ເມື່ອບໍ່ດົນມານີ້, ທີ່ກອງປະຊຸມຜູ້ແທນການທ່ອງທ່ຽວຂອງບັນດາປະເທດອາຊຽນ ທີ່ປະເທດມາເລເຊຍ ເປັນເຈົ້າພາບ ໄດ້ມີການຈັດພິທີມອບ-ຮັບລາງວັນມາດຕະຖານການທ່ອງທ່ຽວອາຊຽນຂຶ້ນ, ໃນນັ້ນ ແຂວງຫລວງພະບາງ ສາມາດຍາດໄດ້ທັງຫມົດ 8 ລາງວັນ ໃນ 3 ມາດຕະຖານການທ່ອງທ່ຽວ ຄື: ລາງວັນມາດຕະຖານຫ້ອງນ້ຳສາທາລະນະສະອາດອາຊຽນ 3 ລາງວັນ, ມາດຕະຖານການທ່ອງທ່ຽວແບບອະນຸລັກ ປະຊາຊົນມີສ່ວນຮ່ວມອາຊຽນ 2 ລາງວັນ ແລະ ມາດຕະຖານຮ້ານສະປາອາຊຽນ 3 ລາງວັນ. ໃນນີ້ ແມ່ນໄດ້ມອບ-ຮັບທີ່ປະເທດມາເລເຊຍ 6 ລາງວັນ, ສ່ວນອີກ 2 ລາງວັນ ແມ່ນຈະຈັດພິທີມອບ-ຮັບຢູ່ ສປປ ລາວ.

ແຂວງຫລວງພະບາງ ໄດ້ຈັດຕັ້ງປະຕິບັດມາດຕະຖານການທ່ອງທ່ຽວຂອງ ສປປ ລາວ, ອາຊຽນ ແລະ ຂອງສາກົນ ນັບແຕ່ປີ 2018 ເປັນຕົ້ນມາ ມີ 7 ມາດຕະຖານ ແລະ 1 ລາງວັນ ຄື: ມາດຕະຖານເມືອງທ່ອງທ່ຽວສະອາດອາຊຽນ, ມາດຕະຖານຫ້ອງນຳ້ສາທາລະນະສະອາດອາຊຽນ, ມາດຕະຖານການທ່ອງທ່ຽວແບບອະນຸລັກປະຊາຊົນມີສ່ວນຮ່ວມອາຊຽນ, ມາດຕະຖານເຮືອນພັກແຮມປະຊາຊົນອາຊຽນ, ມາດຕະຖານໂຮງແຮມຂຽວ ອາຊຽນ, ມາດຕະຖານສະຖານທີ່ຈັດງານ ແລະ ວາງສະແດງອາຊຽນ, ມາດຕະຖານຮ້ານສະປາອາຊຽນ ແລະ ລາງວັນການທ່ອງທ່ຽວແບບຍືນຍົງອາຊຽນ. ໃນໄລຍະຜ່ານມາແຂວງເຮົາສາມາດຍາດໄດ້ລາງວັນມາດຕະຖານການທ່ອງທ່ຽວທັງຫມົດມີ: ມາດຕະຖານການທ່ອງທ່ຽວລະດັບຊາດ 1 ລາງວັນ, ມາດຕະຖານການທ່ອງ ທ່ຽວລະດັບອາຊຽນ 71 ລາງວັນ ແລະ ໄດ້ຮັບລາງວັນ 100 ເລື່ອງລາວຂອງໂລກ ອີກ 1 ລາງວັນ.

ທັງຫມົດນີ້ ຖືເປັນຄວາມພາກພູມໃຈ ແລະ ເອກອ້າງຂອງຊາວຫລວງພະບາງ ທີ່ຈະເຮັດໃຫ້ນັກທ່ອງທ່ຽວທົ່ວໂລກໄດ້ຮູ້ຈັກຫລວງພະບາງເຮົາຫລາຍຂຶ້ນ ແລະ ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມຫລວງພະບາງໃຫ້ນັບມື້ນັບຫລາຍຂຶ້ນ.

ທີ່ມາ Lao National Radio

ສະແດງຄຳຄິດເຫັນ