ມອສໂກ 6 ພຶດສະພາ – ຢູເຄຣນສົ່ງໂດຣນໂຈມຕີຣັດເຊຍຕໍ່ເນື່ອງເປັນຄືນທີສອງ ໃນຂະນະທີ່ຣັດເຊຍກຳລັງຈະມີງານສວນສະໜາມປະຈຳປີໃນອີກ 3 ວັນຂ້າງໜ້າ ເຊິ່ງຈະມີຜູ້ນຳຈາກຫຼາຍປະເທດມາຮ່ວມງານດ້ວຍ

 

ທ່ານເຊີເກ ໂຊບຢານິນ ເຈົ້າຕີກຸງມອສໂກ ລະບຸວ່າ ,ມື້ຄືນນີ້ຣັດເຊຍສາມາດທຳລາຍໂດຣນຂອງຢູເຄຣນໄດ້ຢ່າງໜ້ອຍ 19 ລຳ ກ່ອນທີ່ໂດຣນເຫຼົ່ານີ້ຈະໂຈມຕີເຖິງເປົ້າໝາຍ ຫຼັງຈາກເມື່ອຄືນວານນີ້ລະບົບປ້ອງກັນໄພທາງອາກາດຂອງຣັດເຊຍກໍຍິງສະກັດໂດຣນຂອງຢູເຄຣນໄປ 4 ລຳ.

 

ທ່ານໂຊບຢານິນເປີດເຜີຍດ້ວຍວ່າ ສະໜາມບິນທັງ 4 ແຫ່ງໃນກຸງມອສໂກຕ້ອງປິດທຳການຊົ່ວຄາວນານຫຼາຍຊົ່ວໂມງໃນວັນນີ້ເພື່ອຄວາມປອດໄພ.

 

ນອກຈາກນີ້ຍັງມີສະໜາມບິນອີກຫຼາຍແຫ່ງໃນເມືອງຕ່າງໆ ທີ່ຕ້ອງປິດທຳການໄປດ້ວຍ. ຂະນະທີ່ກະຊວງກະລາໂຫມລະບຸວ່າ ເມື່ອຄືນນີ້ສາມາດສະກັດໂດຣນຂອງຢູເຄຣນທົ່ວປະເທດໄດ້ເຖິງ 105 ລຳ.

 

ການໂຈມຕີກຸງມອສໂກຮອບນີ້ມີຂຶ້ນກ່ອນທີ່ຣັດເຊຍຈະຈັດການສວນສະໜາມເຊິ່ງເປັນງານໃຫຍ່ປະຈຳປີໃນວັນທີ 9 ພຶດສະພານີ້ ເພື່ອສະເຫຼີມສະຫຼອງໄຊຊະນະເໜືອກອງທັບນາຊີເຢຍລະມັນເມື່ອສະໄໝສົງຄາມໂລກຄັ້ງທີ 2 ເຊິ່ງງານນີ້ຈະມີຜູ້ນຳຈາກຫຼາຍປະເທດມາຮ່ວມງານດ້ວຍ ລວມທັງປະທານາທິບໍດີສີ ຈິ້ນຜິງ ຂອງຈີນທີ່ມີກຳນົດຢ້ຽມຢາມຣັດເຊຍຢ່າງເປັນທາງການລະຫວ່າງ 7-10 ພຶດສະພານີ້.

 

ເມື່ອເດືອນທີ່ຜ່ານມາ ປະທານາທິບໍດີປູຕິນໄດ້ປະກາດຢຸດຍິງຝ່າຍດຽວໃນຢູເຄຣນເປັນເວລາ 3 ວັນລະຫວ່າງ 8-10 ພຶດສະພາ ແຕ່ປະທານາທິບໍດີ ໂວໂລດິເມຍ ເຊເລນສະກີ ຜູ້ນຳຢູເຄຣນກໍວິພາກວິຈານທີ່ຈະຢຸດຍິງແຄ່ 3 ວັນເທົ່ານັ້ນ ແລະ ບອກດ້ວຍວ່າລາວພ້ອມທີ່ຈະລົງນາມການຢຸດຍິງກໍຕໍ່ເມື່ອຕ້ອງມີການຢຸດຍິງຢ່າງໜ້ອຍ 30 ວັນເທົ່ານັ້ນ.

 

ທ່ານເຊເລນສະກີຍັງສົ່ງສານໄປເຖິງຜູ້ນຳຈາກຕ່າງປະເທດດ້ວຍວ່າ ຢູເຄຣນບໍ່ສາມາດຈະຮັບຜິດຊອບຕໍ່ສິ່ງທີ່ຈະເກີດຂຶ້ນໃນດິນແດນຂອງຣັດເຊຍໄດ້ເນື່ອງຈາກຂະນະນີ້ຍັງມີການທຳສົງຄາມກັນຢູ່ ເຊິ່ງກໍເທົ່າກັບວ່າບໍ່ຮັບຮອງຄວາມປອດໄພຂອງຜູ້ນຳທີ່ຈະມາຮ່ວມງານ.

 

ຂະນະທີ່ກະຊວງການຕ່າງປະເທດຣັດເຊຍຕອບໂຕ້ວ່າ ຄວາມເຫັນຂອງທ່ານເຊເລນສະກີເປັນການຂົ່ມຂູ່ແລະຄຸກຄາມ.

 

ສະແດງຄຳຄິດເຫັນ