ພາຮັລກາມ 24 ເມສາ – ອິນເດຍປິດເມືອງພາຮັລກາມ (Pahalgam) ໃນລັດຈັມມູ ແລະ ແຄຊເມຍ ທາງຕາເວັນຕົກສຽງເໜືອຂອງປະເທດ ເປັນມື້ທີ 2 ຕິດຕໍ່ກັນໃນມື້ນີ້ ຫຼັງເກີດເຫດກຸ່ມຄົນຖືປືນຍິງນັກທ່ອງທ່ຽວເສຍຊີວິດ 26 ຄົນ ບາດເຈັບ 17 ຄົນ ເມື່ອວັນອັງຄານທີ 22 ເມສາ

 

ຄຳສັ່ງປິດເມືອງມີຂຶ້ນຕັ້ງແຕ່ມື້ວານນີ້ ເຮັດໃຫ້ບັນຍາກາດທັງເມືອງງຽບເຫງົາ ໂຮງຮຽນ ສະຖານສຶກສາ ໂຮງແຮມ ແລະ ຮ້ານຄ້າຕ່າງໆ ປິດບໍລິການ ຖະໜົນຫົນທາງປາສະຈາກພາຫະນະສັນຈອນ ຫຼັງເກີດເຫດການທີ່ອິນເດຍລະບຸວ່າເປັນການກໍ່ການຮ້າຍ ແລະ ເປັນການໂຈມຕີພົນລະເຮືອນຄັ້ງຮ້າຍແຮງທີ່ສຸດໃນອິນເດຍໃນຮອບເກືອບ 2 ທົດສະວັດ ໂດຍໃນຊ່ວງທີ່ເກີດເຫດມີນັກທ່ອງທ່ຽວປະມານ 1,000 ຄົນ ແລະ ຜູ້ໃຫ້ບໍລິການໃນທ້ອງຖິ່ນປະມານ 300 ຄົນ ຢູ່ໃນຮ່ອມພູໄບຊາຣານ (Baisaran Valley) ທີ່ມີທົ່ງຫຍ້າຢູ່ເທິງຍອດພູຂຽວ ລ້ອມຮອບໄປດ້ວຍປ່າສົນ ສວຍງາມຈົນໄດ້ສະຖານະວ່າ ມິນິສະວິດເຊີແລນ

 

 

ທາງການອິນເດຍຍັງໄດ້ປະກາດມາດຕະການຫຼາຍຢ່າງເມື່ອວານນີ້ເພື່ອຫຼຸດລະດັບຄວາມສຳພັນກັບປາກີສະຖານ ເຊັ່ນ: ລະງັບການໃຊ້ສົນທິສັນຍາແມ່ນ້ຳສິນທຸປີ 1960 (Indus Waters Treaty) ທີ່ກຳນົດການໃຊ້ແມ່ນ້ຳຮ່ວມກັນ.

 

ຊຶ່ງຈະເຮັດໃຫ້ປາກີສະຖານທີ່ຢູ່ປາຍນ້ຳໄດ້ຮັບຜົນກະທົບ ເນື່ອງຈາກຕ້ອງໃຊ້ນ້ຳໃນການຜະລິດໄຟຟ້າພະລັງນ້ຳ ແລະ ການຊົນລະປະທານ ນອກຈາກນີ້ອິນເດຍຍັງໄດ້ປິດດ່ານຂ້າມແດນທາງບົກລະຫວ່າງ 2 ປະເທດທີ່ມີຢູ່ພຽງແຫ່ງດຽວ ແລະ ກຳນົດໃຫ້ຜູ້ທີ່ຂ້າມມາໃນອິນເດຍແລ້ວຕ້ອງກັບອອກໄປກ່ອນວັນທີ 1 ພຶດສະພາ.

 

ປະກາດໃຫ້ທີ່ປຶກສາດ້ານປ້ອງກັນປະເທດທັງໝົດໃນຄະນະພັກໃຫຍ່ປາກີສະຖານປະຈຳອິນເດຍເປັນບຸກຄົນບໍ່ພຶງປາຖະໜາ ແລະ ຕ້ອງອອກຈາກອິນເດຍພາຍໃນ 1 ອາທິດ ຂະນະດຽວກັນອິນເດຍຈະຮຽກຕົວຄະນະທີ່ປຶກສາດ້ານປ້ອງກັນປະເທດໃນປາກີສະຖານກັບປະເທດ ແລະ ຫຼຸດຈຳນວນຄະນະພັກໃຫຍ່ອິນເດຍປະຈຳປາກີສະຖານຈາກ 55 ຄົນ ລົງເຫຼືອ 30 ຄົນ.

ນາຍົກລັດຖະມົນຕີນະເຣນທຣາ ໂມດີຂອງອິນເດຍໄດ້ເອີ້ນປະຊຸມທຸກພັກການເມືອງ ລວມທັງພັກຝ່າຍຄ້ານໃນມື້ນີ້ ເພື່ອແຈ້ງໃຫ້ຮູ້ເຖິງມາດຕະການທີ່ລັດຖະບານໄດ້ດຳເນີນການ ໃນຂະນະທີ່ນາຍົກລັດຖະມົນຕີເຊບາສ ຊາຣິຟຂອງປາກິດສະຖານໄດ້ເອີ້ນປະຊຸມຄະນະກຳມະການຄວາມໝັ້ນຄົງແຫ່ງຊາດໃນຕອນເຊົ້າຂອງມື້ນີ້ ຫຼັງຈາກອິນເດຍປະກາດມາດຕະການຕໍ່ປາກິດສະຖານ.

ສະແດງຄຳຄິດເຫັນ