ໃນວັນທີ 7 ກັນຍາ 2025 ທ່ານ ຊິເງຣຸ ອິຊິບະ ນາຍົກລັດຖະມົນຕີ ຍີ່ປຸ່ນ ໄດ້ຖະແຫລ່ງຂ່າວ ລາອອກຈາກຕຳແໜ່ງ ຫລັງຈາກທີ່ຖືກແຮງກົດດັນພາຍໃນພັກໃນໄລຍະຫລາຍອາທິດທີ່ຜ່ານມາ. ໃນລະຫວ່າງການຖະແຫລ່ງຂ່າວ ທ່ານ ຊິເງຣຸ ອິຊິບະ ກ່າວວ່າ: “ຂ້ອຍຕັດສິນໃຈຢ່າງຍາກລຳບາກທີ່ຈະກ້າວລົງຈາກຕຳແໜ່ງ” ແລະ ກ່າວເພີ່ມເຕີມອີກວ່າ: ຕົນມີຄວາມປາຖະໜາດີຢ່າງແຮງກ້າທີ່ຈະໃຫ້ສະມາຊິກພັກເສລີປະຊາທິປະໄຕ (LDP) ເອົາຊະນະ “ຄວາມແຕກແຍກທີ່ຍາກລຳບາກ” ພາຍໃນພັກໃຫ້ໄດ້.

ທ່ານ ຊິເງຣຸ ອິຊິບະ ລະບຸວ່າ: ທ່ານເອງໄດ້ພິຈາລະນາເລື່ອງຕຳແໜ່ງນາຍົກລັດຖະມົນຕີມາຕັ້ງແຕ່ການເລືອກຕັ້ງເມື່ອປີທີ່ຜ່ານມາ ແຕ່ເປັນເລື່ອງຂອງການຫາໄລຍະເວລາທີ່ເໝາະສົມ ພ້ອມທັງກ່າວຕື່ມວ່າ ທ່ານຕັດສິນໃຈປະກາດລາອອກໃນຕອນນີ້ເພາະເຫັນວ່າຂໍ້ຕົກລົງເລື່ອງພາສີກັບສະຫະລັດອາເມລິກາ ມີການດຳເນີນການຈົນເກີດຜົນເປັນຮູບປະທຳ.

ຜ່ານມາ ຍີ່ປຸ່ນ ພະຍາຍາມຕໍ່ສູ້ຍ່າງໜັກເພື່ອບັນລຸຂໍ້ຕົກລົງທາງການຄ້າກັບສະຫະລັດອາເມລິກາ ແລະ ປົກປ້ອງອຸດສາຫະກຳລົດຍົນຂະໜາດໃຫຍ່ຂອງຕົນຈາກພາສີທີ່ສູງ, ໂດຍເມື່ອວັນທີ 4 ກັນຍາ 2025 ປະທານາທິບໍດີ ໂດນັລ ທຣຳ ໄດ້ລົງນາມໃນຄຳສັ່ງຝ່າຍບໍລິຫານເພື່ອບັງຄັບໃຊ້ຂໍ້ຕົກລົງທາງການຄ້າກັບຍີ່ປຸ່ນ ເຊິ່ງລວມເຖິງການເກັບພາສີພື້ນຖານ 15% ຈາກສິນຄ້າສ່ວນຫລາຍຂອງຍີ່ປຸ່ນ ເຊິ່ງຄວບຄຸມໄປເຖິງກຸ່ມລົດຍົນອີກດ້ວຍ.

ທັງນີ້, ທ່ານ ຊິເງຣຸ ອິຊິບະ ໄດ້ຮຽກຮ້ອງໃຫ້ພັກ LDP ຈັດການເລືອກຕັ້ງຫົວໜ້າພັກສຸກເສີນ ໂດຍຢືນຢັນວ່າຕົນເອງຈະບໍ່ຮ່ວມລົງສະໝັກ ແລະ ຈະຍັງປະຕິບັດໜ້າທີ່ຕໍ່ໄປຈົນກ່ວາຈະມີການເລືອກຜູ້ສືບທອດຕຳແໜ່ງຄົນໃໝ່ໄດ້.

ຍີ່ປຸ່ນ ເປັນປະເທດທີ່ມີເສດຖະກິດຂະໜາດໃຫຍ່ອັນດັບ 4 ຂອງໂລກ ພົບກັບຄວາມບໍ່ແນ່ນອນທາງການເມືອງນັບຕັ້ງແຕ່ພັກ LDP ສູນເສຍການເປັນຝ່າຍທີ່ມີສຽງຂ້າງຫລາຍ ໃນລັດສະພາຈາກການເລືອກຕັ້ງໃນທ້າຍປີທີ່ຜ່ານມາ ເຊິງຖືເປັນຄັ້ງທຳອິດນັບຕັ້ງແຕ່ປີ 2009 ທີ່ພັກ LDP ສູນເສຍສຽງຂ້າງຫລາຍໃນສະພາ ແລະ ແຮງກົດດັນໄດ້ເພີ່ມຂຶ້ນເມື່ອພັກຮ່ວມລັດຖະບານເຮັດຜົນງານໄດ້ຕຳກວ່າຄາດໝາຍໃນການເລືອກຕັ້ງສະພາສູງເມື່ອເດືອນ ກໍລະກົດ ຜ່ານມາ.

ການລາອອກຂອງທ່ານ ຊິເງຣຸ ອິຊິບະ ສົ່ງຜົນໃຫ້ຍີ່ປຸ່ນພົບກັບຄວາມປັ່ນປ່ວນທາງການເມືອງ ໂດຍສະຖານະການຄັ້ງນີ້ມີຄວາມຊັບຊ້ອນຫລາຍຂຶ້ນ ເນື່ອງຈາກພັກ LDP ບໍ່ໄດ້ມີສຽງຂ້າງຫລາຍໃນທັງສອງສະພາ ເຮັດໃຫ້ການເລືອກຕັ້ງຫົວໜ້າພັກຄົນໃໝ່ອາດບໍ່ສາມາດຮັບປະກັນໄດ້ວ່າຜູ້ຊະນະຈະໄດ້ຮັບຕຳແໜ່ງນາຍົກລັດຖະມົນຕີຄົນຕໍ່ໄປຂອງຍີ່ປຸ່ນ.

ສະແດງຄຳຄິດເຫັນ