ປັກກິ່ງ 5 ພດສະພາ – ເຮືອທ່ອງທ່ຽວຖືກກະແສລົມແຮງພັດຈົນຈົມລົງໃນແມ່ນ້ຳເຖິງ 4 ລຳຕິດຕໍ່ກັນ ເຮັດໃຫ້ມີຜູ້ເສຍຊີວິດເຖິງ 10 ຄົນ

ສຳນັກຂ່າວຊິນຫົວ ແລະ ໂທລະພາບຊີຊີທີວີ ຂອງຈີນ ລາຍງານວ່າ ໃນຊ່ວງບ່າຍຂອງວັນອາທິດທີ່ຜ່ານມາ ມີເຮືອທ່ອງທ່ຽວເຖິງ 4 ລຳຖືກກະແສລົມແຮງແບບກະທັນຫັນພັດຈົນເຮືອຫລົ້ມໃນແມ່ນ້ຳຫລິວກວງ ໃນເມືອງຊຽນຊີ ແຂວງກຸ້ຍໂຈວ ທາງພາກຕາເວັນຕົກສຽງໃຕ້ ເຮັດໃຫ້ມີຜູ້ເສຍຊີວິດ 9 ຄົນ ແລະ ມີຜູ້ສູນຫາຍອີກ 1 ຄົນ.

ຫລ້າສຸດໃນຊ່ວງທ່ຽງທີ່ຜ່ານມາ ເຈົ້າໜ້າທີ່ກູ້ໄພໄດ້ພົບຮ່າງຂອງຜູ້ສູນຫາຍຄົນສຸດທ້າຍແລ້ວ ແຕ່ບໍ່ພົບວ່າມີສັນຍານຊີບ ເຮັດໃຫ້ຈຳນວນຜູ້ເສຍຊີວິດເພີ່ມເປັນ 10 ຄົນ.

ສຳນັກຂ່າວຊິນຫົວລາຍງານວ່າ ມີຜູ້ທີ່ໄດ້ຮັບການຊ່ວຍຊີວິດໄວ້ໄດ້ 74 ຄົນ, ໃນຈຳນວນນີ້ ຖືກສົ່ງຕົວໄປໂຮງໝໍ 70 ຄົນ ເພື່ອຮັກສາອາການບາດເຈັບເລັກໆນ້ອຍໆ, ໃນຂະນະທີ່ໂທລະພາບຊີຊີທີວີລາຍງານວ່າ ມີຜູ້ປະສົບເຫດຕົກລົງໄປໃນນ້ຳກວ່າ 80 ຄົນ, ແຕ່ມີບາງຄົນສາມາດລອຍນ້ຳກັບເຂົ້າຝັ່ງໄດ້ເອງ.

ເຮືອທີ່ປະສົບເຫດເປັນເຮືອເປົ່າ 2 ລຳ, ເຮືອແຕ່ລະລຳສາມາດຮັບຜູ້ໂດຍສານໄດ້ປະມານ 40 ຄົນ ແລະ ບໍ່ພົບວ່າມີເຮືອບັນທຸກນ້ຳໜັກເກີນ. ໃນຂະນະທີ່ເກີດເຫດມີທັງຝົນ ແລະ ໝາກເຫັບຕົກ ລວມທັງມີໝອກໜາ.

ອຸບັດຕິເຫດດັ່ງກ່າວເກີດຂຶ້ນໃນຊ່ວງທ້າຍຂອງເທດສະການພັກຍາວ 1 ອາທິດ ເນື່ອງໃນວັນແຮງງານ ຊຶ່ງມີຜູ້ຄົນເດີນທາງ ແລະ ທ່ອງທ່ຽວຈຳນວນຫລາຍ, ໃນຂະນະທີ່ແຂວງກຸ້ຍໂຈວກໍເຕັມໄປດ້ວຍແຫລ່ງທ່ອງທ່ຽວທາງທຳມະຊາດຈຳນວນຫລາຍ ເຮັດໃຫ້ການຈະລາຈອນຄ່ອນຂ້າງໜາແໜ້ນ.

ປະທານາທິບໍດີສີ ຈິ້ນຜິງ ຂອງຈີນ ສັ່ງການໃຫ້ເຈົ້າໜ້າທີ່ຂອງແຂວງກຸ້ຍໂຈວດຳເນີນການທຸກຢ່າງເທົ່າທີ່ຈະເປັນໄປໄດ້ ໃນການຈັດການກັບອຸບັດຕິເຫດໃນຄັ້ງນີ້. ທ່ານສີ ຈິ້ນຜິງ  ຍັງກ່າວດ້ວຍວ່າ ເຈົ້າໜ້າທີ່ຄວນຈະເພີ່ມມາດຕະການຮັກສາຄວາມປອດໄພ ເພື່ອຮັບມືກັບຈຳນວນອຸບັດຕິເຫດທີ່ເພີ່ມສູງຂຶ້ນເລື້ອຍໆ ໃນຈຸດທີ່ເປັນສະຖານທີ່ທ່ອງທ່ຽວຕ່າງໆ ແລະ ສະຖານທີ່ສາທາລະນະທີ່ມີຄວາມສຳຄັນ.

ສະແດງຄຳຄິດເຫັນ