ມັດເຕໂອ ໂມເຣັດໂຕ້ ນັກຂ່າວຊື່ດັງເປີດເຜີຍວ່າ ຊາບີ ອາລອນໂຊ່ ໃກ້ຈະບັນລຸຂໍ້ຕົກລົງຍ້າຍໄປຄຸມເຣອັລ ມາດຣິດ ໃນຊ່ວງລະດູຮ້ອນນີ້ ພ້ອມກຽມແຈ້ງໄບເອີ ເລເວີຄູເຊັນ ເລື່ອງການອຳລາ ຫຼັງຈາກມີຂ່າວວ່າ ຄາໂລ ອັນເຊລັອດຕີ ກຽມອຳລາທີມຣາຊັນຊຸດຂາວຫຼັງຈົບລະດູການ 2024/25

ຊາບີ ອາລອນໂຊ່ ໂຄ້ຊຂອງໄບເອີ ເລເວີຄູເຊັນ ກຽມທີ່ຈະແຈ້ງໃຫ້ສະໂມສອນຮູ້ໃນອີກບໍ່ເທົ່າໃດມື້ຕໍ່ຈາກນີ້ວ່າ ລາວຢາກໄປຄຸມເຣອັລ ມາດຣິດ ໃນຊ່ວງລະດູຮ້ອນນີ້ ຕາມລາຍງານຂອງມັດເຕໂອ ໂມເຣັດໂຕ້ ນັກຂ່າວຈາກເຣເລໂບ ສື່ຊື່ດັງຂອງສະເປນ

ເວົ້າກັນວ່າ ອາລອນໂຊ່ ເປັນທີ່ສົນໃຈຂອງບອດບໍລິຫານ ມາດຣິດ ມາພັກໃຫຍ່ແລ້ວ ໂດຍສະເພາະຊ່ວງລະດູຮ້ອນປີກ່ອນທີ່ກະແສຂ່າວລະຫວ່າງທັງສອງຝ່າຍຮຸນແຮງຫຼາຍໆ ແຕ່ສຸດທ້າຍ ອາລອນໂຊ່ ກໍເລືອກທີ່ຈະຄຸມ “ຫ້າງຂາຍຢາ” ຕໍ່ໄປ

ເຖິງຢ່າງໃດກໍຕາມ ຊ່ວງບໍ່ເທົ່າໃດມື້ມານີ້ຂ່າວລະຫວ່າງ ອາລອນໂຊ່ ກັບ ມາດຣິດ ຮຸນແຮງຫຼາຍຂຶ້ນ ທ່າມກາງລາຍງານທີ່ລະບຸວ່າ ຄາໂລ ອັນເຊລັອດຕີ ໂຄ້ຊຄົນປັດຈຸບັນຂອງ “ຣາຊັນຊຸດຂາວ” ຈະແຍກທາງກັບທີມຫຼັງຈົບລະດູການນີ້ ພາຍຫຼັງຜົນງານຂອງລາວກັບ ມາດຣິດ ບໍ່ດີເທົ່າທີ່ຄວນ

ໂມເຣັດໂຕ້ ບອກອີກວ່າ ມັນເຫຼືອອີກພຽງກ້າວດຽວເທົ່ານັ້ນ ກ່ອນທີ່ ອາລອນໂຊ່ ກັບ ມາດຣິດ ຈະບັນລຸຂໍ້ຕົກລົງຮ່ວມກັນໄດ້ ໂດຍເດີມທີ ອາລອນໂຊ່ ຍັງເຫຼືອສັນຍາກັບ ເລເວີຄູເຊັນ ຈົນເຖິງຊ່ວງລະດູຮ້ອນປີໜ້າ

ສະແດງຄຳຄິດເຫັນ