ເວລາ 1:10 ໂມງ ຂອງວັນທີ 4 ມີນາ 2025,​ ເກີດເຫດໄຟໄໝ້ ຮ້ານຂາຍເຄື່ອງຢູ່ດ້ານຂ້າງຕະຫຼາດໃໝ່ປາກເຊ​ (ຕະຫຼາດດາວເຮືອງ) ນະຄອນປາກເຊ, ແຂວງຈໍາປາ ສັກ.

ທ່ານ ກໍລະນີ ເທບໄກສອນ ຫົວໜ້າຫ້ອງການບໍລິຫານ ບໍລິສັດ ບໍລິການ​ ການຄ້າ​ປາກເຊ​ ຜູ້ຊີ້ນໍາວຽກງານຮັກສາ ຄວາມສະຫງົບ ແລະ ຄວາມເປັນລະບຽບຮຽບຮ້ອຍຕະຫຼາດໃໝ່ປາກເຊ ໃຫ້ຂໍ້ມູນວ່າ: ເວລາປະມານ 1:10 ໂມງ ໄດ້ເກີດເຫດການໄຟໄໝ້ ເຮືອນຫ້ອງແຖວ ສອງຊັ້ນ ຢູ່ຂ້າງຕະຫຼາດ ດ້ານໜ້າ ແປະກັບເສັ້ນທາງໃຫຍ່ ຈາກສະ ໜາມກິລາ ໄປຫາວົງວຽນປາຄ່າດ້ານຂ້າງຕິດກັບທາງເຂົ້າຕະຫຼາດ (ບໍ່ແມ່ນຂອບ ເຂດຕະຫຼາດ ແຕ່ມີພື້ນທີ່ເຊື່ອມຕໍ່ກັບຕະຫຼາດ).

ເມື່ອເກີດເຫດ, ເວລາ 1:20 ໂມງ, ຄະນະຮັບຜິດຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງຕະຫຼາດ ພ້ອມຄະນະບໍລິຫານ ແລະ​ ພະນັກງານປ້ອງກັນ,​ ພະນັກງານຈັດສັນຕະຫຼາດ ລວມ 38 ສະຫາຍ ໄດ້ຮ່ວມກັນເຮັດໜ້າທີ່​ ຄື: ຊ່ວຍເຄື້ອນຍ້າຍລົດຈັກອອກຈາກຮ້ານບ່ອນໃກ້ກັບຫ້ອງແຖວທີ່ເກີດໄຟໄໝ້,​ ຊ່ວຍສະກັດກັ້ນບໍ່ໃຫ້ຄົນເຂົ້າໃນສະຖານທີ່ເກີດເຫດ,​ ຊ່ວຍເຈົ້າໜ້າທີ່ມອດໄຟ ແລະ ສະກັດກັ້ນບໍ່ໃຫ້ໄຟລາມໄປຈຸດອື່ນ.​

ພ້ອມນີ້​ ໄດ້ນໍາລົດດັບເພີງ 1 ຄັນ ແລະ ລົດສະແຕກນໍ້າ 1 ຄັນ ຂອງບໍລິສັດ​ ບໍລິ ການ​ ການຄ້າ​ ປາກເຊ​ ເຂົ້າຮ່ວມໃນການແກ້ໄຂ. ເຮັດໃຫ້ສາມາດມອດໄຟໄດ້ໂດຍພື້ນຖານໃນເວລາ 5.​20 ໂມງ.​ ສ່ວນຜົນເສຍຫາຍລະອຽດ ເຈົ້າໜ້າທີ່ຍັງເກັບກໍາຂໍ້ມູນ, ແຕ່ຂໍ້ມູນເບື້ອງຕົ້ນພົບເຫັນຫ້ອງແຖວທີ່ຖືກໄໝ້ໜົດ 1 ຫ້ອງ , ຖືກໄຟລວກ​ ແລະ​ ໄໝ້ເລັກນ້ອຍ 4 ຫ້ອງ.​ ສໍາລັບ​ສາເຫດໄຟໄໝ້ຄັ້ງນີ້​ ຍັງຢູ່ໃນຂັ້ນຕອນການສືບສວນສອບສວນຂອງເຈົ້າໜ້າທີ່.​

ຂ່າວ​: ທູນທອງໃຈ

ສະແດງຄຳຄິດເຫັນ