ກຸ້ງນ້ຳຈືດ ທີ່ມີຂະໜາດ   ໃຫຍ່ ມີລົດຊາດທີ່ດີ ແລະ ລາຄາແພງ ຈັດເປັນສັດນ້ຳທີ່ມີ ຄວາມສຳຄັນທາງດ້ານເສດຖະກິດຊະນິດໜຶ່ງ ສາມາດນຳປຸງແຕ່ງເປັນອາຫານໄດ້ຫຼາກຫຼາຍເຊັ່ນ: ປີ້ງ, ຕົ້ມຍໍາ, ຕຳ, ທອດ, ອົບ ແລະ ອື່ນໆ, ຊຶ່ງໃນປັດຈຸບັນກຸ້ງກ້າມກາມເປັນທີ່ຕ້ອງການຂອງຕະຫຼາດໂດຍສະເພາະໃນ ສປປ ລາວ ແມ່ນຍັງບໍ່ທັນມີການລ້ຽງເປັນຈຳນວນ ຫຼາຍຈຶ່ງເຮັດໃຫ້ມີການນຳເຂົ້າຈາກປະເທດໃກ້ຄຽງ.

ດັ່ງນັ້ນ, ຈຶ່ງໄດ້ມີການສ້າງຄູ່ມືແນະນໍາວິທີການລ້ຽງກຸ້ງສະບັບນີ້ເພື່ອເປັນບົດຮຽນ, ປະສົບການ, ການຮຽນຮູ້, ທັກສະ ແລະ ສ້າງຄວາມເຂົ້າໃຈວິທີການລ້ຽງກຸ້ງກ້າມກາມໃຫ້ແກ່ຜູ້ທີ່ມີຄວາມສົນໃຈເພື່ອເປັນແນວທາງ,ໃນການປະກອບອາຊີບ ແລະ ສ້າງລາຍຮັບ.

ກຸ້ງກ້າມກາມເປັນກຸ້ງນ້ຳຈືດຊະນິດໜຶ່ງ ທີ່ອາໄສ ຢູ່ຕາມແມ່ນ້ຳ, ລຳຄອງທົ່ວໆໄປ ແຕ່ຖ້າຮອດລະດູປະສົມພັນ ພໍ່ພັນ-ແມ່ພັນ ກຸ້ງຈະໄດ້ປະສົມພັນແຫຼ່ງນ້ຳທຳມະຊາດປະສົມລະຫວ່າງນ້ຳຈືດ+ນ້ຳເຄັມ ເພື່ອວາງໄຂ່ ແລະ ລ້ຽງຕົວອ່ອນ.

■ການເລືອກສະຖານທີ່: ຄວນເປັນສະຖານທີ່ຢູ່ໃກ້ເສັ້ນທາງ, ມີໄຟຟ້າ, ແຫ່ງນ້ຳທີ່ມີຄຸນນະພາບດີ, ສະອາດ ແລະ ມີນ້ຳໄຫຼຕະຫຼອດປີ ບໍ່ຄວນຢູ່ໃກ້ໂຮງງານອຸດສາຫະກຳ ແລະ ໃກ້ຊຸມຊົນຫຼາຍເກີນໄປຖ້າຈະຂຸດໜອງ ຄວນເລືອກບ່ອນທີ່ເປັນດິນໜຽວເພື່ອເກັບຮັກສານ້ຳໄດ້ດີ ເນື້ອດິນ ບໍ່ຄວນເປັນດິນສົ້ມຈະເຮັດໃຫ້ນໍ້າເປັນກົດບໍ່ເໝາະສຳລັບການຈະເລີນເຕີບໂຕຂອງກຸ້ງ.

■ຮູບແບບໜອງ: ສ່ວນຫຼາຍແມ່ນເປັນຮູບສີຫຼ່ຽມ ເພາະສະດວກໃນການຈັດການຂະໜາດໜອງປະມານ 25×25 ແມັດ, ເລິກ 1 ແມັດ ຖ້າໜອງເລິກເກີນໄປຈະເຮັດໃຫ້ກຸ້ງຂາດອອກຊີເຈນໄດ້ ແຕ່ຖ້າໜອງຕື້ນເກີນໄປ ຈະເຮັດໃຫ້ແດດສ່ອງເຖິງພື້ນໜອງ ແລະ ເຮັດໃຫ້ນ້ຳຮ້ອນຈົນເກີນໄປ.

