.
ທ່ານ ນາງ ດວງຕາ ມາດມະນີສອນ ປະທານກຸ່ມບໍລິສັດ ໃນນາມຜູ້ຮັບເໝົາກໍ່ສ້າງໂຄງການປ້ອງກັນຕະຝັ່ງເຈື່ອນ ເຂດພຣະທາດສີໂຄດຕະບອງ ໄດ້ໃຫ້ສໍາພາດຜ່ານສື່ມວນຊົນແຂວງ ໃນວັນທີ 19 ກັນຍາ 2025 ວ່າ : ພາຍຫຼັງແຂວງຄໍາມ່ວນຕົກລົງມອບໃຫ້ບໍລິສັດເປັນຜູ້ຮັບເໝົາກໍ່ສ້າງ ແມ່ນໄດ້ເລີ່ມລົງມືກໍ່ສ້າງນັບແຕ່ທ້າຍເດືອນເມສາ ເປັນຕົ້ນມາ, ເຕັກນິກການອອກແບບກໍ່ສ້າງແບບລຽນຫີນ, ຂະໜາດລວງຍາວທັງໝົດ 180 ແມັດ, ກວ້າງຂະຫຍາຍໜ້າທາງເບື້ອງໃນ 28.91 ແມັດ, ຈຸດແຄບສຸດ 15 ແມັດ, ຈຸດພັກຂັ້ນໃດກວ້າງ 5 ແລະ 3 ແມັດ, ມີໄລຍະປະຕິບັດໂຄງການ 24 ເດືອນ, ຄວາມຄືບໜ້າຮອດປະຈຸບັນປະຕິບັດສໍາເລັດ 100%, ສ່ວນວຽກງານຕົບແຕ່ງ ທາງບໍລິສັດຈະໄດ້ສືບຕໍ່ຈັດຕັ້ງປະຕິບັດຕາມແຜນອອກແບບໂຄງການ ໃນໄລຍະຕໍ່ໄປ.

ດັ່ງທີ່ຮູ້ນໍາກັນແລ້ວວ່າໂຄງການກໍ່ສ້າງປ້ອງກັນຕະຝັ່ງເຈື່ອນແຄມແມ່ນໍ້າຂອງເຂດພຣະທາດສີໂຄດຕະບອງແມ່ນມີຄວາມສໍາຄັນຫຼາຍ ເພາະພຣະທາດສີໂຄດຕະບອງ ແມ່ນປູສະນີຍະສະຖານທີ່ເກົ່າແກ່ທາງດ້ານວັດທະນະທໍາ, ເປັນສະຖານທີ່ມີຄວາມສັກສິດ, ສັກກະລະບູຊາ ຄູ່ກັບປະຊາຊົນລາວ ເວົ້າສະເພາະຊາວແຂວງຄຳມ່ວນ ເນື່ອງຈາກຮາກຖານຂອງອົງພຣະທາດ ຕັ້ງຢູ່ໃກ້ກັບຕາຝັ່ງແມ່ນໍ້າຂອງ ແລະ ຜ່ານການສຳຫຼວດຂອງວິຊາການ ເຫັນວ່າມີຄວາມສ່ຽງຕໍ່ການເຊາະເຈື່ອນຂອງຕາຝັ່ງ.

ສະນັ້ນ, ເພື່ອເປັນການປ້ອງກັນບໍ່ໃຫ້ອົງພຣະທາດ ເກີດຄວາມເສຍຫາຍ ແຂວງຈຶ່ງຕົກລົງໃຫ້ເຮັດການສຳຫຼວດ-ອອກແບບ ແລະ ຂຶ້ນແຜນງົບປະມານກໍ່ສ້າງຕາມສັນຍາຮັບເໝົາ ກໍ່ສ້າງ ເລກທີ 909/ຍທຂ.ຄມ ມູນຄ່າຕາມສັນຍາ 48 ຕື້ກວ່າກີບ.
ພາຍຫຼັງສໍາເລັດໂຄງການນີ້ຈະເສີມສ້າງທັດສະນີຍະພາບຢູ່ເຂດພຣະທາດສີໂຄດຕະບອງໃຫ້ມີຄວາມສວຍງາມ, ກາຍເປັນແລນມາກອັນໜຶ່ງ ເພື່ອດຶງດູດນັກທ່ອງທ່ຽວມາທ່ຽວຊົມສະຖານທີ່ດັ່ງກ່າວໃຫ້ນັບມື້ຫຼາຍຂຶ້ນ.

ສະແດງຄຳຄິດເຫັນ