ສະຫະລັດອາເມລິກາ 9 ເມສາ – ບໍລິສັດເຕັກໂນໂລຢີ ຊີວະພາບໃນສະຫະລັດອະເມລິກາອ້າງວ່າປະສົບຜົນສຳເລັດໃນການຟື້ນຄືນຊີບ ‘ໝາປ່າໄດຣ໌ວູລຟ໌’ (Dire Wolves) ໝາປ່າສາຍພັນໜຶ່ງຊຶ່ງສູນພັນໄປແລ້ວຕັ້ງແຕ່ເມື່ອ 12,500 ປີກ່ອນ

 

ໂຄລອສຊອລ ໄບໂອໄຊແອນເຊສ (Colossal Biosciences) ບໍລິສັດດ້ານເຕັກໂນໂລຊີຊີວະພາບໃນສະຫະລັດອ້າງວ່າບໍລິສັດຯ ສາມາດຄືນຊີບ ‘ໝາປ່າໄດຣ໌ວູລຟ໌’ (Dire Wolves) ໝາປ່າສາຍພັນໜຶ່ງຊຶ່ງສູນພັນໄປແລ້ວຕັ້ງແຕ່ເມື່ອ 10,000 ປີກ່ອນ ໃຫ້ກັບມາມີຊີວິດອີກຄັ້ງ ໂດຍໝາປ່າທີ່ຜ່ານການດັດແປງພັນທຸກຳ 3 ໂຕ ກຳລັງເຕີບໃຫຍ່ໃນສະຖານທີ່ປອດໄພທີ່ບໍ່ເປີດເຜີຍໃນສະຫະລັດ

 

 

ໂດຍນັກວິທະຍາສາດຂອງ ໂຄລອສຊອລ ໄບໂອໄຊແອນເຊສ ໄດ້ຮຽນຮູ້ກ່ຽວກັບລັກສະນະສະເພາະທີ່ໝາປ່າໄດຣ໌ວູລຟ໌ ໂດຍກວດສອບດີເອັນເອໂບຮານຈາກຟອສຊິລ ແລະ ສຶກສາແຂ້ວໝາປ່າໄດຣ໌ວູລຟ໌ອາຍຸ 13,000 ປີ ທີ່ຂຸດພົບໃນລັດໂອໄຮໂອຂອງສະຫະລັດ ແລະ ຊິ້ນສ່ວນກະດູກຫູຊັ້ນໃນຂອງໝາປ່າອາຍຸ 72,000 ປີ ທີ່ພົບໃນລັດໄອດາໂຮເຊັ່ນກັນ ຊຶ່ງທັງສອງຊິ້ນຖືກເກັບຮັກສາໄວ້ທີ່ພິພິທະພັນປະຫວັດສາດທຳມະຊາດ

 

ຈາກນັ້ນ ນັກວິທະຍາສາດໄດ້ນຳເຊວເມັດເລືອດຈາກໝາປ່າສີເທົາທີ່ຍັງມີຊີວິດ ມາຜ່ານຂະບວນການ ຊີອາຣ໌ໄອເອສພີອາຣ໌ (CRISPR) ເພື່ອດັດແປງພັນທຸກຳໃນ 20 ຄັ້ງ ພວກເຂົາຖ່າຍໂອນສານພັນທຸກຳນັ້ນໄປຍັງເຊວໄຂ່ຂອງໝາບ້ານ

 

ເມື່ອພ້ອມແລ້ວ ຕົວອ່ອນຈະຖືກຖ່າຍໂອນໄປຍັງໝາຕົວແທນ ລວມເຖິງໝາບ້ານດ້ວຍ ແລະ 62 ວັນຕໍ່ມາ ລູກໝາທີ່ດັດແປງພັນທຸກຳກໍ່ຖືກຳເນີດ ເປັນຕົວຜູ້ 2 ໂຕ ເກີດເມື່ອວັນທີ 1 ຕຸລາ 2024 ຊື່ ໂຣມູລັສ (Romulus) ແລະ ເຣມຸສ (Remus)

 

ພີ່ນ້ອງຝາແຝດທີ່ເຊື່ອວ່າກັນວ່າເປັນຜູ້ກໍ່ຕັ້ງກຸງໂຣມ ແລະ ຖືກລ້ຽງໂດຍໝາປ່າ ແລະ ຕົວແມ່ 1 ໂຕ ທີ່ເກີດເມື່ອວັນທີ 30 ມັງກອນ 2025 ຊື່ ຄາລີຊີ (Khaleesi) ລູກໝາປ່າທັງໝົດມີຂົນສີຂາວ ຂາກັມໄກເປັນມັດ ແລະ ມີນ້ຳໜັກປະມານ 36 ກິໂລກຣາມແລ້ວ ໂດຍມີແນວໂນ້ມທີ່ຈະມີນ້ຳໜັກເຖິງ 63 ກິໂລກຣາມເມື່ອໃຫຍ່ເຕັມໄວ

 

 

ຜູ້ຊ່ຽວຊານດ້ານການດູແລສັດຂອງ ໂຄລອສຊອລ ໄບໂອໄຊແອນເຊສ ກ່າວວ່າ ເຖິງແມ່ນວ່າລູກໝາອາດມີຮູບຮ່າງໜ້າຕາຄ້າຍກັບໝາປ່າໄດຣ໌ວູລຟ໌ທີ່ຍັງເດັກ ແຕ່ສິ່ງທີ່ພວກມັນຄົງບໍ່ມີວັນໄດ້ຮຽນຮູ້ກໍ່ຄືການຂ້າສັດທີ່ມີຂະໜາດໃຫຍ່ ເພາະພວກມັນຈະບໍ່ມີໂອກາດໄດ້ເບິ່ງ ແລະ ຮຽນຮູ້ຈາກພໍ່ແມ່ໝາປ່າໄດຣ໌ວູລຟ໌ໃນປ່າ

 

ເຖິງຢ່າງໃດກໍ່ຕາມ, ຄໍຣີ ແບລດຊໍ ສາດສະດາຈານດ້ານນິເວດວິທະຍາ ຈາກມະຫາວິທະຍາໄລຟລິນເດີສ໌ ໃນອົສຕຣາລີ ຍັງສະແດງຄວາມກັງຂາໃນເລື່ອງນີ້ ໂດຍລະບຸວ່າເປັນໄປບໍ່ໄດ້ເລີຍທີ່ຈະດັດແປງຂໍ້ມູນທາງພັນທຸກຳທັງໝົດຂອງສັດທີ່ສູນພັນໄປແລ້ວນັບໝື່ນປີ ເນື່ອງມາຈາກຫຼາຍປັດໄຈ ລວມເຖິງດີເອັນເອທີ່ນ່າຈະສູນສະຫຼາຍຈົນບໍ່ສາມາດສະກັດນຳອອກມາໃຊ້ງານໄດ້ອີກ

 

ກ່ອນໜ້ານີ້ ໂຄລອສຊອລ ໄບໂອໄຊແອນເຊສ ຊຶ່ງກໍ່ຕັ້ງບໍລິສັດຕັ້ງແຕ່ປີ 2021 ໄດ້ປະກາດໂຄງການທີ່ຄ້າຍກັນນີ້ ເພື່ອດັດແປງພັນທຸກຳເຊວຈາກສະປີຊີສ໌ທີ່ມີຊີວິດ ເພື່ອສ້າງສັດທີ່ຄ້າຍກັບແມມມອທຂົນຟູ ນົກໂດໂດ ແລະ ສັດອື່ນໆ ທີ່ສູນພັນໄປແລ້ວ.

ສະແດງຄຳຄິດເຫັນ