ໃນວັນທີ 27 ກໍລະກົດ 2025, ສະຫາຍ ອາລຸນໄຊ ສູນນະລາດ ກຳມະການສູນກາງພັກ ເລາຂາພັກແຂວງ ເຈົ້າແຂວງຈຳປາສັກ, ປະທານຄະນະກຳມະການປ້ອງກັນຊາດປ້ອງກັນຄວາມສະຫງົບແຂວງ ໄດ້ເຄື່ອນໄຫວຕິດຕາມຊຸກຍູ້ ວຽກງານກໍ່ສ້າງຮາກຖານການເມືອງ ແລະ ວຽກງານຊາຍແດນ,

ພ້ອມທັງ ຕິດຕາມໃຫ້ກຳລັງໃຈນາຍ ແລະ ພົນທະຫານ ພະນັກງານນັກຮົບ ທີ່ເຮັດໜ້າທີ່ຢູ່ກົມກອງ,ຮາກຖານເຂດເມືອງມຸນລະປາໂມກ, ໂດຍມີ ສະຫາຍ ພົນຈັດຕະວາ ວິລະຕູ່ ວໍລະຈິດ ຫົວໜ້າການເມືອງ ກອງບັນຊາການທະຫານແຂວງຈໍາປາສັກ, ສະຫາຍ ວັນນະສັກ ຊາດຕະກູນ ເລຂາພັກເມືອງມຸນລະປາໂມກ, ມີ ການນຳຂອງແຂວງ ແລະ ເມືອງມຸນລະປາໂມກ ເຂົ້າຮ່ວມ.

ສະຫາຍ ພັນເອກ ຄຳເຮົ້າ ວົງພົມ ຫົວໜ້າຫ້ອງເສນາທິການທະຫານແຂວງຈຳປາສັກ ໄດ້ລາຍງານສະພາບການທີ່ເກີດຂື້ນບໍລິເວນຊາຍແດນໃນໄລຍະຜ່ານມານີ້;

ໂອກາດນີ້, ສະຫາຍ ອາລຸນໄຊ ສູນນະລາດ ໄດ້ມີຄຳເຫັນໂອ້ລົມໂດຍ ໄດ້ນຳເອົາຄວາມອົບອຸ່ນຮັກແພງ, ຄວາມເປັນຫວ່ງເປັນໃຍມາຍັງນາຍ ແລະ ພົນທະຫານ ພະນັກງານນັກຮົບ ສືບຕໍ່ເຮັດ ສໍາເລັດໜ້າທີ່ອັນມີກຽດສະຫງ່າທີ່ພັກ ແລະ ປະຊາຊົນ ມອບໝາຍໃຫ້.

ພ້ອມກັນນັ້ນ, ການນຳຂອງເມືອງມຸນລະປາໂມກ ຕ້ອງມີການປະສານສົມທົບກັບພາກສ່ວນຕ່າງໆ ຢ່າງໄກ້ຊິດ, ນຳພາແນວຄິດແທດເຖິງປະຊາຊົນ ,ປັບປຸງກໍາລັງກອງຫຼອນທ້ອງຖິ່ນຮາກຖານ ໃຫ້ມີຄວາມ ເຂັ້ມແຂງ ແລະ ຖືໂອກາດດັ່ງກ່າວ ເປັນການຊຸກຍຸ້ສ້າງຂະບວນການເພື່ອຂໍ່ານັບຮັບຕ້ອນກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງທີ IX ທີ່ຈະມາເຖິງ

ໃນໂອກາດເຄື່ອນໄຫວຕິດຕາມຊຸກຍູ້ວຽກງານຊາຍແດນຄັ້ງນີ້, ສະຫາຍ ອາລຸນໄຊ ສູນນະລາດ ກຳມະການສູນກາງພັກ ເລາຂາພັກແຂວງ ເຈົ້າແຂວງຈຳປາສັກ, ໄດ້ນຳເອົາເຄື່ອງບໍລິໂພກ–ອຸປະໂພກ ທີ່ຈຳເປັນ ແລະ ເງິນສົດ ຈຳນວນໜຶ່ງ ທີ່ໄດ້ຮັບ ການອຸປະຖຳ ປະກອບສ່ວນຈາກພາກສ່ວນ ຜູ້ປະກອບການ ກໍ່ຄືທົ່ວສັງຄົມ ລວມມູນຄ່າທັງໝົດ 130 ລ້ານກວ່າກີບ ມອບໃຫ້ ກຳລັງຢູ່ແນວໜ້າ ອີກດ້ວຍ.

ທີ່ມາ: ກອງບັນຊາການທະຫານແຂວງຈໍາປາສັກ

ສະແດງຄຳຄິດເຫັນ