ນັກຮັກສາສິດທິຂອງກຸ່ມຄົນຫຼາກຫຼາຍທາງເພດ (LGBT) ຮູ້ສຶກກັງວົນວ່າ ຄຳສັ່ງຂອງຝ່າຍບໍລິຫານທີ່ລົງນາມໂດຍປະທານາທິບໍດີດອນອັລດ໌ ທຣຳປ໌ ຂອງສະຫະລັດອາເມລິກາ ກ່ຽວກັບໂຄງການຄວາມຫຼາກຫຼາຍ, ບຸກຄົນຂ້າມເພດ, ແລະສິດທິຂອງກຸ່ມຜູ້ທີ່ມີຄວາມຫຼາກຫຼາຍທາງເພດນັ້ນ ເປັນເລື່ອງ “ອັນຕະລາຍ” ແລະອາດຈະຄຸກຄາມການເຮັດວຽກຂອງພວກເຂົາໃນປະເທດອື່ນໆ. ແຕ່ກຸ່ມອະນຸລັກນິຍົມກັບຮູ້ສຶກດີໃຈກັບຄວາມເຄື່ອນໄຫວດັ່ງກ່າວ, ແລະໄດ້ບອກ ວ່ານະໂຍບາຍດັ່ງກ່າວຂອງທຣຳປ໌ສາມາດຊ່ວຍປ່ຽນແປງການນຳໃຊ້ຊັບພະຍາກອນຕ່າງໆໄດ້.

ຄຳສັ່ງດັ່ງກ່າວທີ່ເອີ້ນວ່າ “ການປົກປ້ອງແມ່ຍິງຈາກອຸດົມການທາງເພດທີ່ສຸດຂົ້ວ, ແລະຟື້ນຟູຄວາມຈິງທາງຊີວະວິທະຍາໃຫ້ແກ່ລັດຖະບານກາງ” ປະກາດວ່າສະຫະລັດຯ ຮັບຮູ້ຢ່າງເປັນທາງການວ່າ ມີພຽງສອງເພດເທົ່ານັ້ນ, ຄື “ຊາຍ ແລະ ຍິງ”.

ການປະກາດນີ້ລະບຸວ່າພະນັກງານລັດຖະການທຸກຄົນທີ່ປະຕິບັດຫນ້າທີ່ຢ່າງເປັນທາງການຕ້ອງໃຊ້ຄໍາວ່າ “ເພດ” (sex) ບໍ່ແມ່ນຄໍາວ່າ “ເພດສະພາບ” (gender) ໃນນະໂຍບາຍແລະເອກະສານຕ່າງໆ. ໃນຂະນະທີ່ເອກະສານທາງການຕ່າງໆ, ລວມທັງປື້ມຜ່ານແດນ, ຄວນຖືກຕ້ອງຕາມເພດທີ່ຖືກບັນທຶກໄວ້ຕັ້ງແຕ່ເກີດ, ເຊິ່ງອະທິບາຍວ່າເປັນ “ການຈັດປະເພດທາງຊີວະວິທະຍາທີ່ບໍ່ປ່ຽນແປງຂອງບຸກຄົນ” ແລະຍືນຍັນອີກຄັ້ງວ່າຕ້ອງເປັນຊາຍຫຼືຍິງ.

ປະທານາທິບໍດີທຣຳປ໌ຍັງໄດ້ສັ່ງໃຫ້ພະນັກງານລັດຖະບານສະຫະລັດຯ ທຸກຄົນທີ່ເຮັດວຽກໃນໂຄງການຕາມນະໂຍບາຍ DEI (ຄວາມຫຼາກຫຼາຍ, ຄວາມສະເໝີພາບ, ແລະການລວມຄົນທຸກກຸ່ມ) ລາພັກໂດຍໄດ້ຮັບຄ່າຈ້າງທັນທີ, ກ່ອນທີ່ຫ້ອງການແລະໂຄງການດັ່ງກ່າວຈະຖືກປິດຕົວລົງ.

ແນວນະໂຍບາຍດັ່ງກ່າວຖືວ່າເປັນສິ່ງທີ່ກົງກັນຂ້າມກັບນະໂຍບາຍທີ່ກໍານົດຂຶ້ນພາຍໃຕ້ລັດຖະບານຂອງອະດີດປະທານາທິບໍດີໂຈ ໄບເດນ, ເຊິ່ງສະໜັບສະໜູນກົດໝາຍທີ່ຄຸ້ມຄອງພະນັກງານຈາກການຈໍາແນກປະພຶດຕາມອັດຕະລັກຂອງເພດຫຼືຄວາມມັກທາງເພດ. ໂຈ ໄບເດນ ເຄີຍສະເໜີການປ່ຽນແປງເພື່ອໃຫ້ພົນລະເມືອງສະຫະລັດຯ ສາມາດເລືອກໃຊ້ເຄື່ອງໝາຍ X ເປັນເຄື່ອງໝາຍລະບຸເພດໃນໃບສະໝັກປື້ມຜ່ານແດນ, ເປັນທາງເລືອກແທນການລະບຸເພດຊາຍຫຼືເພດຍິງ.

ສະແດງຄຳຄິດເຫັນ