ມີຜູ້ເສຍຊີວິດ 7 ຄົນ ແລະ ສູນຫາຍອີກ 9 ຄົນ ຫຼັງຈາກສາຍເຄເບິນຂາດທີ່ຂົວຂ້າມນ້ຳທີ່ຢູ່ໃນລະຫວ່າງການກໍ່ສ້າງເທິງເສັ້ນທາງລົດໄຟເສຊວນ-ຊິງໄຫ່ ຊ່ວງແຂວງຊິງໄຫ່ ເມື່ອເວລາປະມານ 03.00 ໂມງເຊົ້າຂອງວັນທີ່ 22 ສິຫາ 2025 

ສຳນັກຂ່າວພີເພິນສ໌ ເດລີ ລາຍງານວ່າ ຂະນະເກີດເຫດມີແຮງງານກໍ່ສ້າງ 15 ຄົນ ແລະ ຜູ້ຈັດການໂຄງການວິສະວະກຳປະຈຳພື້ນທີ່ 1 ຄົນ ກຳລັງເຮັດວຽກຢູ່ ຂະນະນີ້ປະຕິບັດການກູ້ໄພຍັງຄົງດຳເນີນຕໍ່ໄປ

ກະຊວງການຈັດການເຫດສຸກເສີນໄດ້ສົ່ງຄະນະເຮັດວຽກສະເພາະກິດ ໄປຍັງຈຸດເກີດເຫດເພື່ອໃຫ້ຄຳແນະນຳ ແລະ ປະສານງານການຊ່ວຍເຫຼືອ ໂດຍສຸມໃສ່ການຄົ້ນຫາຜູ້ທີ່ຕົກລົງໄປໃນນ້ຳ

ນອກຈາກນີ້ ທາງກະຊວງ ຢືນຢັນວ່າຈະເລັ່ງກວດສອບສາເຫດຂອງອຸບັດຕິເຫດເພື່ອປ້ອງກັນບໍ່ໃຫ້ເກີດເຫດການລັກສະນະດຽວກັນນີ້ຂຶ້ນອີກໃນອະນາຄົດ

ພາບທີ່ເຜີຍແຜ່ເທິງເວັບໄຊທ໌ພີເພິນສ໌ ເດລີ ສະແດງໃຫ້ເຫັນຂົວທີ່ສ້າງສຳເລັດພຽງບາງສ່ວນ ໂດຍສ່ວນກາງຍັງສ້າງບໍ່ສຳເລັດ ພ້ອມດ້ວຍຫໍຄອຍເຄເບິນຂະໜາດໃຫຍ່ 2 ແຫ່ງ ແລະ ເຄຣນຫຼາຍຕົວຕັ້ງຢູ່ໃກ້ຄຽງ

ຂົວດັ່ງກ່າວ ຕັ້ງຢູ່ທີ່ເຂດແດນລະຫວ່າງເມືອງເຈຍຈ້າ ໃນເຂດປົກຄອງຕົນເອງທິເບດຫວາງໜານ ແລະ ເມືອງປົກຄອງຕົນເອງຫົວຫຼົງຮຸຍ ໃນເຂດໄຫ່ຕົງ ແຂວງຊິງໄຫ່ ຖືເປັນຂົວລົດໄຟໂຄງຖັກເຫຼັກແຫ່ງທຳອິດຂອງຈີນທີ່ຂ້າມແມ່ນ້ຳເຫຼືອງ ໂດຍເສົາສາຍເຄເບິນຂອງສະພານສ້າງສຳເລັດເມື່ອວັນທີ່ 14 ມິຖຸນາ ແລະ ມີແຜນທີ່ຈະເຊື່ອມຕໍ່ກັນໃນເດືອນນີ້

ທັງນີ້ ມີອຸບັດຕິເຫດທາງອຸດສາຫະກຳເກີດຂຶ້ນຕະຫຼອດໃນປະເທດຈີນ ເນື່ອງຈາກກົດລະບຽບທີ່ບໍ່ຊັດເຈນ ແລະ ມາດຕະຖານຄວາມປອດໄພທີ່ບໍ່ສູງ

ໃນເດືອນທັນວາປີທີ່ຜ່ານມາ ມີຜູ້ສູນຫາຍ 13 ຄົນ ຫຼັງຈາກເກີດເຫດຖະຫຼົ່ມທີ່ສະຖານທີກໍ່ສ້າງທາງລົດໄຟສາຍຫຼັກໃນເມືອງເຊິນເຈິ້ນ ທາງຕອນໃຕ້ຂອງຈີນ ບໍ່ມີລາຍງານຜູ້ລອດຊີວິດ

ສະແດງຄຳຄິດເຫັນ