ການມ້ຽນເຮືອນທຳຄວາມສະອາດບ້ານຊ່ວງກ່ອນງານບຸນກຸດຈີນ ເພື່ອກຽມຕ້ອນຮັບສິ່ງໃໝ່ໆ ເປັນກິດຈະກຳທີ່ຄົນທຸກຄົນປະຕິບັດກັນເປັນຢ່າງດີ. ນອກຈາກຈະເຮັດໃຫ້ບ້ານເຮືອນຊານສະອາດແລະສວຍງາມແລ້ວ, ຍັງເປັນໂອກາດໃນການດູແລສຸຂະພາບຂອງສະມາຊິກໃນຄອບຄົວດ້ວຍ, ຜ່ານທາງການກຳຈັດສິ່ງຂອງເຄື່ອງໃຊ້ເກົ່າໆທີ່ອາດຈະເປັນແຫຼ່ງສະສົມຂອງເຊື້ອພະຍາດ, ແລະນີ້ແມ່ນ 5 ສິ່ງທີ່ຄວນທຳລາຍໄປຖ້າຫາກມັນເກົ່າຫຼືຊຳລະລາຍ.

1. ໝອນແລະຕຸກກະຕາເກົ່າ
ໝອນແລະຕຸກກະຕາທີ່ໃຊ້ມາດົນ ອາດຈະສະສົມເຊື້ອພະຍາດຈາກເຫື່ອ, ຝຸ່ນ, ຫຼືເຊວຜິວຫນັງທີ່ຕາຍແລ້ວ, ເຊິ່ງອາດຈະເຮັດໃຫ້ເກີດບັນຫາດ້ານການນອນຫຼືການຫາຍໃຈ. ນອກຈາກນີ້, ໝອນທີ່ໃຊ້ມາດົນອາດຈະເສຍຮູບຊົງ ເຮັດໃຫ້ເກີດອາການປວດເມື່ອຍຕາມຮ່າງກາຍ.

2. ອຸປະກອນເຄື່ອງໃຊ້ໃນຄົວເຮືອນເກົ່າ
ເຄື່ອງໃຊ້ໃນຄົວເຮືອນທີ່ໃຊ້ມາດົນ, ເຊັ່ນ: ໝໍ້ທີ່ມີການສະສົມສານຕ່າງໆ, ຊາມທີ່ແຕກ, ຫຼືອຸປະກອນອື່ນໆທີ່ຂຶ້ນລາ, ສາມາດເຮັດໃຫ້ລົດຊາດອາຫານຫລຸດລົງ, ແລະຍັງອາດຈະນຳສານພິດເຂົ້າສູ່ຮ່າງກາຍໄດ້.

3. ເຄື່ອງສຳອາງທີ່ໝົດອາຍຸ
ເຄື່ອງສຳອາງມັກຈະມີອາຍຸການໃຊ້ງານຫຼັງຈາກເປີດໃຊ້ແລ້ວ ເຊັ່ນ: ລິບສະຕິກ, ຫຼືຄີມບຳລຸງຜິວ. ຖ້າຫາກໝົດອາຍຸແລ້ວອາດຈະເຮັດໃຫ້ສານເຄມີໃນຜະລິດຕະພັນປ່ຽນແປງ, ແລະເຮັດໃຫ້ເກີດການລະຄາຍເຄືອງຜິວຫນັງ.

4. ຜ້າເຊັດໂຕແລະແປງສີຟັນທີ່ໃຊ້ມາດົນ
ຜ້າເຊັດໂຕທີ່ໃຊ້ໄປດົນໆ ອາດຈະເປັນແຫຼ່ງສະສົມຂອງເຊື້ອພະຍາດ, ຄືກັນກັບແປງສີຟັນທີ່ໃຊ້ຈົນຂົນແປງຫຼຸດ ນີ້ແມ່ນເຫດຜົນທີ່ເຮັດໃຫ້ເກີດການຕິດເຊື້ອຫຼືບັນຫາສຸຂະພາບໃນຊ່ອງປາກ.

5. ອາຫານທີ່ເກັບໃນຕູ້ເຢັນດົນເກີນໄປແລະກ່ອງພາດສະຕິກເກົ່າ
ອາຫານທີ່ເກັບໄວ້ດົນເກີນໄປໃນຕູ້ເຢັນອາດຈະເຮັດໃຫ້ເກີດການເນົ່າເສຍ, ຫຼືເຮັດໃຫ້ເກີດອາຫານເປັນພິດ. ສ່ວນກ່ອງພາດສະຕິກເກົ່າທີ່ໃຊ້ມາດົນອາດຈະປ່ອຍສານພິດເຊັ່ນ BPA, ເຊິ່ງສາມາດເຮັດໃຫ້ເກີດອັນຕະລາຍຕໍ່ຮ່າງກາຍ.

ການໃຊ້ໂອກາດກຳຈັດທຳລາຍສິ່ງເຫຼົ່ານີ້ໃນຊ່ວງເທດສະການກຸດຈີນ ຈະຊ່ວຍໃຫ້ບ້ານສະອາດແລະປອດໄພຫຼາຍຂຶ້ນ, ພ້ອມທັງຊ່ວຍໃຫ້ສຸຂະພາບຂອງທຸກຄົນໃນຄອບຄົວດີຂຶ້ນດ້ວຍ.

ສະແດງຄຳຄິດເຫັນ