ຈີນທົດສອບການຮັບນ້ຳໜັກຂອງຂົວທີ່ສູງທີ່ສຸດໃນໂລກ ຂົວຫົວຈຽງ ແກຣນແຄນຢອນ (Huajiang Grand Canyon Bridge)

ຊຶ່ງຕັ້ງຢູ່ໃນແຂວງກຸ້ຍໂຈວ ທາງຕາເວັນຕົກສ່ຽງໃຕ້ຂອງຈີນ ກ່ອນເປີດໃຊ້ງານໃນຊ່ວງປາຍເດືອນກັນຍານີ້

ການທົດສອບຂົວທີ່ສູງທີ່ສຸດໃນໂລກ

ຂະບວນການທົດສອບດັ່ງກ່າວໃຊ້ເວລາເຖິງ 5 ວັນ ເພື່ອເບິ່ງຄວາມແຂງແຮງດ້ານໂຄງສ້າງໃຫ້ກົງຕາມມາດຕະຖານຄວາມປອດໄພ

ໂດຍມີການທົດສອບຮັບນ້ຳໜັກເປັນຂັ້ນຕອນສຸດທ້າຍ ດ້ວຍການຂັບລົດບັນທຸກຈຳນວນ 96 ຄັນ ຊຶ່ງມີນ້ຳໜັກລວມກັນຫຼາຍກວ່າ 3,000 ໂຕນ

ເຂົ້າໄປໃນພື້ນທີ່ທີ່ກຳນົດເທິງຂົວເປັນຊຸດໆ ເພື່ອວັດການເຄື່ອນໄຫວ ແລະ ແຮງກົດໃນສ່ວນຊ່ວງຂົວຫຼັກ, ເສົາ, ສາຍເຄເບີນ ແລະ ສາຍແຂວນ

ທີມງານຜູ້ດຳເນີນການທົດສອບ ຢູ່ສະຖານທີ່ກໍ່ສ້າງຂົວຫົວຈຽງເປີດເຜີຍວ່າ ການທົດສອບຮັບນ້ຳໜັກນີ້ ເປັນການຈຳລອງສະພາວະສຸດຂີດທີ່ຂົວຈະຕ້ອງຮັບ ດ້ວຍນ້ຳໜັກລວມແລ້ວ 3,360 ໂຕນ

ເພື່ອທົດສອບຂີດຄວາມສາມາດສູງສຸດຂອງໂຄງສ້າງຂົວພາຍໃຕ້ການໃຊ້ງານປົກກະຕິ ໂດຍເນັ້ນການຕິດຕາມການເຄື່ອນໄຫວຂອງເສົາຫຼັກທັງສອງເບື້ອງ ການງໍທີ່ຖານເສົາ ແລະ ແຮງດຶງສູງສຸດໃນສາຍເຄເບີນຂອງຊ່ວງຍຶດຂົວ

ຂໍ້ມູນຂົວທີ່ສູງທີ່ສຸດໃນໂລກ

ຂົວ ຫົວຈຽງ ແກຣນແຄນຢອນ (Huajiang Grand Canyon Bridge) ມີຄວາມຍາວລວມ 2,890 ແມັດ

ໂດຍມີຊ່ວງຂົວຫຼັກຍາວ 1,420 ແມັດ ໃນສ່ວນໂຄງສ້າງໂຄງເຫຼັກທີ່ຮັບນ້ຳໜັກຫຼັກຂອງຂົວ ຈະປະກອບດ້ວຍຊິ້ນສ່ວນຫຼາຍເຖິງ 93 ສ່ວນ ຊຶ່ງມີນ້ຳໜັກລວມເຖິງ 22,000 ໂຕນ ແລະ ເມື່ອກໍ່ສ້າງສຳເລັດ ຂົວແຫ່ງນີ້ຈະມີຄວາມສູງເຫນືອແມ່ນ້ຳ 625 ແມັດ ຫຼື ທຽບແລ້ວຄືສູງເຖິງ 2 ເທົ່າຂອງຫໍໄອເຟລ

ທີ່ມີຄວາມສູງແບບບໍ່ລວມເສົາອາກາດ ຢູ່ທີ່ປະມານ 300 ແມັດ ເຮັດໃຫ້ທຳລາຍສະຖິຕິທັງ “ຂົວທີ່ສູງທີ່ສຸດໃນໂລກ” ແລະ ຍັງເປັນ “ຂົວແຂວນທີ່ໃຫຍ່ທີ່ສຸດໃນໂລກໃນພື້ນທີ່ພູ” ອີກດ້ວຍ

ສຳລັບໂຄງການຂົວແຂວນແຫ່ງນີ້ ເປັນໂຄງການຂອງບໍລິສັດກໍ່ສ້າງໃນຈີນ ກຸ້ຍໂຈວ ທຣານສ໌ປອດ ອິນເວສເມັນ ກຣຸບ (Guizhou Transport Investment Group)

ຄາດວ່າມີມູນຄ່າການກໍ່ສ້າງໂດຍລວມຢູ່ທີ່ 280 ລ້ານໂດລາສະຫະລັດ ຂົວແຫ່ງນີ້ສ້າງຂຶ້ນເພື່ອຊ່ວຍຫຼຸດເວລາທີ່ຕ້ອງໃຊ້ໃນການເດີນທາງຂ້າມພູຜາ ອີກທັງຍັງຊ່ວຍເພີ່ມການເຊື່ອມຕໍ່ ແລະ ການທ່ອງທ່ຽວໃນລະດັບພູມິພາກ ຍົກລະດັບເສດຖະກິດ ແລະ ເພີ່ມການເຕີບໂຕໃຫ້ເມືອງໃກ້ຄຽງ

ສະແດງຄຳຄິດເຫັນ