ພູເຂົາໄຟຄັນລາອອນ ປະທຸເມື່ອເຊົ້າວັນອັງຄານ ປ່ອຍເຖົ່າຖ່ານພຸ່ງຂຶ້ນສູ່ທ້ອງຟ້າສູງເຖິງ 4,000 ແມັດ

ພູເຂົາໄຟຄັນລາອອນ ເຊິ່ງຕັ້ງຢູ່ເທິງເກາະເນກຣອສ ທາງຕອນກາງຂອງປະເທດຟີລິບປິນ ໄດ້ເກີດການປະທຸຄັ້ງໃຫຍ່ໃນຊ່ວງເຊົ້າຂອງວັນອັງຄານ ໂດຍພົ່ນເຖົ່າຖ່ານ ແລະ ຄວັນໜາທຶບພຸ່ງຂຶ້ນສູ່ຊັ້ນບັນຍາກາດສູງເຖິງ 4,000 ແມັດ ຫຼື ປະມານ 2.4 ໄມລ໌

ເຖິງຈະຍັງບໍ່ມີລາຍງານຜູ້ບາດເຈັບ ຫຼື ເສຍຊີວິດຈາກເຫດລະເບີດໃນຄັ້ງນີ້ ແຕ່ເຫດການໄດ້ສ້າງຄວາມກັງວົນດ້ານສຸຂະພາບແກ່ປະຊາຊົນພື້ນທີ່ໂດຍຮອບ ເນື່ອງຈາກເຖົ່າຖ່ານຈາກພູເຂົາໄຟໄດ້ຕົກລົງສູ່ໝູ່ບ້ານໃກ້ຄຽງ

ຂະນະນີ້ພູເຂົາໄຟຄັນລາອອນໄດ້ຖືກຍົກລະດັບການເຕືອນໄພຂຶ້ນເປັນລະດັບ 3 ຈາກທັງໝົດ 5 ລະດັບ ໂດຍລະດັບ 5 ຖືເປັນລະດັບສູງສຸດ ເຊິ່ງໝາຍເຖິງການລະເບີດຄັ້ງໃຫຍ່ທີ່ອາດເກີດຂຶ້ນຢ່າງຕໍ່ເນື່ອງແລະຮຸນແຮງ

ພູເຂົາໄຟລູກນີ້ມີຄວາມສູງ 2,435 ແມັດ ແລະ ຈັດຢູ່ໃນກຸ່ມພູເຂົາໄຟທີ່ຍັງຄຸກຮຸ່ນຢູ່ຈຳນວນ 24 ລູກທົ່ວປະເທດຟີລິບປິນ ໂດຍກ່ອນໜ້ານີ້ມັນເຄີຍປະທຸເມື່ອເດືອນຕຸລາທີ່ຜ່ານມາ ເຊິ່ງໃນຄັ້ງນັ້ນເຮັດໃຫ້ຊາວບ້ານຫຼາຍຮ້ອຍຄົນຕ້ອງອົບພະຍົບໄປຍັງສູນພັກພິງສຸກເສີນ

ຟີລິບປິນຕັ້ງຢູ່ໃນບໍລິເວນທີ່ຮຽກວ່າ “ວົງແຫວນແຫ່ງໄຟແປຊິຟິກ” ເຊິ່ງເປັນພູມິພາກທີ່ມີແນວໂນ້ມເກີດແຜ່ນດິນໄຫວ ແລະ ການລະເບີດຂອງພູເຂົາໄຟບ່ອຍຄັ້ງ ນອກຈາກນີ້, ປະເທດຍັງປະເຊີນກັບພາຍຸ ແລະ ໄຕ້ຝຸ່ນປະມານ 20 ລູກຕໍ່ປີ ເຮັດໃຫ້ຟີລິບປິນຖືເປັນໜຶ່ງໃນປະເທດທີ່ມີຄວາມສ່ຽງຕໍ່ໄພທຳມະຊາດຫຼາຍທີ່ສຸດໃນໂລກ.

ສະແດງຄຳຄິດເຫັນ