ຂປລ. ແຫລ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ທ່ານ ພົງໄຊສັກ ອິນຖາລາດ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ຜູ້ຊີ້ນໍາວຽກງານແກ້ໄຂບັນຫາລະເບີດບໍ່ທັນແຕກ ພ້ອມດ້ວຍຂະແໜງການທີ່ກ່ຽວຂ້ອງຂອງແຂວງອັດຕະປື ເຄື່ອນໄຫວຢ້ຽມຢາມ ພາກສະໜາມເກັບກູ້ລະເບີດບໍ່ທັນແຕກ ຂອງໂຄງການເກັບກູ້ລະເບີດແຫ່ງຊາດ ໃນວັນທີ 14 ຕຸລາ 2025 ທີ່ບ້ານຕາດກຸ່ມ ເມືອງຊານໄຊ ແຂວງອັດຕະປື.

ໂອກາດດັ່ງກ່າວ, ທ່ານ ພົງໄຊສັກ ອິນຖາລາດ ໄດ້ຮັບຟັງການລາຍງານຫຍໍ້ ບັນດາຜົນສຳເລັດໃນການເຄື່ອນໄຫວວຽກງານຕ່າງໆ ຢູ່ພາກສະໜາມ ທີ່ພວມປະຕິບັດງານ ຢູ່ເຂດບ້ານຕາດກຸ່ມ ເມືອງຊານໄຊ, ເຊິ່ງໄດ້ເລີ່ມຈັດຕັ້ງປະຕິບັດ ມາແຕ່ວັນທີ 3 ຕຸລາ 2025 ໃນເນື້ອທີ່ເປົ້າໝາຍ 46 ພັນກວ່າຕາແມັດ ເຊິ່ງແມ່ນພື້ນທີ່ກະສິກຳ ຂອງປະຊາຊົນ ແລະ ຄາດວ່າຈະໃຫ້ສໍາເລັດໃນວັນທີ 22 ພະຈິກ 2025. ຜ່ານການກວດກູ້ ໄລຍະຜ່ານມາ ໄດ້ພົບລະເບີດ 3 ລູກ ເປັນລະເບີດປະເພດ ບົມບີ.
ໂອກາດນີ້, ທ່ານ ພົງໄຊສັກ ອິນຖາລາດ ໄດ້ສະແດງຄວາມຍ້ອງຍໍຊົມເຊີຍ ຕໍ່ພະນັກງານ ທີ່ພວມປະຕິບັດໜ້າທີ່ພາກສະໜາມ ໃນການກວດກູ້ລະເບີດອອກຈາກພື້ນທີ່ ເພື່ອເຮັດໃຫ້ເນື້ອທີ່ທໍາການຜະລິດຂອງພໍ່ແມ່ປະຊາຊົນ ມີຄວາມປອດໄພ ຈາກລູກລະເບີດບໍ່ທັນແຕກ.

ອີງຕາມຂໍ້ມູນ ຈາກຫ້ອງການໂຄງການເກັບກູ້ລະເບີດບໍ່ທັນແຕກແຫ່ງຊາດ ປະຈໍາ ແຂວງອັດຕະປື ໃຫ້ຮູ້ວ່າ: ປັດຈຸບັນ ແຂວງອັດຕະປື ເປັນແຂວງໜຶ່ງທີ່ລັດຖະບານສະຫະລັດອາເມລິກາ ໄດ້ໃຫ້ການຊ່ວຍເຫລືອ ແກ່ໂຄງການເກັບກູ້ລະເບີດແຫ່ງຊາດ ເພື່ອເຄື່ອນໄຫວວຽກງານຢູ່ໃນແຂວງ, ເຊິ່ງປະກອບດ້ວຍທີມງານພາກສະໜາມ, ທີມງານເກັບກູ້, ທີມງານສຳຫລວດດ້ານວິຊາການ, ທີມງານສຳຫລວດບໍ່ແມ່ນດ້ານວິຊາການ, ທີມງານໂຄສະນາສຶກສາຄວາມສ່ຽງ ແລະ ທີມງານຕັດຫຍ້າດ້ວຍແຮງງານຄົນ.

ຂ່າວ: ຫລວງອາໄພ

ສະແດງຄຳຄິດເຫັນ