ພິທີວາງສີລາລືກໂຄງການກໍ່ສ້າງປະຕູໂຂງເຂົ້າ-ອອກ ມະຫາວິທະຍາໄລແຫ່ງຊາດ (ມຊ ວິທະຍາເຂດດົງໂດກ) ແລະ ປະຕູໂຂງທາງເຂົ້າຄະນະກະເສດສາດ (ວິທະຍາເຂດນາບົງ) ຈັດຂຶ້ນໃນວັນທີ 8 ຕຸລາຜ່ານມາ ທີ່ ມຊ ໃຫ້ກຽດເຂົ້າຮ່ວມ ແລະ ຕັດແຖບຜ້າຂອງທ່ານ ທອງສະລິດ ມັງໜໍ່ເມກ ລັດຖະມົນຕີກະຊວງສຶກສາທິການ ແລະ ກິລາ (ສສກ), ທ່ານ ເດຊານຸລາດ ແສນດວງເດດ ອະທິການບໍດີ ມຊ ແລະ ທ່ານ ຢາງໂປ ປະທານບໍລິສັດ ເອເຊຍໂທບາໂຄ ອິນດັດຕຣີ ກຣຸບ ກຳຈັດ ພ້ອມດ້ວຍແຂກຖືກເຊີນ ແລະ ພະນັກງານກ່ຽວຂ້ອງສອງພາກສ່ວນເຂົ້າຮ່ວມເປັນສັກຂີພິຍານ.

ໂອກາດນີ້, ທ່ານ ເດຊານຸລາດ ແສນດວງເດດ ກ່າວວ່າ: ໂຄງການກໍ່ສ້າງປະຕູໂຂງເຂົ້າ-ອອກ ມຊ ແລະ ປະຕູທາງເຂົ້າຄະນະກະເສດສາດ ເປັນໂຄງການຊ່ວຍເຫຼືອຈາກບໍລິສັດເອເຊຍໂທບາໂຄ ອິນດັດຕຣີ ກຣຸບ ຈໍາກັດ ລວມມູນຄ່າການກໍ່ສ້າງທັງໝົດ 560,000 ໂດລາ ເພື່ອເປັນການເພີ່ມທະວີການພົວພັນຮ່ວມມືໃນການພັດ ທະນາຊັບພະຍາກອນມະນຸດ, ສ້າງຫຼັກສູດການຮຽນ-ການສອນກ່ຽວກັບການປູກພືດສະໝຸນໄພເປັນຢາ ເປັນໂຄງ ການສົ່ງເສີມການລົງທຶນພັດທະນາກະສິກຳ ແລະ ປ່າໄມ້ແບບຍືນຍົງ ແລະ ພືດສະໝຸນໄພເພື່ອປຸງແຕ່ງຜົນຜະລິດກະສິກຳໃຫ້ເປັນສິນຄ້າ ທີ່ເປັນປະໂຫຍດແກ່ສັງຄົມ ເວົ້າລວມ, ເວົ້າສະເພາະພັດທະນາການຮຽນ-ການສອນໃນສາຂາທີ່ກ່ຽວຂ້ອງໃນ ມຊ. ໂຄງການດັ່ງກ່າວຈະເລີ່ມລົງມືກໍ່ສ້າງນັບຕັ້ງແຕ່ມື້ວາງສີລາຈາລຶກເປັນຕົ້ນໄປ ຄາດວ່າຈະໃຫ້ສຳເລັດກ່ອນວັນທີ 1 ທັນວາ 2025 ກ່ອນພິທີສະເຫຼີມສະຫຼອງວັນຊາດທີ 2 ທັນວາ ຄົບຮອບ 50 ປີ.

ການຊ່ວຍເຫຼືອໃນຄັ້ງນີ້ເພື່ອເສີມສ້າງພື້ນຖານໂຄງລ່າງໃຫ້ ມຊ ມີໂສມໜ້າໃໝ່. ສະນັ້ນ, ໃນນາມຄະນະພັກຄະນະນໍາ ມຊ ຂໍສະແດງຄວາມຂອບໃຈຢ່າງຈິງໃຈມາຍັງບໍລິສັດ ເອເຊຍໂທບາໂຄ ອິນດັດຕຣີ ກຣຸບຈໍາກັດ ທີ່ໃຫ້ທຶນຊ່ວຍເຫຼືອໃນຄັ້ງນີ້ ແລະ ເຊື່ອໝັ້ນວ່າພາຍໃຕ້ການຮ່ວມມືຂອງສອງຝ່າຍລະຫວ່າງ ມຊ ແລະ ບໍລິສັດ ເອເຊຍໂທບາໂຄ ອິນດັດຕຣີ ກຣຸບ ຈໍາກັດໃນຕໍ່ໜ້າຈະມີການຮ່ວມມືດ້ານວິຊາການ ໂດຍສະເພາະການສ້າງຫຼັກສູດການຮຽນ-ການສອນທີ່ຕິດພັນກັບການກະເສດ ເພື່ອເພີ່ມທາງເລືອກທີ່ຫຼາກຫຼາຍໃຫ້ກັບໄວໜຸ່ມໄດ້ເລືອກເຂົ້າສຶກສາ ເປັນການສ້າງປະໂຫຍດໃຫ້ແກ່ສັງຄົມຫຼາຍກວ່າເກົ່າ.

ຂ່າວສານສຶກສາ, ວິທະຍາສາດ ແລະ ກິລາອອນລາຍ

ສະແດງຄຳຄິດເຫັນ