ຂປລ. ແຫລ່ງຂ່າວຈາກ ແຂວງຫລວງນ້ຳທາ ໃຫ້ຮູ້ວ່າ: ຄະນະກໍາມະການຄຸ້ມຄອງໄພພິບັດຂັ້ນແຂວງຫລວງນ້ຳທາ ໄດ້ນໍາເອົາເຂົ້າສານໜຽວມາມອບໃຫ້ຄະນະກໍາມະການຄຸ້ມຄອງໄພພິບັດເມືອງວຽງພູຄາ ໃນວັນທີ 16 ຕຸລາ 2025 ຕາງໜ້າມອບໂດຍ ທ່ານ ຊຽງວັນ ສົມລັດທອງ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ແລະ ຕາງໜ້າຮັບໂດຍທ່ານ ພູມອນ ຄຸນສີລິເຮືອງ ຮັກສາການເຈົ້າເມືອງໆວຽງພູຄາ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

ເຂົ້າສານໜຽວ ທີ່ຄະນະກໍາມະການຄຸ້ມຄອງໄພພິບັດຂັ້ນແຂວງ ໄດ້ນໍາມາມອບຊ່ວຍເຫລືອໃນຄັ້ງນີ້ ມີ 342 ໂຕນ ເພື່ອນຳໄປແຈກຢາຍ ແລະ ມອບຕໍ່ໃຫ້ພໍ່ແມ່ປະຊາຊົນ ຜູ້ທີ່ຖືກຜົນກະທົບຈາກໄພພິບັດ ນໍ້າຖ້ວມ-ນໍ້າໄຫລຊຸ ເຮັດໃຫ້ພື້ນຖານການຜະລິດ ແລະ ແກ້ໄຂຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບໃນປີ 2024 ຜ່ານມາໃຫ້ດີຂຶ້ນ ພ້ອມທັງນຳໄປແຈກຢາຍ ໃຫ້ບັນດານ້ອງນັກຮຽນຜູ້ທຸກຍາກ, ກໍາພ້າ- ກໍາພອຍ ທີ່ນອນຫໍພັກ ໃນໂຮງຮຽນມັດທະຍົມຕົ້ນ-ມັດທະຍົມປາຍ 9 ແຫ່ງໃນທົ່ວເມືອງ. ພ້ອມນີ້ຍັງຈະໄດ້ແຈກຍາຍໃຫ້ແກ່ ຜູ້ສູງອາຍຸ ແລະ ກໍາລັງ ປກຊ, ປກສ ແລະ ກອງພັນ 418 ຈໍານວນໜຶ່ງ ທັງນີ້ກໍເພື່ອໃຫ້ຖຶກຕ້ອງຕາມການເກັບກໍາຂໍ້ມູນໄພພິບັດໃນປີຜ່ານມາ.

ບ້ານທີ່ໄດ້ຮັບຜົນກະທົບຈາກໄພພິບັດນ້ຳຖ້ວມໃນປີຜ່ານມາ ຢູ່ເມືອງວຽງພູຄາ ມີ 35 ບ້ານ, ມີ 737 ຄອບຄົວ, ມີ 4.150 ຄົນ, ຄອບຄົວທຸກຍາກ 11 ບ້ານ 116 ຄອບຄົວ ມີ 440 ຄົນ, ເດັກກໍາພ້າ 16 ບ້ານ ມີ 163 ຄົນ, ເດັກກໍາພອຍ 14 ບ້ານ ມີ 8 ຄົນ, ຜູ້ສູງອາຍຸ 17 ບ້ານ ມີ 98 ຄົນ ແລະ ຄົນພິການ 13 ບ້ານ ມີ 145 ຄົນ.

ໂອກາດດັ່ງກ່າວ, ທ່ານ ພູມອນ ຄຸນສີລິເຮືອງ ໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງ ມາຍັງລັດຖະບານ, ຄະນະຮັບຜິດຊອບໄພພິບັດຂັ້ນແຂວງ ທີ່ໄດ້ໃຫ້ການຊ່ວຍເຫລືອຕະຫລອດມາ ພ້ອມສັນຍາວ່າ ຈະນໍາໃຊ້ເຂົ້າສານຈໍານວນດັ່ງກ່າວນີ້, ໄປແຈກຢາຍໃຫ້ເກີດປະໂຫຍດສູງສຸດຕໍ່ກັບປະຊາຊົນທີ່ປະສົບບັດໄພພິບັດໃຫ້ຖືກຕ້ອງ, ມີຄວາມໂປ່ງໃສ, ຍຸຕິທໍາ ແລະ ໃຫ້ທົ່ວເຖິງຄອບຄົວເປົ້າໝາຍ.

ຂ່າວ-ພາບ: ຄໍາປິງ

ສະແດງຄຳຄິດເຫັນ