Google ອາດຈະປະເຊີນກັບສະຖານະການທີ່ຕ້ອງໄດ້ຂາຍເວັບບຣາວເຊີ Chrome ເຊິ່ງເປັນເຄື່ອງມືທ່ອງເວັບທີ່ຄົນຫຼາຍລ້ານຄົນໃຊ້ທຸກມື້. ສາມບໍລິສັດຍັກໃຫຍ່ໃນວົງການເຕັກໂນໂລຊີໃຫ້ຄວາມສົນໃຈຖ້າ Google ຖືກບັງຄັບໃຫ້ຂາຍ Chrome ຈາກຄະດີຕ້ານການຜູກຂາດທີ່ກຳລັງດຳເນີນຢູ່.

ທ່າມກາງຄະດີຕ້ານການຜູກຂາດທີ່ກຳລັງດຳເນີນຢູ່ກັບ Google, ຂໍ້ມູນໃໝ່ເປີດເຜີຍວ່າ ມີສາມບໍລິສັດໃນວົງການເຕັກໂນໂລຊີຍິນດີທີ່ຈະຊື້ Google Chrome ຖ້າ Google ຖືກບັງຄັບໃຫ້ຂາຍບຣາວເຊີນີ້ຈິງ.

ບໍລິສັດທຳອິດທີ່ສົນໃຈຄື OpenAI ເຊິ່ງເປັນຄູ່ແຂ່ງລາຍໃຫຍ່ທີ່ສຸດຂອງ Google ໃນດ້ານ AI. ຕາມລາຍງານຂອງສຳນັກຂ່າວ Reuters ໃນຕົ້ນອາທິດນີ້, ຜູ້ບໍລິຫານຂອງ OpenAI ສົນໃຈຊື້ Chrome ແລະ ຍັງເພີ່ມເຕີມວ່າ OpenAI ເຄີຍຍື່ນຂໍ້ສະເໜີໃຫ້ກັບ Google ກ່ຽວກັບການໃຊ້ປະໂຫຍດຈາກເຕັກໂນໂລຊີການຄົ້ນຫາຂອງ Google ພາຍໃນ ChatGPT ເຊິ່ງເປັນຂໍ້ສະເໜີທີ່ Google ປະຕິເສດ. ອີເມລຈາກ OpenAI ເຖິງ Google ລະບຸວ່າ ການໃຊ້ API ຂອງ Google ຈະຊ່ວຍໃຫ້ສາມາດນຳສະເໜີຜະລິດຕະພັນທີ່ດີຂຶ້ນແກ່ຜູ້ໃຊ້ໄດ້.

ຕໍ່ມາ Perplexity ເປີດເຜີຍວ່າສົນໃຈທີ່ຈະຊື້ Chrome ຕາມລາຍງານຂອງ The Verge ເຊິ່ງມີ ດິມິທຣີ ເຊເວເລນໂກ ຈາກ Perplexity ກ່າວວ່າ ພວກເຂົາສາມາດບໍລິຫານ Chromium ໃນລະດັບດຽວກັນກັບ Google ໂດຍບໍ່ຫຼຸດຄຸນນະພາບຫຼືຄິດຄ່າບໍລິການການໃຊ້ງານ.

ສຸດທ້າຍ, ມີການເປີດເຜີຍວ່າ Yahoo ກໍເປັນອີກໜຶ່ງລາຍທີ່ສົນໃຈຊື້ Chrome ເຊັ່ນກັນ ເນື່ອງຈາກມີລາຍງານວ່າ Yahoo ກຳລັງດຳເນີນການກ່ຽວກັບໂຄງການເວັບບຣາວເຊີຂອງຕົນເອງ. ໄບຣອັນ ໂພຣວອສທ໌ ຜູ້ຈັດການທົ່ວໄປຝ່າຍ Yahoo Search ກ່າວວ່າ ການຊື້ Chrome ຈະໄວກວ່າໃນແງ່ຂອງການເພີ່ມຂະໜາດ ແລະ ເສີມວ່າ Chrome ນັ້ນເປັນຜູ້ຫຼິ້ນເຊີງກົນລະຍຸດທີ່ສຳຄັນທີ່ສຸດບົນເວັບ ແລະ ປະເມີນວ່າສ່ວນແບ່ງຕະຫຼາດເສີຊເອນຈິນຂອງ Yahoo ອາດພຸ່ງຂຶ້ນເປັນ “ຕົວເລກສອງຫຼັກ” ຖ້າໄດ້ Chrome ມາບໍລິຫານ.

ຂໍ້ມູນຂ່າວ: https://9to5google.com/2025/04/25/google-chrome-openai-perplexity-yahoo-antitrust-case/

ສະແດງຄຳຄິດເຫັນ