ຂປລ. ແຫລ່ງຂ່າວຈາກ ແຂວງອັດຕະປື ໃຫ້ຮູ້ວ່າ: ທ່ານ ກົງໃຈ ສີດາວົງ ຫົວໜ້າພະແນກກະສິກໍາ ແລະ ສິ່ງແວດລ້ອມ ແຂວງອັດຕະປື ພ້ອມຄະນະ ໄດ້ລົງເຄື່ອນໄຫວຕິດຕາມ ກວດກາໄພພິບັດ ຫລັງນ້ຳຖ້ວມ ຢູ່ເມືອງສະໜາມໄຊ ແຂວງອັດຕະປື ວັນທີ 31 ຕຸລາ 2025 ຜ່ານມາ ໂດຍມີຄະນະນຳຂັ້ນເມືອງ ແລະ ອໍານາດການປົກຄອງບ້ານເຂົ້າຮ່ວມ ທັງນີ້ກໍເພື່ອໃຫ້ຄວາມຊ່ວຍເຫລືອ ປະຊາຊົນຢ່າງທົ່ວເຖິງ ທີ່ໄດ້ຮັບຜົນກະທົບນ້ຳຖ້ວມ ພື້ນທີ່ກະສິກຳ ແລະ ເພື່ອວາງແຜນຟື້ນຟູຊີວິດຄວາມເປັນຢູ່ຂອງປະຊາຊົນ ໃຫ້ກັບຄືນສູ່ສະພາບປົກກະຕິໂດຍໄວ.

ທ່ານ ລືໄຊ ວຽງພະຈັນ ປະທານຄະນະກໍາມະການຄຸ້ມຄອງໄພພິບັດ ຂັ້ນເມືອງສະໜາມໄຊ ໄດ້ລາຍງານສະພາບໄພພິບັດນໍ້າຖ້ວມ ຢູ່ເມືອງສະໜາມໄຊ ວ່າ: ໃນໄລຍະ ວັນທີ 28 ຫາ 30 ຕຸລາ 2025 ໄດ້ເກີດມີຝົນຕົກໜັກຕິດຕໍ່ກັນຫລາຍມື້ ເຮັດໃຫ້ນ້ຳອັ່ງຖ້ວມສົ່ງຜົນກະທົບຕໍ່ຜົນຜະລິດກະສິກຳ ໂດຍສະເຂົ້ານາປີຂອງພໍ່ແມ່ປະຊາຊົນກຳລັງເກັບກ່ຽວຜົນຜະລິດ, ລວມມີ 21 ບ້ານ ທັງໝົດ 883 ຄອບຄົວ, ໃນເນື້ອທີ່ 675 ເຮັກຕາ ໃນນັ້ນ, ລຸ່ມເຂດປຸຍ-ອຸດົມສຸກ ມີ 11 ບ້ານ ຈໍານວນຄອບຄົວທີ່ຖືກຜົນກະທົບມີ 321 ຄອບຄົວ, ມີເນື້ອທີ່ຖືກນໍ້າຖ້ວມທັງໝົດ 163 ເຮັກຕາ, ເຂດເທສະບານເມືອງ ມີ 3 ບ້ານ ຈໍານວນຄອບຄົວທີ່ຖືກຜົນກະທົບມີ 91 ຄອບຄົວ, ມີເນື້ອທີ່ຖືກຖ້ວມ 53 ເຮັກຕາ, ເຂດຫາດຊາຍສູງ-ສົ້ມປ່ອຍ ມີ 7 ບ້ານ ຈໍານວນຄອບຄົວທີ່ຖືກຜົນກະທົບມີ 471 ຄອບຄົວ, ມີເນື້ອທີ່ຖືກຖ້ວມ 459 ເຮັກຕາ ລວມມູນຄ່າເສຍຫາຍປະມານ 16 ຕື້ກີບ.

ໂອກາດດັ່ງກ່າວ, ຄະນະນໍາຂັ້ນແຂວງ ແລະ ເມືອງ ໄດ້ລົງກວດກາພື້ນທີ່ຕົວຈິງ ພົບວ່າ ຫລັງນໍ້າຫລຸດລົງ ບາງຄອບຄົວ ຍັງພົບບັນຫາ ໂດຍສະເພາະ ຄວາມເສຍຫາຍຕໍ່ບ້ານເຮືອນ, ພື້ນທີ່ກະສິກຳ, ຖະໜົນຫົນທາງພາຍໃນບ້ານຖືກນໍ້າເຊາະເຈື່ອນ. ຕໍ່ບັນຫາດັ່ງກ່າວທາງພາກສ່ວນທີ່ກ່ຽວຂ້ອງ ຍັງໄດ້ໃຫ້ຄຳແນະນຳ ແກ່ກະສິກອນທີ່ໄດ້ຮັບຜົນກະທົບ ແລະ ພ້ອມທີ່ຈະຊ່ວຍກັນຟື້ນຟູຊີວິດການເປັນຢູ່ໃຫ້ກັບຄືນສູ່ສະພາບປົກກະຕິໂດຍໄວ.

ຂ່າວ-ພາບ: ສິດຕິພອນ

ສະແດງຄຳຄິດເຫັນ