ລັດຖະບານຮ່ອງກົງປະກາດລະງັບບໍລິການຮັບສົ່ງພັດສະດຸທາງໄປສະນີໄປຍັງສະຫະລັດຯ ໂດຍມີຜົນທັນທີ

 

ນັບເປັນມາດຕະການໂຕ້ກັບລ່າສຸດທ່າມກາງສົງຄາມການຄ້າລະຫວ່າງສະຫະລັດຯ ແລະ ຈີນ ທີ່ທະວີຄວາມຕຶງຄຽດຂຶ້ນຢ່າງຕໍ່ເນື່ອງ.

 

ຖະແລງການຈາກລັດຖະບານທີ່ເຜີຍແຜ່ໃນວັນນີ້ (16 ເມສາ) ລະບຸວ່າ ການຕັດສິນໃຈຄັ້ງນີ້ເປັນຜົນຈາກຄຳສັ່ງຂອງປະທານາທິບໍດີໂດນັລດ໌ ທຣຳ ທີ່ຍົກເລີກຂໍ້ຍົກເວັ້ນພາສີນຳເຂົ້າທີ່ຮຽກວ່າ de minimis ຊຶ່ງເດີມໃຊ້ກັບພັດສະດຸຕ່າງປະເທດທີ່ມີມູນຄ່າບໍ່ເກີນ 800 ໂດລາສະຫະລັດ.

 

ໂດຍລະບຸວ່າມາດຕະການດັ່ງກ່າວເປັນການໃຊ້ອຳນາດຢ່າງບໍ່ເປັນທຳ ແລະ ຂົ່ມເຫັງປະເທດອື່ນ.

 

ສະຫະລັດຯ ໃຊ້ມາດຕະການທີ່ບໍ່ສົມເຫດສົມຜົນ, ຂົ່ມຂູ່ ແລະ ເຮັດກັບສິນຄ້າພາສີຢ່າງໄຮ້ຄວາມຍຸຕິທຳ ພ້ອມເຕືອນປະຊາຊົນວ່າ ອາດຕ້ອງແບກຮັບພາລະຄ່າຈັດສົ່ງທີ່ສູງລິ່ວຈາກມາດຕະການກົດດັນຂອງສະຫະລັດຯ.

 

ພາຍໃຕ້ມາດຕະການໃໝ່ນີ້ ບໍລິສັດໄປສະນີຮ່ອງກົງ (Hongkong Post) ຈະຢຸດຮັບພັດສະດຸທາງເຮືອທັນທີ ແລະ ຈະຢຸດຮັບພັດສະດຸທາງອາກາດຕັ້ງແຕ່ວັນທີ 27 ເມສາເປັນຕົ້ນໄປ

 

ເຖິງຢ່າງໃດກໍຕາມ, ເອກະສານຫຼືຈົດໝາຍທີ່ບໍ່ແມ່ນພັດສະດຸຍັງສາມາດສົ່ງໄດ້ຕາມປົກກະຕິ.

 

ການລະງັບບໍລິການດັ່ງກ່າວໝາຍຄວາມວ່າບຸກຄົນທົ່ວໄປ ແລະ ພາກທຸລະກິດໃນຮ່ອງກົງຈະຕ້ອງຫັນໄປພຶ່ງບໍລິການຂົນສົ່ງເອກະຊົນ ເຊັ່ນ: FedEx ແລະ DHL ຊຶ່ງຈະເຮັດໃຫ້ຕົ້ນທຶນເພີ່ມສູງຂຶ້ນຈາກພາສີ-ອາກອນຂອງສະຫະລັດຯ ທີ່ກຳລັງມີຜົນບັງຄັບໃຊ້.

 

ເມື່ອຕົ້ນເດືອນເມສາທີ່ຜ່ານມາ, ທຣຳໄດ້ລົງນາມໃນຄຳສັ່ງຝ່າຍບໍລິຫານ ເພີ່ມອັດຕາພາສີສິນຄ້ານຳເຂົ້າທີ່ມີມູນຄ່າບໍ່ເກີນ 800 ໂດລາຈາກຈີນ ແລະ ຮ່ອງກົງ ໂດຍອ້າງວ່າຂໍ້ຍົກເວັ້ນເດີມຖືກໃຊ້ເພື່ອຫຼີກລ່ຽງພາສີນຳເຂົ້າ ແລະ ການກວດສອບອາກອນ.

