ເກົາຫຼີໃຕ້ເລັ່ງປາບປາມການປອມແປງສິນຄ້າຕ່າງປະເທດ ສວມປ້າຍເປັນສິນຄ້າຜະລິດຈາກເກົາຫຼີ ເພື່ອຫຼີກລ່ຽງພາສີຂອງສະຫະລັດ ໂດຍສ່ວນໃຫຍ່ເປັນສິນຄ້າທີ່ມາຈາກຈີນ

 

ໜ່ວຍງານພາສີອາກອນເກົາຫຼີໃຕ້ ເປີດເຜີຍເມື່ອວັນຈັນທີ 21 ເມສາ ວ່າຈາກການສືບສວນພິເສດໄດ້ກວດພົບການລະເມີດແຫຼ່ງກຳເນີດສິນຄ້າມູນຄ່າລວມ 29.5 ພັນລ້ານວອນ.

 

ໃນໄຕມາດທຳອິດຂອງປີນີ້ ໂດຍ 97% ຂອງການລະເມີດດັ່ງກ່າວກ່ຽວຂ້ອງກັບການສົ່ງອອກສິນຄ້າໄປຍັງສະຫະລັດ

 

ໂດຍເມື່ອປຽບທຽບກັບທັງປີ 2024 ທີ່ຜ່ານມານັ້ນ ມີມູນຄ່າການລະເມີດລວມຢູ່ທີ່ 34.8 ພັນລ້ານວອນ, ຊຶ່ງໃນຈຳນວນນີ້ 62% ເປັນສິນຄ້າທີ່ສົ່ງອອກໄປຍັງສະຫະລັດຯ ເຈົ້າໜ້າທີ່ເກົາຫຼີໃຕ້ລະບຸວ່າ ອາດມີຄວາມພະຍາຍາມເພີ່ມຂຶ້ນຈາກບໍລິສັດຕ່າງຊາດໂດຍສະເພາະຈາກຈີນ ທີ່ພະຍາຍາມໃຊ້ເກົາຫຼີໃຕ້ ຊຶ່ງເປັນພັນທະມິດສຳຄັນຂອງສະຫະລັດຯ ແລະ ມີຂໍ້ຕົກລົງການຄ້າເສລີກັບສະຫະລັດຯ ເພື່ອເປັນຊ່ອງທາງລຽບພາສີ ແລະ ຂໍ້ຈຳກັດຕ່າງໆ ຫຼັງຈາກທີ່ທຣຳໄດ້ເລີ່ມກຳນົດອັດຕາພາສີສູງກັບສິນຄ້າຫຼາຍປະເພດ ແລະ ປະເທດຕ່າງໆ ຊຶ່ງເລີ່ມມີຜົນບັງຄັບໃຊ້ໃນເດືອນມີນາ

 

ໂດຍໃນເດືອນນີ້ ທຣຳໄດ້ກຳນົດພາສີ 25% ກັບເກົາຫຼີໃຕ້ ກ່ອນຈະລະງັບໄວ້ກ່ອນເປັນເວລາ 3 ເດືອນ ຂະນະດຽວກັນສະຫະລັດຯ ໄດ້ຂຶ້ນພາສີກັບຈີນສູງເຖິງ 145% ຈາກການຕອບໂຕ້ກັນໄປມາລະຫວ່າງສອງປະເທດ ຊຶ່ງນັກເສດຖະສາດຊີ້ວ່າການຕອບໂຕ້ດັ່ງກ່າວໄດ້ກະທົບຄວາມສຳພັນທາງການຄ້າລະຫວ່າງ 2 ປະເທດທີ່ເສດຖະກິດໃຫຍ່ທີ່ສຸດໃນໂລກຢ່າງຮຸນແຮງ

 

ທັງນີ້ ຜົນການສອບສວນລ່າສຸດພົບວ່າ ມີວັດສະດຸ ແຄໂທດ ຊຶ່ງເປັນສ່ວນປະກອບສຳຄັນໃນແບັດເຕີຣີແບບລິເທຍມໄອອອນ ມູນຄ່າ 3.3 ພັນລ້ານວອນ ຖືກນຳເຂົ້າຈາກຈີນແລະສົ່ງອອກໄປຍັງສະຫະລັດຯ ໂດຍປອມແປງວ່າເປັນສິນຄ້າຈາກເກົາຫຼີໃຕ້ ເພື່ອຫຼີກລ່ຽງພາສີທີ່ມີຢູ່ກ່ອນແລ້ວຕັ້ງແຕ່ເດືອນມັງກອນ ກ່ອນທີ່ນະໂຍບາຍພາສີຂອງທຣຳຈະເລີ່ມມີຜົນບັງຄັບໃຊ້

 

ນອກຈາກນີ້ໃນເດືອນມີນາ ພົບວ່າມີກ້ອງວົງຈອນປິດມູນຄ່າ 19.3 ພັນລ້ານວອນ ຖືກນຳເຂົ້າຈາກຈີນໃນຮູບແບບຊິ້ນສ່ວນ ແລ້ວນຳມາປະກອບໃໝ່ໃນເກົາຫຼີໃຕ້ເພື່ອຫຼີກລ່ຽງຂໍ້ຈຳກັດຂອງສະຫະລັດ ຕໍ່ອຸປະກອນສື່ສານຈາກຈີນ ຊຶ່ງລ່າສຸດທາງພາສີອາກອນເກົາຫຼີໃຕ້ ໄດ້ຈັດຕັ້ງທີມສະເພາະກິດເພື່ອກວດສອບ ແລະ ປ້ອງກັນການສົ່ງອອກທີ່ຜິດກົດໝາຍ ແລະ ມີແຜນຈະຈັດທຳມາດຕະການຕອບສະໜອງທີ່ຊັດເຈນຍິ່ງຂຶ້ນເພື່ອປົກປ້ອງບໍລິສັດໃນປະເທດແລ້ວ.

ສະແດງຄຳຄິດເຫັນ