■ການກະກຽມໜອງ: ສູບນ້ຳອອກຈາກໜອງກ່ອນເພື່ອຂ້າເຊື້ອ ແລະ ທຳລາຍສັດຕູຂອງກຸ້ງ ເຊັ່ນ: ປາຄໍ່, ກົບ, ຂຽດ, ປູ ໂດຍໃຊ້ປູນຂາວ ຫຼື ກາກຊາ ຫວ່ານເພື່ອບໍ່ໃຫ້ມີສັດຕູກຸ້ງ ໂດຍສະເພາະປູໂຕນ້ອຍໆ ຊຶ່ງເປັນໂຕສຳຄັນໃນການຍາດອາຫານຂອງກຸ້ງ, ການຫວ່ານປູນຂາວແມ່ນໃຊ້ອັດຕາ 60-100 ກິໂລ/ໄລ່, ຫຼັງຈາກນັ້ນຕາກໜອງໄວ້ປະມານ 1-2 ອາທິດ ເພື່ອໝັ້ນໃຈວ່າສັດຕູຂອງກຸ້ງບໍ່ມີແລ້ວຫຼັງຈາກນັ້ນ ຈຶ່ງປ່ອຍນ້ຳເຂົ້າປົກກະຕິ.

■ການກຽມ: ຫຼັງຈາກສູບນ້ຳເຂົ້າໜອງແລ້ວຄວນປະໄວ້ປະມານ 2-3 ມື້ ເພື່ອເປັນການປັບສະພາບນ້ຳ, ທໍ່ລະບາຍນ້ຳຄວນອັດດ້ວຍດ່າງສີຟ້າ ເພື່ອປ້ອງກັນສັດຕູກຸ້ງປົນມານຳນ້ຳ, ຫຼັງຈາກນັ້ນກໍ່ໃຊ້ປຸ໋ຍ ສູດ 15-15-15 ໃນອັດຕາ 3 ກິໂລ/ໄລ່ ແລະ ປາປົ່ນປະສົມສຳລະອຽດສັດສ່ວນ 1:1 ອັດຕາ 3 ກິໂລ/ໄລ່ ໂດຍລະລາຍນໍ້າ ແລ້ວຈຶ່ງຫວ່ານໃຫ້ທົ່ວໜອງເພື່ອໃຫ້ເກີດມີອາຫານທຳມະຊາດເຊັ່ນ: ໄຮນ້ຳພືດ ແລະ ໄຮນໍ້າສັດ ໂດຍສັງເກດຈາກການປ່ຽນສີຂອງນ້ຳ (ສີອອກເຫຼືອງ ຫຼື ນ້ຳຕານ)

■ການເລືອກແນວພັນ: ຄວນເລືອກກຸ້ງທີ່ມີລັກສະນະແຂງແຮງສົມບູນ ລຳໂຕໃສ, ຂະໜາດໃກ້ຄຽງກັນ, ເປັນລູກກຸ້ງທີ່ມີອາຍຸຢ່າງໜ້ອຍ 20 ມື້, ຄວນມີການປັບສະພາບໃຫ້ກຸ້ງ ຢູ່ໃນນໍ້າຈືດຢ່າງນ້ອຍ 3 ມື້ ກ່ອນຈະນຳເອົາມາລ້ຽງໃນໜອງ.

■ຄຸນນະພາບທີ່ເໝາະສົມ: PH ແມ່ນ 7-8, ອອກຊີເຈນລະລາຍໃນນໍ້ DO ແມ່ນ: ບໍ່ຄວນຫຼຸດ 4 ອຸນຫະພູມທີ່ເໝາະສົມແມ່ນ:25-32 ອົງສາ.

■ການເຄື່ອນຍ້າຍ: ເວລາທີ່ດີ ແລະ ເໝາະສົມໃນການເຄື່ອນຍ້າຍກຸ້ງແມ່ນຕອນເຊົ້າມືດ ຫຼື ຕອນກາງຄືນ, ຄວາມໜາແໜ້ນແມ່ນ ປະມານ 1.000 ຫຼື 2.000 ໂຕ/ຖົງ ຂຶ້ນຢູ່ກັບຂະໜາດຂອງກຸ້ງ ແລະ ເສັ້ນທາງການເຄື່ອນຍ້າຍ.

■ອັດຕາການປ່ອຍ: ອັດຕາການປ່ອຍຈະມີ 3 ແບບຄື: 1. ລະດັບຄວາມໜາແໜ້ນໜ້ອຍປະມານ: 20.000 – 24.000 ໂຕ/ໄລ; 2. ລະດັບ ຄວາມໜາແໜ້ນປານກາງປະມານ: 75.000 – 80.000 ໂຕ/ໄລ່; 3. ລະດັບຄວາມໜາ  ແໜ້ນ ຫຼາຍປະມານ 150.000 – 200.000 ໂຕ/ໄລ່ ທຸກລະດັບຈະຕ້ອງມີເຄື່ອງຕີນໍ້າປະມານ 3-4 ເຄື່ອງເພື່ອເພີ່ມອອກຊີເຈນ ແລະ ຊ່ວຍໃຫ້ກຸ້ງມີອັດຕາການລອດຕາຍສູງ.

