ທີມນັກວິໄຈຈາກມະຫາວິທະຍາໄລກະເສດສາດເຊົາທ໌ໄຊນ້າ ນຳໂດຍ ທ່ານ ຊູຖິງ ຫລິວ (Shuting Liu)

ປະສົບຄວາມສຳເລັດໃນການສ້າງພືດນ້ຳເຮືອງແສງຫຼາກສີໃນບ່ອນມືດເປັນຄັ້ງທຳອິດຂອງໂລກ ເປີດທາງສູ່ແສງສະຫວ່າງແບບຍືນຍົງໃນອະນາຄົດ

ໂດຍທີມນັກວິໄຈໃຊ້ວິທີການສີດອະນຸພາກຟອສເຟີ “afterglow” ເຂົ້າໄປໃນໃບພືດ ເຮັດໃຫ້ພືດສາມາດເຮືອງແສງເປັນສີຟ້າ, ຂຽວ, ແດງ ແລະ ສີມ່ວງໄດ້ ຫຼັງຈາກຮັບແສງແດດ ຫຼື ແສງໄຟ LED ພຽງບໍ່ເທົ່າໃດນາທີ

ອະນຸພາກຟອສເຟີ “afterglow” ແມ່ນຫຍັງ ?

ອະນຸພາກຟອສເຟີ “afterglow” ແມ່ນ ວັດສະດຸເຮືອງແສງທີ່ສາມາດດູດຊັບພະລັງງານຈາກແສງແດດ ຫຼື ແສງໄຟ ແລ້ວຄ່ອຍໆ ປ່ອຍພະລັງງານອອກມາໃນຮູບແບບຂອງແສງທີ່ມະນຸດສາມາດເບິ່ງເຫັນໄດ້ ເຖິງແມ່ນວ່າຢູ່ໃນຄວາມມືດກໍຕາມ

ຂະບວນການນີ້ເອີ້ນວ່າ “afterglow effect” ຫຼື ການເຮືອງແສງຕໍ່ເນື່ອງ ຊຶ່ງສາມາດກຳນົດສີຂອງແສງໄດ້ຕາມຊະນິດຂອງສານປະກອບຟອສເຟີ (Phosphor compounds) ເຊັ່ນ: ສີຂຽວ, ຟ້າ, ແດງ ຫຼື ມ່ວງ

ສຳລັບສານຟອສເຟີ (Phosphor compounds) ແມ່ນສານເຄມີທີ່ສາມາດດູດຊັບພະລັງງານຈາກແຫຼ່ງກຳເນີດແສງ ເຊັ່ນ: ແສງອາທິດ ແສງ LED ຫຼື ລັງສີອັນຕະລາໄວໂອເລັດ ແລ້ວຄ່ອຍໆ ປ່ອຍພະລັງງານນັ້ນອອກມາໃນຮູບແບບຂອງແສງທີ່ມະນຸດເບິ່ງເຫັນໄດ້ ໂດຍແສງທີ່ປ່ອຍອອກມາຈະຂຶ້ນກັບຊະນິດຂອງທາດ ຫຼື ສານຜະສົມໃນຟອສເຟີນັ້ນໆ

ພືດທີ່ປ່ອຍແສງຄືໂຄມໄຟ

ຈາກຜົນການທົດລອງ ພືດຊະນິດ Echeveria “Mebina” ສາມາດເລືອງແສງໄດ້ນານສູງສຸດເຖິງ 2 ຊົ່ວໂມງ ໂດຍສະເພາະອະນຸພາກສີຂຽວທີ່ໃຫ້ແສງດົນທີ່ສຸດ

ລະດັບຄວາມສະຫວ່າງທີ່ໄດ້ສາມາດປຽບທຽບໄດ້ກັບໂຄມໄຟກາງຄືນຂະໜາດນ້ອຍ ແລະ ພຽງພໍທີ່ຈະເບິ່ງເຫັນສິ່ງຂອງ ຫຼື ອ່ານຂໍ້ຄວາມໃນທີ່ມືດ

