ເນປີດໍ 21 ເມສາ. – ລັດຖະບານທະຫານມຽນມາກຽມວາງຜັງເມືອງນະຄອນເນປີດໍໃໝ່ ຫຼັງຈາກໄດ້ຮັບຄວາມເສຍຫາຍຢ່າງໜັກຈາກແຜ່ນດິນໄຫວ ຈົນຫຼາຍກະຊວງຕ້ອງຍ້າຍສຳນັກງານໄປນະຄອນຢ່າງກຸ້ງຊົ່ວຄາວ

 

ລັດຖະບານທະຫານມຽນມາກຽມວາງຜັງເມືອງຂອງນະຄອນເນປີດໍໃໝ່ ຫຼັງເກີດແຜ່ນດິນໄຫວຮຸນແຮງຂະໜາດ 7.7 ເມື່ອທ້າຍເດືອນມີນາ.

 

ສ້າງຄວາມເສຍຫາຍຕໍ່ອາຄານບ້ານເຮືອນໃນຫຼາຍພື້ນທີ່ຂອງປະເທດ ລວມເຖິງໃນເມືອງຫຼວງແຫ່ງນີ້ດ້ວຍ.

 

ອາຄານສຳນັກງານຕ່າງໆ ຂອງລັດຖະບານໃນນະຄອນເນປີດໍກວ່າ 70% ເສຍຫາຍຈາກແຜ່ນດິນໄຫວຄັ້ງລ່າສຸດ ລວມເຖິງອາຄານກະຊວງແຮງງານ ກະຊວງການວາງແຜນ ແລະ ສານສະຫະພາບ.

 

ພົນເອກອາວຸໂສມິນ ອ່ອງ ຫຼ່າຍ ຜູ້ນຳລັດຖະບານທະຫານມຽນມາ ກ່າວວ່າ ອາຄານທີ່ພັງຖະຫຼົ່ມລົງມາລະຫວ່າງເກີດແຜ່ນດິນໄຫວນັ້ນ ໄດ້ຮັບຜົນກະທົບໜັກຫຼາຍເນື່ອງຈາກສ້າງເທິງຊັ້ນດິນອ່ອນ (soft soil).

 

ຂະນະທີ່ອາຄານສຳນັກງານຕ່າງໆ ຈະຖືກສ້າງໃໝ່ ແລະ ຕ້ອງທົນຕໍ່ແຜ່ນດິນໄຫວທີ່ຈະເກີດຂຶ້ນໃນອະນາຄົດ ໂດຍຈະມີການທົດສອບຊັ້ນດິນກ່ອນສ້າງດ້ວຍ.

 

ນະຄອນເນປີດໍ ເປັນເມືອງທີ່ຖືກສ້າງຂຶ້ນມາໃໝ່ໃນປີ 2005 ຈາກເດີມທີ່ເປັນທີ່ພຽງທຳມະດາ ແລະ ມຽນມາກໍບໍ່ເຄີຍເປີດເຜີຍເຫດຜົນທີ່ຊັດເຈນໃນການຍ້າຍເມືອງຫຼວງຈາກນະຄອນຢ່າງກຸ້ງ ເຊິ່ງເປັນເມືອງໃຫຍ່ທີ່ສຸດຂອງປະເທດ ມາຍັງນະຄອນເນປີດໍແຫ່ງນີ້.

 

ຄາດວ່າ ການສ້ອມແປງນະຄອນເນປີດໍຈາກຄວາມເສຍຫາຍທີ່ເກີດເພາະແຜ່ນດິນໄຫວອາດໃຊ້ເວລາຫຼາຍປີ ເຮັດໃຫ້ກະຊວງຕ່າງປະເທດ ແລະ ກະຊວງການທ່ອງທ່ຽວ ຕັດສິນໃຈຍ້າຍສຳນັກງານໄປຍັງນະຄອນຢ່າງກຸ້ງ ທີ່ຢູ່ຫ່າງອອກໄປ 366 ກິໂລແມັດແລ້ວ ຂະນະທີ່ໜ່ວຍງານອື່ນໆ ຍ້າຍສຳນັກງານໄປຍັງໂຖງກາງແຈ້ງຊຶ່ງສ້າງຈາກໂຄງເຫຼັກ.

 

ແຜ່ນດິນໄຫວຮຸນແຮງເມື່ອວັນທີ 28 ມີນາ ກໍ່ໃຫ້ເກີດແຮງສັ່ນສະເທືອນຮຸນແຮງໄປໄກເຖິງປະເທດໄທ ແລະ ຈີນ ເຮັດໃຫ້ມີຜູ້ເສຍຊີວິດໃນມຽນມາຫຼາຍກວ່າ 3,500 ຄົນ ບາດເຈັບອີກກວ່າ 5 ພັນຄົນ.

 

ສະແດງຄຳຄິດເຫັນ