■ອາຫານ ແລະ ການໃຫ້ອາຫານ: ຄວນເປັນອາຫານຊະນິດເມັດຈົມນ້ຳ, ມີໂປຣຕີນບໍ່ຕ່ຳກວ່າ 30 ສ່ວນຮ້ອຍ, ອາຫານຄວນຢູ່ໃນນ້ຳໄດ້ຢ່າງໜ້ອຍ 4 ຊົ່ວໂມງ, ເນື່ອງຈາກກຸ້ງຈະກິນອາຫານໂດຍການໃຊ້ກ້າມໜີບເອົາອາຫານຖ້າອາຫານລະລາຍນ້ຳໄວ ຈະເຮັດໃຫ້ກຸ້ງໄດ້ຮັບອາຫານບໍ່ເຕັມທີ່, ການໃຫ້ອາຫານຄວນໃຫ້ 3 ຄັ້ງ/ມື້ ໃນໄລຍະ 3 ເດືອນທຳອິດ, ຫຼັງຈາກນັ້ນ ຄວນໃຫ້ 2 ຄັ້ງ/ມື້, ໃນປະລິມານເໝາະສົມບໍ່ຄວນໃຫ້ຫຼາຍຈົນເກີນໄປເພາະຈະເຮັດໃຫ້ນໍ້າເໜົ່າເສຍໄດ້ງ່າຍ ອັດຕາການໃຫ້ອາຫານແມ່ນ ປະມານ 3-5 ສ່ວນຮ້ອຍ ຕໍ່ນໍ້າໜັກໂຕ (ວິທີກວດສອບການກິນອາຫານຂອງກຸ້ງແມ່ນໃຊ້ກະດຸ້ງແລ້ວວາງອາຫານໃສ່ເພື່ອສະດວກໃນການດວກເບິ່ງການກິນອາຫານຂອງກຸ້ງ)

■ການປ່ຽນຖ່າຍນໍ້າ: ການປ່ຽນຖ່າຍແມ່ນຂຶ້ນກັບອາຍຸ ແລະ ຂະໜາດຂອງກຸ້ງ, ຖ້າມີການປ່ຽນຖ່າຍນ້ຳຈະຊ່ວຍໃຫ້ກຸ້ງມີການຈະເລີນເຕີບໂຕໄດ້ດີ ກຸ້ງເປັນສັດນ້ຳທີ່ຈະເລີນເຕີບໂຕດ້ວຍການລອກຄາບສໍາລັບກຸ້ງ 1-2 ເດືອນທໍາອິດ ບໍ່ຈຳເປັນປ່ຽນຖ່າຍນ້ຳແຕ່ຄວນເຕີມນ້ຳທຸກອາທິດ ເມື່ອກຸ້ງອາຍຸຮອດ 2 ເດືອນຂຶ້ນໄປ ຄວນປ່ຽນຖ່າຍນໍ້າເດືອນ ລະ 2-4 ຄັ້ງ, ຄັ້ງລະປະມານ 1/3 ຂຶ້ນຢູ່ກັບສະພາບນ້ຳໃນໜອງ ແລະ ໄລຍະປ່ຽນນໍ້າໃໝ່ກຸ້ງຈະລອກຄາບ ແລະ ບໍ່ກິນອາຫານຫຼາຍ ສະນັ້ນຄວນຫຼຸດປະລິມານອາຫານລົງໃນໄລຍະປ່ຽນຖ່າຍນໍ້າໃໝ່.

■ໄລຍະເວລາ: ເມື່ອລ້ຽງກຸ້ງໄດ້ປະມານ 6 ເດືອນກໍ່ເລີ່ມຄັດຂະໜາດ ແລະ ຈັບກຸ້ງຂາຍໄດ້ ໂດຍຫຼຸດປະລິມານນ້ຳໃນໜອງລົງເຫຼືອ ປະມານ 50 ຊັງຕີແມັດ, ແລ້ວໃຊ້ອວນ ຂະໜາດ 4 ຊັງຕີແມັດເພື່ອໃຫ້ກຸ້ງຂະໜາດນ້ອຍຫຼຸດອອກ  ຈາກອວນ ເພື່ອບໍ່ໃຫ້ກຸ້ງໂຕນ້ອຍໄດ້ຮັບຜົນກະທົບ ການຈັບກຸ້ງແມ່ນຄວນຈັບຕອນເຊົ້າ ປະມານ 6-7 ໂມງ, ເພາະອາກາດບໍ່ຮ້ອນຫຼາຍເກີນໄປຈະເຮັດໃຫ້ກຸ້ງມີຄວາມສ່ຽງໃນການຕາຍໜ້ອຍລົງ ແລະ ມີຄວາມແຂງແຮງອີກດ້ວຍ.

ຂໍ້ມູນ: ກົມລ້ຽງສັດ ແລະ ການປະມົງ

ສະແດງຄຳຄິດເຫັນ