ໂລກຈັບຕາ ມະຫາອຳນາດແກ້ໄຂສົງຄາມການຄ້າ ‘ທຣຳ’ ພົບ ‘ສີ ຈິ້ນຜິງ’ ບັນຍາກາດອົບອຸ່ນຍິ້ມແຍ້ມແຈ່ມໃສສ່ອແສງຜ່ອນຄາຍຄວາມເຄັ່ງຕຶງ

ໂດນັລ ທຣຳ ຜູ້ນຳສະຫະລັດ ພົບປະຫາລືກັບສີ ຈິ້ນຜິງ ປະທານາທິບໍດີຈີນ ທີ່ສະໜາມບິນນານາຊາດກິມແຮ ນະຄອນປູຊານ ປະເທດເກົາຫຼີໃຕ້ ຫາລືນອກກອບການປະຊຸມເອເປັກ ໃນຊ່ວງເຊົ້າຂອງວັນທີ 30 ຕຸລາ ເວລາທ້ອງຖິ່ນ ຫຼັງຈາກພົບກັນແບບໜ້າຕໍ່ໜ້າ ຄັ້ງລ່າສຸດເມື່ອປະມານ 6 ປີກ່ອນ ຫຼືປີ 2019. ລ່າສຸດການຫາລືສຳເລັດລົງແລ້ວ ຫຼັງສົນທະນາກັນນານປະມານ 90 ນາທີ ຫຼືປະມານ 1 ຊົ່ວໂມງເຄິ່ງ. “ມັນຈະຕ້ອງເປັນການປະຊຸມທີ່ປະສົບຜົນສຳເລັດຢ່າງຫຼວງຫຼາຍ ຊະນິດທີ່ບໍ່ມີຂໍ້ສົງໄສເລີຍ” ທຣຳກ່າວ “ລາວ (ສີ ຈິ້ນຜິງ) ເປັນນັກເຈລະຈາຕໍ່ລອງທີ່ ຍາກທີ່ຈະຕໍ່ລອງ” ສີ ຈິ້ນຜິງ ກ່າວວ່າ ດີໃຈຫຼາຍທີ່ໄດ້ພົບທຣຳ”ຂ້າພະເຈົ້າຫວັງເປັນຢ່າງຍິ່ງວ່າຈະໄດ້ແລກປ່ຽນຄວາມຄິດເຫັນກ່ຽວກັບປະເດັນສຳຄັນສຳລັບທັງສອງປະເທດ” ປະທານາທິບໍດີຈີນກ່າວ.”ເປັນເລື່ອງທຳມະດາທີ່ຊາດມະຫາອຳນາດທະເລາະກັນບ້າງ ທີມເຈລະຈາບັນລຸຄວາມເຫັນດີພື້ນຖານທີ່ແກ້ໄຂຄວາມກັງວົນຫຼັກໆຂອງກັນແລະກັນແລ້ວ ຂ້າພະເຈົ້າຍິນດີທີ່ຈະເຮັດວຽກຮ່ວມກັບປະທານາທິບໍດີທຣຳຕໍ່ໄປ ເພື່ອວາງພື້ນຖານທີ່ໝັ້ນຄົງໃນຄວາມສຳພັນຈີນ-ສະຫະລັດ” ສີ ຈິ້ນຜິງກ່າວໃນການຫາລືດ້ານການຄ້າກັບທຣຳ ທີ່ນະຄອນປູຊານ ເກົາຫຼີໃຕ້.”ຂ້າພະເຈົ້າເຊື່ອໝັ້ນສະເໝີວ່າການພັດທະນາຂອງຈີນສອດຄ່ອງກັບວິໄສທັດຂອງທ່ານ ທີ່ຈະເຮັດໃຫ້ອາເມຣິກາກັບຄືນມາຍິ່ງໃຫຍ່ອີກຄັ້ງ (Make America Great Again)” ສີ ຈິ້ນຜິງກ່າວ.

