ຍີ່ປຸ່ນໃຊ້ເທັກໂນໂລຢີ AI ຈຳລອງພູເຂົາໄຟຟູຈິລະເບີດຢ່າງຮຸນແຮງ ເພື່ອກະກຽມຄວາມພ້ອມຮັບມືໃນສະຖານະການທີ່ຮ້າຍແຮງທີ່ສຸດ ເຖິງແມ່ນຍັງບໍ່ພົບສັນຍານປະທຸ

ເຖິງແມ່ນພູເຂົາໄຟຟູຈິຈະສະຫງົບມາຕັ້ງແຕ່ປີ ຄ.ສ. 1707 ແຕ່ລັດຖະບານກຸງໂຕກຽວໄດ້ເຜີຍແຜ່ວິດີໂອຈຳລອງການປະທຸຮຸນແຮງຂອງພູເຂົາໄຟຟູຈິ ໂດຍໃຊ້ເທັກໂນໂລຢີຄອມພິວເຕີ ແລະ ປັນຍາປະດິດ (AI) ເພື່ອກະກຽມຄວາມພ້ອມຮັບມືສະຖານະການເລວທີ່ສຸດ ໃນ “ວັນກະກຽມຄວາມພ້ອມຮັບມືໄພພິບັດຈາກພູເຂົາໄຟ” ຂອງຍີ່ປຸ່ນ

ວິດີໂອທີ່ເຜີຍແຜ່ໃນອາທິດນີ້ ສະແດງໃຫ້ເຫັນຮູບພາບຂອງຂີ້ເຖົ່າພູເຂົາໄຟຈຳນວນມະຫາສານປົກຄຸມກຸງໂຕກຽວທີ່ຢູ່ຫ່າງອອກໄປປະມານ 100 ກິໂລແມັດ ພາຍໃນເວລາບໍ່ກີ່ຊົ່ວໂມງ ສົ່ງຜົນໃຫ້ລະບົບຄົມມະນາຄົມເປັນອຳພາດ ການສົ່ງອາຫານແລະ ໄຟຟ້າຖືກລົບກວນ ລວມທັງອາດກໍ່ໃຫ້ເກີດບັນຫາລະບົບທາງເດີນຫາຍໃຈໃນໄລຍະຍາວຕອນທ້າຍຂອງວິດີໂອ ມີຂໍ້ຄວາມເຕືອນຢ່າງຊັດເຈນວ່າ “ພວກເຮົາຈຳເປັນຕ້ອງກະກຽມຕົວດ້ວຍຂໍ້ມູນທີ່ຖືກຕ້ອງ ແລະຮັບມືໄພພິບັດໃນຊີວິດປະຈຳວັນ” ພ້ອມດ້ວຍຮູບພາບຄອບຄົວທີ່ກັກຕຸນອາຫານກະປ໋ອງ ແລະ ຊຸດປະຖົມພະຍາບານໄວ້ໃນເຮືອນ

ດ້ານສຳນັກງານລັດຖະບານກຸງໂຕກຽວໄດ້ຊີ້ແຈງວ່າ ຂະນະນີ້ຍັງບໍ່ມີຫຼັກຖານຫຼືສັນຍານບົ່ງຊີ້ວ່າພູເຂົາໄຟຟູຈິກຳລັງຈະລະເບີດ ການເຜີຍແຜ່ວິດີໂອນີ້ມີເປົ້າໝາຍເພື່ອໃຫ້ປະຊາຊົນ 37 ລ້ານຄົນໃນເຂດມະຫານຄອນໂຕກຽວ ມີຄວາມຮູ້ແລະມາດຕະການປ້ອງກັນຕົວຫາກເກີດເຫດສຸກເສີນເທົ່ານັ້ນ

ແນວໃດກໍຕາມ ຫຼັງຈາກການເຜີຍແຜ່ວິດີໂອດັ່ງກ່າວອອກມາ ໄດ້ສ້າງຄວາມກັງວົນແລະຄວາມສັບສົນໃນກຸ່ມຊາວຍີ່ປຸ່ນ ບາງຄົນແສດງຄວາມເຫັນວ່າ ມີສັນຍານຫຍັງບໍ? ເປັນຫຍັງຕ້ອງເວົ້າຫາເຖົ້າພູເຂົາໄຟໜາ 10 ເຊັນຕິແມັດແມ່ນແຕ່ໃນໂຕກຽວ ໃນຂະນະທີ່ປະຊາຊົນບາງສ່ວນກຳລັງວາງແຜນຈະຊື້ສິ່ງຂອງໃຊ້ສຸກເສີນທັນທີ

ໃນຂະນະທີ່ສາດສະດາຈານ ນາໂອຍະ ເຊກິຍະ ຜູ້ຊ່ຽວຊານດ້ານການສື່ສານຄວາມສ່ຽງ ມະຫາວິທະຍາໄລໂຕກຽວ ຢຳ້ວ່າຍີ່ປຸ່ນມີການຈຳລອງສະຖານະການໄພພິບັດທັງແຜ່ນດິນໄຫວແລະພູເຂົາໄຟມາໂດຍຕະຫຼອດ ແລະ ການເຜີຍແຜ່ຄັ້ງນີ້ ບໍ່ໄດ້ໝາຍຄວາມວ່າພູເຂົາໄຟຟູຈິກຳລັງຈະປະທຸໃນເຂົ້ານີ້

ຍີ່ປຸ່ນເປັນປະເທດທີ່ອ່ອນໄຫວຕໍ່ໄພທຳມະຊາດຫຼາກຫຼາຍປະເພດ ທັງແຜ່ນດິນໄຫວ ພາຍຸໄຕ້ຝຸ່ນ ນ້ຳຖ້ວມ ດິນຖ້ຳ ແລະ ພູເຂົາໄຟລະເບີດ ໂດຍເມື່ອເດືອນສິງຫາປີທີ່ແລ້ວ ສຳນັກງານອຸຕຸນິຍົມວິທະຍາຍີ່ປຸ່ນຫາກໍອອກຄຳເຕືອນແຜ່ນດິນໄຫວຂະໜາດມະຫຶມາຄັ້ງທຳອິດ ຫຼັງເກີດແຜ່ນດິນໄຫວຮຸນແຮງນອກຊາຍຝັ່ງເກາະກິວຊູ

ໃນຈຳນວນພູເຂົາໄຟທີ່ຍັງຄຸກຮຸ່ນຢູ່ທົ່ວໂລກປະມານ 1,500 ລູກ ຍີ່ປຸ່ນມີຫຼາຍເຖິງ 111 ລູກ ເນື່ອງຈາກຕັ້ງຢູ່ເທິງວົງແຫວນແຫ່ງໄຟແປຊີຟິກ ໂດຍພູເຂົາໄຟຟູຈິ ຊຶ່ງເປັນພູເຂົາທີ່ສູງທີ່ສຸດຂອງປະເທດ ເຄີຍປະທຸສະເຫມີທຸກໆ 30 ປີ ແຕ່ກຽງສະຫງົບລົງມາຕັ້ງແຕ່ສັດຕະວັດທີ່ 18

ສະແດງຄຳຄິດເຫັນ