ວັນທີ 24 ກັນຍາ 2025, ຮົງກົງຕ້ອງປະເຊີນໜ້າກັບອິດທິພົນຂອງ ລົມພາຍຸໄຕ້ຝຸ່ນ “ລາກາຊາ” (Ragasa) ໄດ້ພັດເຂົ້າ ຮົງກົງ ແລະ ສ້າງຄວາມເສຍຫາຍຢ່າງໜັກ, ໂດຍສະເພາະໃນເຂດ ເຮັງຟາຊວນ (Heng Fa Chuen) ບໍລິເວນແຄມຝັ່ງທະເລຕາເວັນອອກຂອງເກາະຮົງກົງ ເຮັດໃຫ້ລະດັບນໍ້າທະເລສູງຂຶ້ນ ແລະ ເກີດນໍ້າຖ້ວມກະທັນຫັນ.

ຫໍຄອຍສັງເກດການ ຮົງກົງ (Hong Kong Observatory) ໄດ້ປະກາດຍົກລະດັບສັນຍານເຕືອນໄພພາຍຸຂຶ້ນສູ່ລະດັບສູງສຸດ T10 ໃນເວລາ 02:40 ໂມງ ຕອນເຊົ້າຂອງວັນພຸດ, ຫລັງຈາກປະກາດສັນຍານເຕືອນໄພລະດັບຮອງລົງມາໄດ້ພຽງ 1 ຊົ່ວໂມງ. ຄາດວ່າລະດັບນໍ້າທະເລອ້ອມແຄມຝັ່ງຈະສູງຂຶ້ນ 2-3 ແມັດ ເຊິ່ງຈະສົ່ງຜົນໃຫ້ບັນດາພື້ນທີ່ຕໍ່າ ສ່ຽງຖືກນໍ້າຖ້ວມເປັນວົງກວ້າງ.

ລາຍງານລະບຸວ່າ ພາຍຸ ລາກາຊາ ມີຄວາມໄວລົມແຮງສູງສຸດຕໍ່ເນື່ອງເຖິງ 230 ກິໂລແມັດຕໍ່ຊົ່ວໂມງ, ໄດ້ສ້າງຄວາມກັງວົນໃຫ້ປະຊາຊົນ ແລະ ເຈົ້າໜ້າທີ່. ຂະນະດຽວກັນ, ທຸລະກິດ, ສະຖານການສຶກສາ ແລະ ການຄົມມະນາຄົມຫລາຍແຫ່ງ ໄດ້ຖືກສັ່ງ

ປິດຊົ່ວຄາວເພື່ອຄວາມປອດໄພ.

ເຈົ້າໜ້າທີ່ໄດ້ເຕືອນໃຫ້ປະຊາຊົນຢູ່ພາຍໃນບ່ອນພັກອາໄສ, ຫລີກເວັ້ນການເດີນທາງ ແລະ ກຽມຄວາມພ້ອມຮັບມືສະຖານະການສຸກເສີນ ເນື່ອງຈາກອິດທິພົນຂອງພາຍຸໄຕ້ຝຸ່ນຫົວນີ້ມີຄວາມຮຸນແຮງ ແລະ ອາດຈະແກ່ຍາວໄປອີກຫລາຍວັນ.

ພາບຈາກ Kyle Lam/HKFP

ສະແດງຄຳຄິດເຫັນ