ຫາກສະໝອງທີ 2 ຂອງມະນຸດແມ່ນລຳໄສ້ ຊຶ່ງເຮັດໜ້າທີ່ສອດປະສານກັບລະບົບປະສາດໃນການສັ່ງການ ແລະ ຄວບຄຸມການເຮັດວຽກຂອງຮ່າງກາຍ ພວກເຮົາກໍມີຫົວໃຈດວງທີ 2 ທີ່ເຮັດໜ້າທີ່ສູບສີດເລືອດກັບຄືນເຂົ້າໄປທີ່ຫົວໃຈຫຼັກທີ່ຢູ່ໜ້າເອິກເຊັ່ນດຽວກັນ

ຫົວໃຈດວງທີ່ສອງຢູ່ທີ່ນ່ອງ

ເມື່ອເວົ້າວ່າຫົວໃຈດວງທີ 2 ຢູ່ທີ່ນ່ອງ ອາດເຮັດໃຫ້ຫຼາຍຄົນແປກໃຈວ່າ ຄົນເຮົາຈະມີອະໄວຍະວະງອກຂຶ້ນມາອີກໄດ້ແນວໃດ?

ແຕ່ຈິງໆແລ້ວ ສຳນວນ “ຫົວໃຈດວງທີ 2” ເປັນຄຳປຽບທຽບເຖິງ “ກ້າມເນື້ອນ່ອງ” ທີ່ນອກຈາກຊ່ວຍຊັບພອດການຍ່າງແລ້ວ ຍັງມີໜ້າທີ່ສຳຄັນໃນການຊ່ວຍໃນການໄຫຼວຽນເລືອດກັບຄືນເຂົ້າສູ່ຫົວໃຈ

ໂດຍກ້າມເນື້ອນ່ອງທີ່ແຂງແຮງຈະຊ່ວຍຫຼຸດການເຮັດວຽກຂອງຫົວໃຈ ເປັນຄ້ືຕົວຕ້ານແຮງໂນ້ມຖ່ວງ ໃຫ້ເລືອດທີ່ຢູ່ສ່ວນລຸ່ມຂອງຮ່າງກາຍ ໄຫຼຍ້ອນກັບຂຶ້ນໄປສູ່ຫົວໃຈໄດ້ງ່າຍຂຶ້ນນັ້ນເອງ.

ຫົວໃຈທີ 2 ເຮັດວຽກແນວໃດ?

ສິ່ງສຳຄັນແມ່ນ ຫົວໃຈດວງທີ 2 ຈະເຮັດວຽກໄດ້ເພາະເມື່ອຕອນທີ່ເຮົາເຄື່ອນໄຫວເທົ່ານັ້ນ!! ຍິ່ງຮ່າງກາຍເຄື່ອນໄຫວຫຼາຍເທົ່າໃດ ກໍຈະຊ່ວຍກະຕຸ້ນການເຮັດວຽກຂອງຫຼອດເລືອດດຳທີ່ນ່ອງ ໃຫ້ເລືອດທີ່ນ່ອງຍິ່ງສູບສີດຂຶ້ນໄປທີ່ໜ້າເອິກໄດ້ຫຼາຍເທົ່ານັ້ນ.

ໝາຍຄວາມວ່າ ຫາກຮ່າງກາຍຢູ່ໃນພາວະຫຍຸດນິ່ງ ບໍ່ມີການເຄື່ອນໄຫວ ຢູ່ໃນທ່ານັ່ງ ຫຼື ຍືນນິ່ງເປັນເວລາດົນເກີນໄປ ເລືອດບໍ່ສາມາດໄຫຼວຽນໄດ້ສະດວກ ຈະເຮັດໃຫ້ເກີດອາການເລືອດຄ້າງໃນຂາ ບໍ່ສາມາດໄຫຼວຽນກັບຄືນເຂົ້າໄປທີ່ຫົວໃຈຫຼັກໄດ້.

ຫາກເລືອດຄ້າງສະສົມທີ່ຂາດົນເກີນໄປ ກໍມີອາການປວດບວມ ເປັນເສັ້ນເລືອດຂອດ ຫຼື ມີພາວະລິ່ມເລືອດຮຸນແຮງ.

ເຮັດແນວໃດໃຫ້ຫົວໃຈທັງ 2 ດວງແຂງແຮງ

ວິທີແກ້ປັນຫານັ້ນງ່າຍຫຼາຍ ເຮັດໄດ້ດ້ວຍ ການເຄື່ອນໄຫວຮ່າງກາຍຢູ່ສະເໝີ ເຊັ່ນ: ການຍ່າງສັ້ນໆທຸກຊົ່ວໂມງ ກໍພຽງພໍທີ່ຈະກະຕຸ້ນກ້າມເນື້ອນ່ອງ ໃຫ້ປັ້ມເລືອດເຂົ້າໄປຍັງຫົວໃຈໄດ້ຢ່າງສະເໝີຕົ້ນ.

ສ່ວນຖ້າເປັນຄົນບໍ່ຄ່ອຍເຄື່ອນໄຫວຮ່າງກາຍ ແລ້ວສັງເກດວ່າເລີ່ມມີອາການບວມເຣື້ອຣັງ ອາດເກີດຈາກເລືອດຄ້າງ ການຍົກຂາຂຶ້ນສູງ ຫຼື ໃຊ້ຖຸງນ່ອງຮັດກ້າມເນື້ອສາມາດຊ່ວຍບັນເທົາອາການໄດ້.

ສະແດງຄຳຄິດເຫັນ