ອັງກິດຈະຫຼຸດພາສີສະເລ່ຍທີ່ເກັບຈາກສິນຄ້ານຳເຂົ້າຈາກສະຫະລັດລົງຈາກຮ້ອຍລະ 5.1 ເຫຼືອຮ້ອຍລະ 1.8 ຂະນະທີ່ສະຫະລັດຈະເກັບພາສີສິນຄ້ານຳເຂົ້າຈາກອັງກິດທີ່ຮ້ອຍລະ 10 ຕາມທີ່ປະກາດເມື່ອວັນທີ 2 ເມສາ ຄອບຄຸມເຖິງຍານຍົນທີ່ສະຫະລັດຮຽກເກັບຖ້ວນໜ້າກັບທຸກປະເທດໃນອັດຕາຮ້ອຍລະ 25 ໂດຍໃຫ້ໂກຕ້າພາສີດັ່ງກ່າວແກ່ອັງກິດປີລະ 100,000 ຄັນເກືອບເທົ່າກັບຈຳນວນຍານຍົນທີ່ອັງກິດສົ່ງອອກໄປສະຫະລັດເມື່ອປີກ່ອນ.

ສ່ວນພາສີເຫຼັກແລະອາລູມິນຽມທີ່ສະຫະລັດເກັບຖ້ວນໜ້າໃນອັດຕາຮ້ອຍລະ 25 ຈະຫຼຸດລົງເຫຼືອຮ້ອຍລະ 0 ໃຫ້ແກ່ອັງກິດ ແລກກັບການທີ່ອັງກິດຈະຫຼຸດພາສີເອທານອນນຳເຂົ້າຈາກສະຫະລັດລົງຈາກຮ້ອຍລະ 19 ເຫຼືອຮ້ອຍລະ 0 ໂດຍໃຫ້ໂກຕ້າປີລະ 370 ລ້ານແກລລອນ ຫຼາຍກວ່າທີ່ສະຫະລັດສົ່ງອອກໄປອັງກິດຢ່າງຫຼວງຫຼາຍ.

ເຖິງຢ່າງໃດກໍ່ດີ ຜູ້ນຳສະຫະລັດບອກປັດວ່າ ຂໍ້ຕົກລົງກັບອັງກິດຈະບໍ່ແມ່ນຕົ້ນແບບສຳລັບການເຈລະຈາຂໍ້ຕົກລົງກັບຄູ່ຄ້າອື່ນໆ ທັງໝົດ 57 ຄູ່ຄ້າທີ່ເພິ່ນປະກາດເກັບຕັ້ງແຕ່ຮ້ອຍລະ 10 ໄປຈົນເຖິງຮ້ອຍລະ 50 ເພາະຄູ່ຄ້າອື່ນໆເກີນດຸນການຄ້າກັບສະຫະລັດເປັນຈຳນວນຫຼາຍ.

ເຈົ້າໜ້າທີ່ອັງກິດລາຍໜຶ່ງເປີດເຜີຍວ່າ ທັງ 2 ຝ່າຍມີສິ່ງທີ່ຕ້ອງຫາລືໃນລາຍລະອຽດຢ່າງຈິງຈັງ ໂດຍຕັ້ງຂໍ້ສັງເກດວ່າ ຂໍ້ຕົກລົງນີ້ບໍ່ໄດ້ຄອບຄຸມເລື່ອງທີ່ສະຫະລັດຕ້ອງການໃຫ້ອັງກິດປັບປ່ຽນການເກັບພາສີບໍລິການດິຈິຕອນກັບແພລດຟອມຊື້ຂາຍໃນໂລກອອນລາຍໃນອັດຕາຮ້ອຍລະ 2 ຂອງລາຍໄດ້ທີ່ເກີດຂຶ້ນໃນອັງກິດ.

ຂະນະທີ່ນັກວິເຄາະຫຼາຍລາຍຊີ້ວ່າ ຂໍ້ຕົກລົງນີ້ບໍ່ໄດ້ແກ້ໄຂເລື່ອງດຸນການຄ້າຂອງ 2 ປະເທດແຕ່ຢ່າງໃດ ແລະ ຍັງບໍ່ມີການລົງນາມຢ່າງເປັນທາງການ.