ທີມນັກວິໄຈຈາກ ມະຫາວິທະຍາໄລວິທະຍາສາດແລະເທັກໂນໂລຊີຮົງກົງ (HKUST) ໄດ້ປະກາດຄວາມສຳເລັດຂອງການພັດທະນາເທັກໂນໂລຊີທີ່ຂັບເຄື່ອນດ້ວຍ AI ຊຶ່ງສາມາດສ້າງໂຄງສ້າງກະດູກແບບ 3 ມິຕິ ຂອງຄົນເຈັບຂຶ້ນມາໃໝ່ໄດ້

ໂດຍໃຊ້ພາບ X-ray ພຽງ 2-4 ພາບເທົ່ານັ້ນ ຊຶ່ງຊ່ວຍຫຼຸດຄວາມຈຳເປັນໃນການສະແກນ CT ແລະ ຫຼຸດປະລິມານລັງສີທີ່ຄົນເຈັບດ້ຮັບໄດ້ຫຼາຍເຖິງຮ້ອຍລະ 99.

ການພັດທະນາ AI ເພື່ອການສ້າງແບບຈຳລອງກະດູກ

ທີມນັກວິໄຈເປີດເຜີຍວ່າເທັກໂນໂລຊີນີ້ໃຊ້ເວລາພຽງ 30 ວິນາທີ ໃນການສ້າງແບບຈຳລອງກະດູກ 3 ມິຕິ

ໂດຍໃຊ້ປັນຍາປະດິດໃນການແປງພາບ X-ray ມາດຕະຖານ ໃຫ້ເປັນພາບກະດູກ ແລະ ອະໄວຍະວະແບບ 3 ມິຕິ ດ້ວຍວິທີນີ້ຊ່ວຍໃຫ້ໝໍສາມາດເຫັນພາບກະດູກຂອງຜູ້ປ່ວຍແບບສາມມິຕິທີ່ລະອຽດເທິງໜ້າຈໍຄອມພິວເຕີ ແລະ ຊ່ວຍໃຫ້ການວິນິດໄສ ແລະ ການວາງແຜນການປິ່ນປົວແມ່ນຍຳຍິ່ງຂຶ້ນ.

ບໍ່ແມ່ນພຽງແຕ່ພາບ ແຕ່ “ພິມ” ແບບຈຳລອງກະດູກ 3D ໄດ້ດ້ວຍ

ນອກຈາກຄວາມສາມາດໃນການສ້າງພາບ 3 ມິຕິແລ້ວ ເທັກໂນໂລຊີນີ້ຍັງກ້າວໄປອີກຂັ້ນດ້ວຍການໃຊ້ແບບຈຳລອງດິຈິຕອນເຫຼົ່ານັ້ນ

ມາສ້າງເປັນຊິ້ນສ່ວນທີ່ຈັບຕ້ອງໄດ້ຈິງ ຜ່ານການພິມ 3 ມິຕິ ໂດຍສາມາດຜະລິດອຸປະກອນຝັງໃນທີ່ອອກແບບມາເປັນພິເສດ (Custom Implants) ເພື່ອໃຫ້ເຂົ້າກັບກາຍະວິພາກຂອງຄົນເຈັບແຕ່ລະຄົນໄດ້.

ທີມວິໄຈກ່າວວ່າ ແບບຈຳລອງທີ່ສ້າງຂຶ້ນໃໝ່ນີ້ ມີອັດຕາຄວາມຄາດເຄື່ອນນ້ອຍກວ່າ 1 ມິນລິແມັດ ແລະ ເທັກໂນໂລຊີນີ້ມີຄວາມແມ່ນຍຳສູງ

ເມື່ອທຽບກັບການສະແກນ CT ແບບດັ້ງເດີມ ຊຶ່ງເປັນໄປຕາມມາດຕະຖານຄວາມແມ່ນຍຳທາງຄລີນິກ.

ທີມພັດທະນາເປີດເຜີຍວ່າທົ່ວໄປແລ້ວ ຄົນເຈັບທີ່ຕ້ອງເຂົ້າຮັບການຜ່າຕັດສັນຍະກຳກະດູກຈະຕ້ອງຜ່ານການສະແກນ CT ທີ່ຊັບຊ້ອນແລະໃຊ້ເວລາດົນ

ຊຶ່ງເຮັດໃຫ້ຄົນເຈັບໄດ້ຮັບລັງສີໃນປະລິມານສູງ ແຕ່ດ້ວຍແນວທາງທີ່ຂັບເຄື່ອນດ້ວຍ AI ນີ້ ຊ່ວຍໃຫ້ໝໍສາມາດວາງແຜນການຜ່າຕັດໄດ້ຢ່າງມີປະສິດທິພາບຫຼາຍຂຶ້ນ ໃນຂະນະດຽວກັນກໍຊ່ວຍຫຼຸດພາລະຂອງໂຮງໝໍລັດ ໂດຍຫຼຸດໄລຍະເວລາລໍຖ້າສຳລັບການສະແກນ CT.

ໂດຍທີມວິໄຈຄາດວ່າເທັກໂນໂລຊີນີ້ ຈະສາມາດເລີ່ມການທົດລອງທາງຄລີນິກໃນໂຮງໝໍລັດຂອງຮົງກົງໄດ້ ພາຍໃນທ້າຍປີນີ້

ສະແດງຄຳຄິດເຫັນ