#ເຈົ້າໜ້າທີ່ກອງບັນຊາການ ປກສ ແຂວງໄຊສົມບູນ ສົມທົບພາກສ່ວນກ່ຽວຂ້ອງ ທຳສາຍສວນຝິ່ນເນື້ອທີ່ກວ່າ 1 ເຮັກຕ່າ.

 

ເພື່ອເປັນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ 2023-2025, ມາໃນວັນທີ 12 ກຸມພາ 2025 ຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕໍາຫຼວດ ລົງສົມທົບກັບພະແນກ ສະກັດກັ້ນ ແລະ ຄວບຄຸມຢາເສບຕິດ ປກສ ແຂວງ, ປກສ ເມືອງ, ກຳລັງປ້ອງກັນຊາດ ແລະ ພາກສ່ວນທີ່ກ່ຽວຂ້ອງ ຈຳນວນ 37 ສະຫາຍ ລົງເຄື່ອນໄຫວກວດກາ ແລະ ທໍາລາຍສວນຝິ່ນທີ່ປະຊາຊົນໄດ້ລັກລອບປູກຢູ່ຂອບເຂດບ້ານນ້ໍ້າຜານ້ອຍ ເມືອງລ້ອງແຈ້ງ ແຂວງໄຊສົມບູນ ເຊິ່ງມີເນື້ອທີ່ 1 ກວ່າເຮັກຕ້າ.

 

 

ພາຍໃຕ້ການນໍາພາຂອງ ທ່ານ ພັທ ດາລິນ ສຸດາຈັນ ຮອງຫົວໜ້າຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕໍາຫຼວດ, ວິທີການທໍາລາຍສວນຝິ່ນໃນຄັ້ງນີ້ແມ່ນໃຊ້ພ້າຖາງ, ໄມ້ຟາດ ແລະ ຫຼົກຕົ້ນອ່ອນຖິ້ມເພື່ອບໍ່ໃຫ້ສາມາດເກັບກ່ຽວເອົາຜົນລະປູກໄດ້ ພ້ອມທັງນຳເອົາຜູ້ລັກລອບປູກຝິ່ນມາສຶກສາອົບຮົມ-ກ່າວເຕືອນ ຊີ້ແຈ້ງ ສ້າງຮັບຮູ້-ເຂົ້າໃຈຕໍ່ແນວທາງຂອງພັກ-ລັດ ແລະ ຜົນຮ້າຍຂອງຢາເສບຕິດ;

 

 

ເຊິ່ງໃນໄລຍະຜ່ານມາພະແນກຄວບຄຸມ ແລະ ສະກັດກັ້ນຢາເສບຕິດ ປກສ ແຂວງ ໄດ້ເອົາໃຈໃສ່ລົງເຄື່ອນໄຫວໂຄສະນາ ໃຫ້ພໍ່ແມ່ປະຊາຊົນໄດ້ຮັບຮູ້ເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດ ໂດຍສະເພາະແມ່ນຢາຝິ່ນເຊິ່ງເປັນສານກະຕຸ້ນ ທີ່ອອກລິດຮຸນແຮງຕໍ່ລະບົບປະສາດ, ເປັນສານຕັ້ງຕົ້ນໃນການຜະລິດຢາເສບຕິດປະເພດ ຢາບ້າ, ເຮໂລອິນ ແລະ ສ່ວນປະສົມໃນການຜະລິດຢາປະເພດອື່ນໆ ທີ່ຜິດຕໍ່ລະບຽບກົດໝາຍ ທັງເປັນອັນຕະລາຍຕໍ່ສຸຂະພາບ ທັງເປັນສາເຫດທີ່ພາໃຫ້ເກີດມີປະກົດການຫຍໍ້ທໍ້ໃນສັງຄົມ ເປັນຕົ້ນ: ຂີ້ລັກງັດແງະ, ປຸ້ນຈີ້ຊິງຊັບ, ຂ້າເຈົ້້າເອົາຂອງ ແລະ ອື່ນໆ.

 

 

ນອກນັ້ນ, ຮຽກຮ້ອງມາຍັງທຸກພາກສ່ວນໃນສັງຄົມ ເປັນເຈົ້າການຊ່ວຍກັນໃນການຕ້ານ ແລະ ສະກັດກັ້ນບັນຫາດັ່ງກ່າວ ໃຫ້ຫຼຸດໜ້ອຍຖອຍລົງ ແລະ ໝົດໄປຈາກສັງຄົມ.

ຂ່າວ: ປກສ ແຂວງໄຊສົມບູນ

ສະແດງຄຳຄິດເຫັນ