 

ເດີມທີມາດຕະການນີ້ຈະເຮັດໃຫ້ພັດສະດຸເຫຼົ່ານີ້ຕ້ອງເສຍພາສີ 30% ຕັ້ງແຕ່ວັນທີ 2 ພຶດສະພາ ແຕ່ຄຳສັ່ງລ່າສຸດຂອງທຣຳໃນສັບປະດາທີ່ຜ່ານມາກັບເພີ່ມອັດຕາເປັນ 120% ຫຼື ຄິດເປັນຄ່າທຳນຽມຕໍ່ຊິ້ນ 100 ໂດລາ ແລະ ຈະເພີ່ມເປັນ 200 ໂດລາ ໃນວັນທີ 1 ມິຖຸນາ.

 

ຮ່ອງກົງ, ຊຶ່ງເຄີຍເປັນສູນກາງການຄ້າເສລີລະດັບໂລກ ທີ່ບໍ່ມີພາສີຂາຍ ແລະ ມີພາສີນຳເຂົ້າໃນລະດັບຕ່ຳ, ເຄີຍໄດ້ຮັບສະຖານະທາງການຄ້າພິເສດຈາກສະຫະລັດຯ ຊຶ່ງເອື້ອໃຫ້ສິນຄ້າໄດ້ຮັບພາສີຕ່ຳກວ່າປົກກະຕິ ແລະ ມີຂັ້ນຕອນທາງສຸລະກອນແຍກຈາກຈີນແຜ່ນດິນໃຫຍ່.

 

ເຖິງຢ່າງໃດກໍຕາມ, ສະຖານະພິເສດດັ່ງກ່າວຖືກຖອນຖອນໃນປີ 2020 ລະຫວ່າງການດຳລົງຕຳແໜ່ງຂອງທຣຳ ທ່າມກາງຂໍ້ກັງວົນກ່ຽວກັບເສລີພາບທີ່ເສື່ອມຖອຍລົງພາຍຫຼັງການບັງຄັບໃຊ້ກົດໝາຍຄວາມໝັ້ນຄົງແຫ່ງຊາດໃນຮ່ອງກົງໂດຍລັດຖະບານປັກກິ່ງ.

 

ໃນຂະນະທີ່ຄວາມຕຶງຄຽດລະຫວ່າງສະຫະລັດຯ ກັບຈີນທະວີຄວາມຮຸນແຮງຂຶ້ນ, ຮ່ອງກົງກໍຕົກຢູ່ໃນວົງລ້ອມຂອງຄວາມຂັດແຍ້ງ ໂດຍຕ້ອງປະເຊີນກັບພາສີ 145% ເຊັ່ນດຽວກັບທີ່ໃຊ້ກັບສິນຄ້າຈາກຈີນ ເຖິງແມ່ນວ່າຮ່ອງກົງຈະຍັງບໍ່ໃຊ້ມາດຕະການພາສີຕອບໂຕ້ 125% ກັບສິນຄ້າສະຫະລັດຯ ກໍຕາມ.

 

ຈອນ ລີ ຜູ້ບໍລິຫານສູງສຸດຂອງຮ່ອງກົງ ໄດ້ແຖລງຕອບໂຕ້ສະຫະລັດຯ ຢ່າງເຂັ້ມຂຸ້ນເມື່ອວັນອັງຄານທີ່ຜ່ານມາວ່າ ການປາບປາມຂອງສະຫະລັດຯ ຕໍ່ຈີນ ແລະ ຮ່ອງກົງເຂົ້າສູ່ພາວະບ້າຄັ່ງແລ້ວ.

 

ພວກເຂົາໃຊ້ນະໂຍບາຍການຄ້າເປັນອາວຸດ ດ້ວຍການເຮັດກັບພາສີຕອບໂຕ້ທີ່ບໍ່ເປັນທຳ 145% ຕໍ່ຮ່ອງກົງ.

 

ນີ້ເປັນຫຼັກຖານຊັດເຈນວ່າສະຫະລັດຯ ເຕັມໄປດ້ວຍອະຄະຕິ ແລະ ເຜີຍໃຫ້ເຫັນທາດແທ້ຂອງຄວາມເປັນເຈົ້າໂລກທີ່ພວກເຂົາອ້າງ.

ສະແດງຄຳຄິດເຫັນ