ຊີອີໂອ Google ຢືນຢັນວ່າ Google ຈະນຳ Gemini ມາໃຫ້ບໍລິການໃນ iPhone ຂອງ Apple ຢ່າງເປັນທາງການໃນຊ່ວງທ້າຍປີນີ້

ສຳນັກຂ່າວ The Verge ລາຍງານວ່າ Google ໃກ້ຈະບັນລຸຂໍ້ຕົກລົງກັບ Apple ໃນການນຳ Gemini ເຊິ່ງເປັນໂມເດລປັນຍາປະດິດ (AI) ມາຜະນວກເປັນສ່ວນໜຶ່ງໃນການໃຫ້ບໍລິການປັນຍາປະດິດໃນ iPhone. ໃນລະຫວ່າງການພິຈາລະນາຄະດີກ່ຽວກັບການຜູກຂາດຕະຫຼາດການຄົ້ນຫາເມື່ອວັນພຸດທີ່ຜ່ານມາ, ຊຸນດາ ພິຊາຍ ຊີອີໂອຂອງ Google ໄດ້ຢືນຢັນວ່າບໍລິສັດໜ້າຈະບັນລຸຂໍ້ຕົກລົງໃນການນຳ Gemini ກັບ Apple ໃນຊ່ວງກາງປີນີ້ ແລະ ຄາດວ່າຈະພ້ອມໃຫ້ບໍລິການໃນຊ່ວງທ້າຍປີ 2025

ຂໍ້ຕົກລົງໃນຄັ້ງນີ້ຄາດວ່າຈະເຮັດໃຫ້ Siri ລະບົບຜູ້ຊ່ວຍຂອງ Apple ສາມາດເອີ້ນໃຊ້ Gemini ເພື່ອຊ່ວຍຕອບຄຳຖາມທີ່ຊັບຊ້ອນຫຼາຍຂຶ້ນໄດ້, ຄ້າຍກັບການຜະນວກລວມທີ່ Apple ໄດ້ເຮັດໄປແລ້ວກັບ ChatGPT ຂອງ OpenAI

ກ່ອນໜ້ານີ້, ເຄຣກ ເຟເດຣິກີ ຮອງປະທານອາວຸໂສຂອງ Apple ເຄີຍກ່າວເຖິງແຜນການນຳ Gemini ມາໃສ່ໃນຟີເຈີ Apple Intelligence ເມື່ອເດືອນມິຖຸນາປີທີ່ແລ້ວ ຕອນທີ່ບໍລິການ AI ຂອງ Apple ເປີດຕົວຄັ້ງທຳອິດ, ໂດຍກ່າວວ່າ “ພວກເຮົາຕ້ອງການໃຫ້ຜູ້ໃຊ້ສາມາດເລືອກໂມເດລທີ່ຕ້ອງການໄດ້ໃນທ້າຍທີ່ສຸດ, ອາດຈະເປັນ Google Gemini ໃນອະນາຄົດ”

ຂໍ້ມູນຫຼ້າສຸດນີ້ເປັນການຕອບຄຳຖາມຂອງເວໂຣນິກາ ອອນເຢມາ ທະນາຍຄວາມຈາກກະຊວງຍຸຕິທຳສະຫະລັດໃນລະຫວ່າງການພິຈາລະນາຄະດີ. ພິຊາຍຕອບວ່າ “ຖືກຕ້ອງ” ເມື່ອຖືກຖາມກ່ຽວກັບແຜນການເຫຼົ່ານີ້. ທັງນີ້, ຊີອີໂອຂອງ Google ຍັງກ່າວດ້ວຍວ່າໄດ້ພົບກັບທິມ ຄຸກ ຊີອີໂອຂອງ Apple ເພື່ອຫາລືກ່ຽວກັບການພັດທະນາ AI, ໂດຍທີ່ຄຸກພະຍາຍາມທຳຄວາມເຂົ້າໃຈແຜນຂອງ Google ກ່ຽວກັບວິວັດທະນາການຂອງເຕັກໂນໂລຊີ AI ແລະ ສ່ວນໜຶ່ງຂອງການສົນທະນານັ້ນ ໄດ້ຫາລືກ່ຽວກັບການເຜີຍແຜ່ແອັບ Gemini ດ້ວຍ. ນອກຈາກນີ້, ພິຊາຍໄດ້ກ່າວເສີມວ່າ ຄຸກໄດ້ບອກກັບລາວວ່າຈະມີໂມເດລ AI ຈາກບໍລິສັດທີສາມ (Third-party) ເພີ່ມເຕີມເຂົ້າມາໃນ Apple Intelligence ພາຍໃນປີນີ້.

ທີ່ໜ້າສົນໃຈກໍຄື ເມື່ອເດືອນກຸມພາທີ່ຜ່ານມາ, ແອຣອນ ເພີຣິສ ນັກຂຽນດ້ານເຕັກໂນໂລຊີໄດ້ເປີດເຜີຍຜ່ານເວັບໄຊ MacRumors ວ່າໄດ້ພົບ “Google” ເປັນຕົວເລືອກໂມເດລ AI ສຳລັບ Apple Intelligence ໃນລະບົບປະຕິບັດການ iOS 18.4 Beta ອີກດ້ວຍ.

ສະແດງຄຳຄິດເຫັນ