ອັດຕະປື ຕິດຕາມ ກວດກາ ໂຄງການ

ບູລະນະຮັກສາ-ສ້ອມແປງທາງຫລວງແຫ່ງຊາດ 18 B

ຂປລ. ແຫລ່ງຂ່າວຈາກ ແຊວງອັດຕະປື ໃຫ້ຮູ້ວ່າ: ເມື່ອບໍ່ດົນມານີ້, ທ່ານ ສົມໄຊ ແກ້ວມະນີວັນ ຫົວໜ້າພະແນກໂຍທາທິການ ແລະ ຂົນສົ່ງ ແຂວງອັດຕະປື ພ້ອມດ້ວຍຄະນະ ໄດ້ເຄື່ອນໄຫວຕິດຕາມ, ກວດກາໂຄງການບູລະນະຮັກສາ ແລະ ສ້ອມແປງທາງຫລວງແຫ່ງຊາດທາງເລກທີ 18 B ແຕ່ຫົວຂົວເຊກອງ-ຊາຍແດນລາວຫວຽດນາມ ທັງນີ້ກໍເພື່ອປະເມີນຄຸນນະພາບ ມາດຕະຖານງານກໍ່ສ້າງ ການສ້ອມແປງ ແລະ ການດູແລຮັກສາ ເສັ້ນທາງ ໃຫ້ເປັນໄປຕາມຫລັກວິສະວະກອນ ເພື່ອໃຫ້ການເດີນທາງຂອງປະຊາຊົນ ມີຄວາມສະດວກປອດໄພ ແລະ ຍືດອາຍຸການໃຊ້ງານ ຂອງເສັ້ນທາງດັ່ງກ່າວ ໃນໄລຍະຍາວ.

ທ່ານ ສົມໄຊ ແກ້ວມະນີວັນ ໄດ້ກ່າວວ່າ: ໂຄງການດັ່ງກ່າວ ໄດ້ເລີ່ມຈັດຕັ້ງປະຕິບັດມາແຕ່ວັນທີ 24 ສິງຫາ 2025 ໄລຍະການສ້ອມແປງ 6 ເດືອນ ປະເພດທາງ ປູອັດສະຟານເກົ່າ ແລະ ປູຢາງ 2 ຊັ້ນ ຈຸດທີ່ຕັ້ງ ກິໂລແມັດ 44+000-ກິໂລແມັດ 11+900, ຍາວ 67.900 ກິໂລແມັດ ກວ້າງ 7 ແມັດ ໃນ ມູນຄ່າ 10,60 ຕື້ກີບ ໂດຍແມ່ນ ບໍລິສັດ ອັດຕະປື ວິສະວະກຳ ກໍ່ສ້າງ ຈຳກັດຜູ້ດຽວ ເປັນຜູ້ຈັດຕັ້ງປະຕິບັດ ມາຮອດປັດຈຸບັນ ບໍລິສັດໄດ້ເລີ່ມນໍາເອົາກົນຈັກ ເຂົ້າສະໜາມ ມີລົດຈົກ 2 ຄັນ, ລົດເກດ 1 ຄັນ, ລົດໂລ 1 ຄັນ, ລົດດາມ 2 ຄັນ ແລະ ໄດ້ແກ້ໄຂສຸກເສີນ, ເອົາດິນເຈື່ອນອອກຈາກໜ້າທາງ ແລະ ຮ່ອງນໍ້າ, ແກ້ໄຂໜ້າທາງເປັນຂຸມໃຫຍ່ດ້ວຍການຖົມຫີນຊັ້ນພື້ນທາງ ແລະ ຫີນໃຫຍ່ແກ້ໄຂການສັນຈອນໃນໄລຍະຝົນຕົກ, ກະກຽມວັດສະດຸເພື່ອສ້ອມແປງໜ້າທາງປູດ້ວຍເບຕົງ ມີຄວາມຄືບໜ້າໃນການຈັດຕັ້ງປະຕິບັດວຽກ 11,63%.

ທ່ານ ສົມໄຊ ແກ້ວມະນີວັນ ກ່າວຕື່ມວ່າ: ຈາກການຕິດຕາມກວດກາ ງານດັ່ງກ່າວ ໄດ້ດຳເນີນຕາມແຜນ ໂດຍບໍລິສັດ ໄດ້ເອົາໃຈໃສ່ ກໍ່ສ້າງສ້ອມແປງ ໃຫ້ທັນກຳນົດໃນກອບເວລາ ພ້ອມທັງຄຳນຶງເຖິງ ຄຸນນະພາບ ແລະ ຄວາມໝັ້ນຄົງປອດໄພ ຂອງເສັ້ນທາງຫລວງ ເພື່ອປະໂຫຍດໂດຍຕົງ ຕໍ່ການເດີນທາງ ແລະ ການຂົນສົ່ງສິນຄ້າ ຂອງປະຊາຊົນ ລວມເຖິງການພັດທະນາ ດ້ານເສດຖະກິດ ຂອງແຂວງອັດຕະປືຕື່ມອີກ.

ຂ່າວ: ວັດທະນາ ຫລວງອາໄພ

ສະແດງຄຳຄິດເຫັນ