ່ລັດເຊຍ ໂດຍສະເພາະຊອບແວດ້ານການສື່ສານທີ່ຜະລິດຈາກບໍລິສັດໃນກຸ່ມປະເທດທີ່ມີມາດຕະການຄວຳບາດຕໍ່ມົສໂກ

ຄຳສັ່ງດັ່ງກ່າວກຳນົດໃຫ້ຫົວໜ່ວຍງານທີ່ກ່ຽວຂ້ອງຕ້ອງດຳເນີນມາດຕະການຈຳກັດການໃຊ້ຊອບແວຕ່າງປະເທດພາຍໃນວັນທີ 1 ກັນຍານີ້

ເຊິ່ງເຮັດໃຫ້ຫຼາຍຝ່າຍຄາດການວ່າ WhatsApp ມີແນວໂນ້ມຈະຢູ່ໃນບັນຊີຊອບແວທີ່ຖືກຈຳກັດ

ເຖິງແມ່ນຍັງບໍ່ມີຖະແຫຼງການຕອບກັບຢ່າງເປັນທາງການຈາກ Meta ແຕ່ແນວໂນ້ມດັ່ງກ່າວຕອກຢໍ້າທິດທາງຂອງລັດຖະບານລັດເຊຍທີ່ຈະຫຼຸດບົດບາດຂອງເທັກໂນໂລຢີຕ່າງຊາດ ແລະ ເລັ່ງສົ່ງເສີມລະບົບນິເວດດິຈິຕອລຂອງປະເທດ ຜ່ານການພັດທະນາແພລັດຟອມທີ່ຄວບຄຸມໄດ້ດ້ວຍຕົນເອງ ແລະ ມີການບູລະນາການເຂົ້າກັບລະບົບລັດຖະການ

ນັກວິເຄາະບາງລາຍວິເຄາະວ່າ ຖ້າຫາກ WhatsApp ຖືກຈຳກັດການໃຊ້ງານແທ້ ຈະສົ່ງຜົນກະທົບໃນວົງກວ້າງຕໍ່ຜູ້ໃຊ້ຄົນລັດເຊຍຈຳນວນຫຼາຍ ໂດຍສະເພາະໃນພາກທຸລະກິດ ແລະ ການສື່ສານສ່ວນບຸກຄົນທີ່ຍັງໃຊ້ແພລັດຟອມດັ່ງກ່າວເປັນຊ່ອງທາງຫຼັກ

ພາຍໃຕ້ກອບນະໂຍບາຍ “ດິຈິຕອລໂຊເວີເຣນຕີ້” ຫຼື ອະທິປະໄຕທາງເທັກໂນໂລຢີ ລັດເຊຍມີແຜນພັດທະນາແອັບສື່ສານທີ່ຄວບຄຸມໄດ້ພາຍໃນປະເທດ ແລະ ມີກົນໄກຮອງຮັບການໃຊ້ງານຮ່ວມກັບພາກລັດ ເຊິ່ງຖືເປັນຍຸດທະສາດຫຼັກຂອງເຄຣມລິນໃນການຫຼຸດການອີງອໄສຊອບແວຈາກຕ່າງປະເທດແບບຍືນຍົງ

ສະແດງຄຳຄິດເຫັນ