ອັນໂຕນິໂອ ຣືດິເກີ ກອງຫຼັງ ເຣອັນ ມາດຣິດ ອອກມາຂໍໂທດຜູ້ຕັດສິນ ຣິກາໂດ້ ເດ ບູກອສ ເບນໂກເອັດເຊຍ ຫຼັງຈາກໂດນໃບແດງໄລ່ອອກຈາກສະໜາມໃນເກມ ໂກປາ ເດນ ເຣ ຮອບຊິງຊະນະເລີດ ທີ່ “ຣາຊັນຊຸດຂາວ” ພ່າຍ ບາເຊໂລນາ ພ້ອມຍອມຮັບວ່າເປັນການກະທຳທີ່ຜິດພາດ ແລະ ອາດຈະໂດນແບນເປັນເວລາດົນ.

ອັນໂຕນິໂອ ຣືດິເກີ ປາການຫຼັງ ເຣອັນ ມາດຣິດ ອອກມາຂໍໂທດ ຣິກາໂດ້ ເດ ບູກອສ ເບນໂກເອັດເຊຍ ຜູ້ຕັດສິນຊາວສະເປນ ຈາກກໍລະນີສະແດງພຶດຕິກຳທີ່ບໍ່ເໝາະສົມໃນຊ່ວງທ້າຍເກມ ໂກປາ ເດນ ເຣ ຮອບຊິງຊະນະເລີດ ນັດທີ່ “ຣາຊັນຊຸດຂາວ” ແພ້ ບາເຊໂລນາ 2-3 ໃນຊ່ວງຕໍ່ເວລາພິເສດ ເມື່ອວັນເສົາທີ 26 ເມ.ຍ. ທີ່ຜ່ານມາ.

ຣືດິເກີ ໂດນໃບແດງໂທດຖານທີ່ປາຂອງໃສ່ ເບນໂກເອັດເຊຍ ຫຼັງຈາກໂດນປ່ຽນອອກໄປແລ້ວ, ໃນຂະນະທີ່ກຳມະການກໍຂຽນໃນລາຍງານໄປດ້ວຍວ່າອີກຝ່າຍປາຂອງໃສ່ຕົນ ແຕ່ບໍ່ໄດ້ໂດນຕົວເອງ. ດ້ານ ກາເດນາ ເຊ ສື່ຂອງສະເປນ ລາຍງານວ່າ ກອງຫຼັງທີມຊາດເຢຍລະມັນ ມີໂອກາດໂດນແບນ 4-12 ເກມ.

ຫຼ້າສຸດ ຣືດິເກີ ໂພສຂໍ້ຄວາມລົງສື່ອອນລາຍ ເມື່ອວັນອາທິດທີ 27 ເມ.ຍ. ວ່າ “ແນ່ນອນມັນບໍ່ມີຂໍ້ແກ້ຕົວກັບພຶດຕິກຳຂອງຂ້ອຍເມື່ອຄືນນີ້ ຂ້ອຍຂໍໂທດຢ່າງຍິ່ງກັບເລື່ອງນີ້ ພວກເຮົາເລັ່ນກັນໄດ້ດີຫຼາຍໆ ຕັ້ງແຕ່ເຄິ່ງຫຼັງ”

“ຫຼັງຈາກ 111 ນາທີ ຂ້ອຍບໍ່ສາມາດຊ່ວຍທີມໄດ້ອີກ ແລະ ກ່ອນເປົ່ານົກຫວີດໝົດເວລາຂ້ອຍກໍໄດ້ເຮັດສິ່ງຜິດພາດ ຂໍໂທດອີກຄັ້ງກັບຜູ້ຕັດສິນ ແລະ ທຸກຄົນທີ່ຂ້ອຍເຮັດໃຫ້ຮູ້ສຶກຜິດຫວັງເມື່ອຄືນນີ້” ຣືດິເກີ ກ່າວທິ້ງທ້າຍ.

ສະແດງຄຳຄິດເຫັນ