ທີມວິໄຈຈາກມະຫາວິທະຍາໄລເທັກໂນໂລຍີຊິດນີ (University of Technology Sydney) ປະເທດອົດສະຕາລີ ພັດທະນາໝວກປັນຍາປະດິດທີ່ສາມາດອ່ານຄ່າຄື່ນສະໝອງຂອງຜູ້ສວມໃສ່ ເພື່ອຕີຄວາມໝາຍກິດຈະກຳຂອງສະໝອງ ແລະ ປ່ຽນຄວາມຄິດທີ່ເກີດຂຶ້ນໃຫ້ກາຍເປັນຂໍ້ຄວາມໃສ່ໜ້າຈໍ ກຽມຕໍ່ຍອດໄປສູ່ການພັດທະນາວິທີການຄວບຄຸມອຸປະກອນອີເລັກໂທຣນິກຕ່າງໆ ດ້ວຍຄວາມຄິດ

ເທັກໂນໂລຍີ “ໝວກ AI”

ຫົວໃຈສຳຄັນຂອງເທັກໂນໂລຍີນີ້ຢູ່ທີ່ອຸປະກອນໝວກພິເສດ ທີ່ສາມາດກວດສອບຮູບແບບຄື່ນສະໝອງຂອງຜູ້ສວມໃສ່ໄດ້ ໂດຍທີມວິໄຈໄດ້ສາທິດການນຳໃຊ້ດ້ວຍການໃສ່ໝວກ ແລະ ອ່ານຄຳ ຫຼື ປະໂຫຍກທີ່ຕ້ອງການໃນໃຈ ແລະ ໃຊ້ການເຄື່ອນໄຫວຂອງປາກອ່ານຄຳນັ້ນແບບບໍ່ອອກສຽງ (silently mouths the words)

ຊຶ່ງຂະບວນການນີ້ຈະຊ່ວຍໃຫ້ສະໝອງປະມວນຜົນຄຳເວົ້າໄດ້ຢ່າງມີປະສິດທິຜົນ ຈາກນັ້ນ ຕົວຖອດລະຫັດທີ່ຂັບເຄື່ອນດ້ວຍ AI ຈະເຂົ້າມາຮັບຊ່ວງຕໍ່ ໂດຍເຮັດໜ້າທີ່ແປງຄວາມຄິດເຫຼົ່ານັ້ນໃຫ້ກາຍເປັນພາສາຂຽນຢ່າງວ່ອງໄວ

ຜົນຈາກການທົດສອບໃຊ້ຈິງ

ໂດຍສຳນັກຂ່າວ AP ຜູ້ລາຍງານຂ່າວນີ້ລະບຸວ່າຈາກການທີ່ນັກຂ່າວໄດ້ທົດສອບໃຫ້ນັກສຶກສາລອງອ່ານອອກສຽງຄຳວ່າ “ຊ້ອນ” ໃນໃຈ ຜົນປະກົດວ່າ AI ສາມາດລະບຸຄຳດັ່ງກ່າວໄດ້ຢ່າງຖືກຕ້ອງເຖິງ 75% ຊຶ່ງທີມວິໄຈກຳລັງຕັ້ງເປົ້າໝາຍທີ່ຈະພັດທະນາຄວາມແມ່ນຍຳໃຫ້ສູງເຖິງ 90% ໃນອະນາຄົດ

ເບື້ອງຫຼັງການເຮັດວຽກຂອງ “ໝວກ AI”

ເບື້ອງຫຼັງການເຮັດວຽກຂອງໝວກອັດສະລິຍະນີ້ ມາຈາກການໃຊ້ງານ AI ສອງປະເພດທີ່ແຕກຕ່າງກັນໃນການຕີຄວາມໝາຍສັນຍານຄື່ນສະໝອງ

ໂດຍໃຊ້ໂມເດວການຮຽນຮູ້ເຊີງເລິກ (deep learning) ເພື່ອແປສັນຍານສະໝອງໃຫ້ເປັນຄຳທີ່ຕັ້ງໃຈໄວ້ ຈາກນັ້ນຈຶ່ງໃຊ້ໂມເດວພາສາຂະໜາດໃຫຍ່ (large language model) ເພື່ອຈັບຄູ່ຄຳທີ່ຖອດລະຫັດໄດ້ ແລະ ແກ້ໄຂຂໍ້ຜິດພາດທີ່ເກີດຂຶ້ນຈາກການຖອດລະຫັດຄື່ນໄຟຟ້າສະໝອງ (EEG)

ສິ່ງທີ່ເຮັດໃຫ້ເທັກໂນໂລຍີນີ້ໂດດເດັ່ນຈາກເທັກໂນໂລຍີເຊື່ອມຕໍ່ສະໝອງຂອງເຈົ້າອື່ນໆ ກໍຄື ບໍ່ຈຳເປັນຕ້ອງມີການຝັງຊິບໃນສະໝອງ ຊຶ່ງຊ່ວຍຫຼຸດຄວາມສ່ຽງແລະເຮັດໃຫ້ເຂົ້າເຖິງໄດ້ງ່າຍຂຶ້ນຫຼາຍ

ໂດຍຕໍ່ໄປເທັກໂນໂລຍີນີ້ອາດຈະມີບົດບາດສຳຄັນໃນການຊ່ວຍເຫຼືອຜູ້ປ່ວຍແລະຜູ້ພິການ ໃຫ້ສາມາດສັ່ງການຄວບຄຸມອຸປະກອນຕ່າງໆ ດ້ວຍຄວາມຄິດ ຫຼືອາດຈະພັດທະນາໄປໄກຈົນເຮັດໃຫ້ ການສື່ສານຈາກຄວາມຄິດສູ່ຄວາມຄິດ (mind-to-mind communication) ທີ່ເຄີຍມີແຕ່ໃນຮູບເງົາ ກາຍເປັນຈິງ

ສະແດງຄຳຄິດເຫັນ