ນອກຈາກນີ້ນັກວິທະຍາສາດຍັງໄດ້ທົດລອງສ້າງກຳແພງຕົ້ນໄມ້ເຮືອງແສງຈາກພືດຊະນິດນີ້ 56 ຕົ້ນ ຊຶ່ງສາມາດສ່ອງສະຫວ່າງໃຫ້ເຫັນຊັດເຈນເຊັ່ນດຽວກັນ

ກ້າວຂ້າມຂໍ້ຈຳກັດເດີມ

ກ່ອນຫນ້ານີ້ ນັກວິໄຈເຄີຍໃຊ້ທັງພັນທຸວິສະວະກຳ ແລະ ວິສະວະກຳວັດສະດຸເພື່ອສ້າງພືດເຮືອງແສງ ແຕ່ໄດ້ພຽງແສງສີຂຽວອ່ອນໆ ທີ່ຄົງຢູ່ບໍ່ດົນ

ການທົດລອງຄັ້ງໃໝ່ນີ້ແກ້ປັນຫາດ້ວຍການໃຊ້ອະນຸຟອສເຟີຂະໜາດໄມຄອນ ຊຶ່ງໃຫຍ່ພໍທີ່ຈະປ່ອຍແສງສະຫວ່າງຊັດເຈນ ແຕ່ກໍຍັງສາມາດແຜ່ກະຈາຍໄປທົ່ວເນື້ອເຍື່ອພືດໄດ້ຢ່າງເສລີ

ການນຳໃຊ້ຕົວຈິງໄດ້ໃນອະນາຄົດ

ເຖິງແມ່ນອະນຸພາກດັ່ງກ່າວໃຊ້ໄດ້ສະເພາະກັບພືດຊະນິດນີ້ ເນື່ອງຈາກມີຊ່ອງຫວ່າງລະຫວ່າງເຊລຫຼາຍກວ່າພືດຊະນິດອື່ນ

ແຕ່ຜົນລັບຄັ້ງນີ້ຖືເປັນກ້າວສຳຄັນ ນັກວິໄຈເຫັນວ່າເທັກນິກນີ້ສາມາດຕໍ່ຍອດສູ່ການສ້າງລະບົບໄຟສ່ອງສະຫວ່າງທີ່ໃຊ້ພືດເປັນຕົວໃຫ້ແສງ ແທນຫຼອດໄຟແບບດັ້ງເດີມ ເປັນທາງເລືອກທີ່ປະຫຍັດພະລັງງານ ແລະ ຫຼຸດການປ່ອຍຄາບອນ

ຊູຖິງ ຫລິວ (Shuting Liu) ກ່າວທິ້ງທ້າຍວ່າ “ລອງຈິນຕະນາການເຖິງຕົ້ນໄມ້ທີ່ເຮືອງແສງແທນໄຟແຄມທາງ ອະນຸພາກນ້ອຍໆ ທີ່ພວກເຮົາສ້າງຂຶ້ນສາມາດປະສານເຂົ້າກັບໂຄງສ້າງທຳມະຊາດຂອງພືດໄດ້ຢ່າງໜ້າອັດສະຈັນແທ້ໆ”

ວຽກວິໄຈນີ້ໄດ້ຮັບການເຜີຍແຜ່ໃນວາລະສານ Matter ເມື່ອວັນທີ່ 27 ສິງຫາທີ່ຜ່ານມາ ແລະ ຖືກເຫັນວ່າອາດເປັນຈຸດເລີ່ມຕົ້ນຂອງນະວັດຕະກຳໄຟຈາກທຳມະຊາດທີ່ທັງສວຍງາມ ແລະ ໃຊ້ງານໄດ້ແທ້ໃນຊີວິດປະຈຳວັນ

ສະແດງຄຳຄິດເຫັນ