ປກສ ແຂວງຊຽງຂວາງ ລາຍງານວ່າ: 11 ກັນຍາ 2025 ກໍາລັງປ້ອງກັນຄວາມສະຫງົບ ສົມທົບກັບກໍາລັງປ້ອງກັນຊາດແຂວງຊຽງຂວາງ ນໍາໂດຍທ່ານ ພັອມ ຈູຊົ່ງ ຈື່ໄຊ ຮອງຫົວໜ້າປ້ອງກັນຄວາມສະຫງົບ ແຂວງຊຽງຂວາງ ພ້ອມດ້ວຍພາກສ່ວນທີ່ກ່ຽວຂ້ອງ ລົງກວດກາແກ້ໄຂບັນຫາລັກລອບຂຸດຄົ້ນແຮ່ຄໍາ ຢູ່ພູແຮ່ ເມືອງແປກ ແຂວງຊຽງຂວາງ. ໃນນີ້ໄດ້ພົບເຫັນແຮ່ທີ່ຖືກຂຸດຄົ້ນອອກມາຈໍານວນຫລວງຫລາຍ ແລະ ສາມາດກັກຕົວຜູ້ລັກລອບໄດ້ຈໍານວນໜຶ່ງ ພ້ອມຢຶດອຸປະກອນທີ່ໃຊ້ໃນການຂຸດຄົ້ນ ເປັນຕົ້ນ ຈັກປັ່ນໄຟຟ້າ, ຈົກ, ຊວ້ານ ແລະ ອຸປະກອນອື່ນໆ ອີກຈໍານວນໜຶ່ງ ເພື່ອທໍາລາຍຖິ້ມ.

ສ່ວນແຮ່ທາດທີ່ຖືກຈຸດຄົ້ນອອກມາ ເຈົ້າໜ້າທີ່ຈະໄດ້ຢຶດໄວ້ເປັນຫລັກຖານ ເພື່ອດໍາເນີນຄະດີຕໍ່ຜູ້ລັກລອບຕາມລະບຽບກົດໝາຍ. ທັງນີ້ກໍເພື່ອແນ່ໃສ່ແກ້ໄຂບັນຫາ ລັກລອບ ຂຸດຄົ້ນຊັບພະຍາກອນທໍາມະຊາດ ເປັນຕົ້ນແມ່ນແຮ່ຄໍາ ຢູ່ຈຸດພູແຮ່ ເມືອງແປກ ແຂວງຊຽງຂວາງ ໃຫ້ຫລຸດລົງ ແລະ ກ້າວໄປສູ່ການຢຸດຕິໃນອະນາຄົດ.

ໃນໄລຍະຜ່ານມາບັນຫາລັກລອບຂຸດຄົ້ນແຮ່ທໍາມະຊາດດັ່ງກ່າວ, ໄດ້ສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍທາງດ້ານສັງຄົມ ເປັນຕົ້ນແມ່ນ ດິນຖະຫລົ່ມທັບຖົມຄົນເສຍຊີວິດ, ທັບຖົມພື້ນທີ່ທໍາການຜະລິດ ແລະ ເຮັດໃຫ້ເສຍຊັບສິນຂອງປະເທດຊາດ.

ດັ່ງນັ້ນ, ເຈົ້າໜ້າທີ່ຈຶ່ງໄດ້ຮຽກຮ້ອງມາຍັງທຸກພາກສ່ວນໃນສັງຄົມ ໂດຍສະພາະ ແມ່ນກຸ່ມແກ້ງທີ່ກໍາລັງລັກລອບຂຸດຄົ້ນແຮ່ທໍາມະຊາດຢູ່ພາຍໃນ ແຂວງຊຽງຂວາງ ໃຫ້ຢຸດເຊົາ ຖ້າຫາກເຈົ້າໜ້າທີ່ພົບເຫັນ ຈະໄດ້ດໍາເນີນຄະດີຕາມລະບຽບກົດໝາຍ.

ແຫຼ່ງຂ່າວ: ປກສແຂວງຊຽງ

ສະແດງຄຳຄິດເຫັນ