ປະເດັນທີ່ຄາດວ່າຈະມີການຫາລື

1. ພາສີເຟັນທານິລ ທີ່ສະຫະລັດເກັບກັບຈີນ 20%
2. ະຫຍາຍດີລຢຸດຍິງອອກໄປ ຈາກທີ່ຈະໝົດອາຍຸວັນທີ 10 ພະຈິກນີ້
3. ແຮ່ຫາຍາກ ທີ່ສະຫະລັດຕ້ອງການໃຫ້ຈີນຊະລໍມາດຕະການຄຸ້ມເຂັ້ມການສົ່ງອອກ
4. ໄຕ້ຫວັນ ຈີນຕ້ອງການໃຫ້ສະຫະລັດສະແດງຈຸດຢືນ ເລືອກໃຊ້ຖ້ອຍຄຳ “ຄັດຄ້ານ” ການເອກະລາດຂອງໄຕ້ຫວັນ
5. ສົງຄາມຢູເຄຣນ ທຣຳຕ້ອງການໃຫ້ສີ ຈິ້ນຜິງໃຊ້ຄວາມສຳພັນກັບຣັດເຊຍ ເພື່ອໂນ້ມນ້າວໃຫ້ ‘ປູຕິນ’ ຢຸດຍຸຕິສົງຄາມໃນຢູເຄຣນ

ທັງສອງຝ່າຍຈັດທີມເຈລະຈາຢ່າງເຕັມທີ່ ຝ່າຍລະ 7 ຄົນ ລວມຜູ້ນຳ. ໂດຍຄະນະເຈລະຈາສະຫະລັດ ລວມມີ ສກັອດ ເບສເຊັນ ລັດຖະມົນຕີການເງິນສະຫະລັດ, ມາໂກ ຣູບິໂອ ລັດຖະມົນຕີການຕ່າງປະເທດ, ໂຮເວີດ ລຸດນິກ ລັດຖະມົນຕີການພານິດ, ຈາມີສັນ ເກຣຍ ຜູ້ແທນດ້ານການຄ້າ. ຄະນະເຈລະຈາຈີນລວມມີ ເຫີ ລີ່ເຟິງ ຮອງນາຍົກລັດຖະມົນຕີຈີນ, ຫວັງ ຢີ່ ລັດຖະມົນຕີການຕ່າງປະເທດຈີນ ຊຶ່ງເປັນມືຂວາດ້ານການຕ່າງປະເທດຂອງສີ ຈິ້ນຜິງ.

ເຫດຜົນໃນການເລືອກນະຄອນປູຊານ ທີ່ຊຸມຊົນໂລກລວມທັງຄົນໄທຄຸ້ນຫູເປັນຢ່າງດີ ເນື່ອງມາຈາກເຫດຜົນດ້ານຄວາມປອດໄພ. ໂດຍເມື່ອສຳເລັດການປະຊຸມ ຜູ້ນຳສະຫະລັດກັບປະເທດທັນທີ ຂະນະທີ່ສີ ຈິ້ນຜິງ ຫາກໍ່ເດີນທາງມາຮອດເພື່ອປະຊຸມເອເປັກ ມີກຳນົດກັບຈີນວັນເສົາ້ນີ້ (1 ພະຈິກ 2025). ທັງສອງຝ່າຍຈຶ່ງນັດຫາລືກັນທີ່ຫ້ອງຮັບຮອງຂອງສະໜາມບິນ.

ການເຈລະຈາລະຫວ່າງສອງຜູ້ນຳ ເກີດຂຶ້ນຕໍ່ຈາກທີ່ເບສເຊັນ ແລະຮອງນາຍົກລັດຖະມົນຕີເຫີ ລົງນາມໃນກອບການເຮັດວຽກວ່າດ້ວຍຂໍ້ຕົກລົງການຄ້າ ທີ່ສະຫະລັດຍົກເລີກການຂົ່ມຂູ່ເກັບພາສີອີກ 100% ແລະຈີນປ່ຽນມາຊື້ຖົ່ວເຫຼືອງຈາກສະຫະລັດຄັ້ງທຳອິດໃນໄລຍະນີ້ ຫຼັງຈາກຢຸດຊື້ເນື່ອງຈາກຄວາມເຄັ່ງຕຶງ.

ສະແດງຄຳຄິດເຫັນ