ເຫຼືອເວລາອີກພຽງປີດຽວເທົ່ານັ້ນທີ່ເກມ GTA 6 ຈະວາງຈຳໜ່າຍ ໂດຍມີກຳນົດການເປີດຕົວ 26 ພຶດສະພາ ເທິງແພລດຟອມເຄື່ອງຫຼິ້ນເກມຄອນໂຊລ ນຳໂດຍ PlayStation 5, Xbox Series X ແລະ Xbox Series S

ມື້ວານນີ້ ຣັອກສະຕາ (Rockstar) ໄດ້ປ່ອຍຕົວຢ່າງທີສອງຂອງເກມ Grand Theft Auto 6 ຫຼື GTA 6 ຫຼັງຈາກທີ່ໄດ້ຫ່າງຫາຍໄປຈາກຕົວຢ່າງທຳອິດເປັນເວລາຫຼາຍປີ

ໃນຕົວຢ່າງໃໝ່ທີ່ປ່ອຍອອກມານີ້ ໄດ້ໃຊ້ພາບຈາກເຄື່ອງເກມ PS5 ພ້ອມກັບນຳສະເໜີຮູບລັກສະນະໃໝ່ໆ ຂອງເມືອງ Vice City (ເມືອງຈຳລອງຈາກເມືອງໄມອາມີ ສະຫະລັດອາເມລິກາ) ລວມເຖິງການກ່າວເຖິງຕົວລະຄອນຫຼັກຂອງເກມຄື Jason ແລະ Lucia ນອກຈາກນີ້ຍັງມີການເປີດເຜີຍລາຍລະອຽດເນື້ອເລື່ອງເບື້ອງຕົ້ນ ໂດຍເນັ້ນໄປທີ່ Jason ແລະ Lucia ທີ່ຢູ່ທ່າມກາງທິດສະດີສົມຮູ້ຮ່ວມຄິດທີ່ແຜ່ຂະຫຍາຍໄປທົ່ວລັດ Leonida

ໃນຕົວຢ່າງທີສອງນີ້ ພວກເຮົາຈະໄດ້ເຫັນ Jason ທີ່ເດີນທາງຜ່ານສະຖານທີ່ທີ່ມີແດດຈ້າຫຼາຍແຫ່ງໃນ Vice City ກ່ອນທີ່ຈະໄປຮັບ Lucia ອອກຈາກເຮືອນຈຳໃນທີ່ສຸດ

ຈາກນັ້ນກໍເປັນໄປຕາມສະໄຕລ໌ຂອງເກມ GTA ທຸກພາກທີ່ຕົວເອກຕ້ອງໄປພົວພັນກັບອາຊະຍາກຳ ແລະ ອາຊະຍາກອນ ແລະ ຕາມມາດ້ວຍຕົວລະຄອນປະກອບທີ່ມາພ້ອມກັບສີສັນ

ໃນສ່ວນຄຳອະທິບາຍເນື້ອເລື່ອງ ມີໃຈຄວາມວ່າ Jason ແລະ Lucia ຮູ້ດີມາຕະຫຼອດວ່າພວກເຂົາມີແຕ່ເສຍປຽບ ແຕ່ເມື່ອວຽກງ່າຍໆ ເກີດຜິດພາດ ພວກເຂົາກໍພົບວ່າຕົວເອງຢູ່ໃນດ້ານທີ່ມືດມົນທີ່ສຸດຂອງສະຖານທີ່ທີ່ມີແດດຈ້າທີ່ສຸດໃນສະຫະລັດອາເມລິກາ ທ່າມກາງທິດສະດີສົມຮູ້ຮ່ວມຄິດທີ່ແຜ່ຂະຫຍາຍໄປທົ່ວລັດ Leonida ນັ້ນເຮັດໃຫ້ພວກເຂົາຕ້ອງເພິ່ງພາກັນແລະກັນຫຼາຍກວ່າທີ່ເຄີຍ ຫາກຕ້ອງການທີ່ຈະມີຊີວິດລອດ

ທີ່ໜ້າສົນໃຈກໍຄື ເວັບໄຊທ໌ຢ່າງເປັນທາງການຂອງ GTA 6 ໄດ້ຮັບການອັບເດດຮູບພາບ ແລະ ອາດເວີກໃໝ່ໆ ຫຼາຍຢ່າງ ລວມເຖິງຂໍ້ມູນເຊິງເລິກເພີ່ມເຕີມກ່ຽວກັບ Jason ແລະ Lucia ຊຶ່ງເປັນຕົວລະຄອນຫຼັກຂອງພາກນີ້

Jason ຖືກອະທິບາຍວ່າເປັນຄົນທີ່ຕ້ອງການຊີວິດທີ່ງ່າຍສະບາຍ ແຕ່ລົງເອຍດ້ວຍການເຮັດວຽກໃຫ້ກັບຂະບວນການຄ້າຢາເສບຕິດໃນທ້ອງຖິ່ນຫຼັງຈາກໃຊ້ເວລາຢູ່ໃນກອງທັບມາໄລຍະໜຶ່ງ ຊຶ່ງການໄດ້ພົບກັບ Lucia ອາດເປັນສິ່ງທີ່ດີທີ່ສຸດຫຼືຮ້າຍແຮງທີ່ສຸດທີ່ເຄີຍເກີດຂຶ້ນກັບລາວ
ທາງດ້ານ Lucia ໄດ້ຖືກສັ່ງສອນໂດຍພໍ່ຂອງລາວວ່າຕ້ອງເປັນນັກສູ້ຕັ້ງແຕ່ເດັກ ແຕ່ລາວກໍລົງເອຍດ້ວຍການຢູ່ໃນເຮືອນຈຳ ຫຼັງຈາກຕໍ່ສູ້ເພື່ອຄອບຄົວຂອງລາວ ໂຊກຊ່ວຍລ້ວນໆ ທີ່ເຮັດໃຫ້ລາວອອກມາໄດ້ ແລະ Lucia ໄດ້ຮຽນຮູ້ບົດຮຽນຂອງລາວແລ້ວ

ເຖິງຢ່າງໃດກໍຕາມ Lucia ຕ້ອງການຊີວິດທີ່ດີຢ່າງທີ່ແມ່ຂອງລາວຝັນມາຕັ້ງແຕ່ສະໄໝທີ່ພວກເຂົາຍັງຢູ່ໃນ Liberty City (ເມືອງສົມມຸດອີກແຫ່ງໜຶ່ງໃນຈັກກະວານ GTA) ແຕ່ແທນທີ່ຈະເປັນຈິນຕະນາການໄຮ້ສາລະ Lucia ກຽມພ້ອມທີ່ຈະຈັດການເລື່ອງຕ່າງໆ ດ້ວຍຕົວເອງ ມຸ່ງໝັ້ນໃນແຜນຂອງລາວເອງ ແລະ ພ້ອມທີ່ຈະແລກກັບທຸກສິ່ງທຸກຢ່າງ

ຕົວຢ່າງຂອງເກມ GTA 6 ຖືກປ່ອຍອອກມາຫຼັງຈາກທີ່ຣັອກສະຕາ ເກມ ເພິ່ງປະກາດເລື່ອນການວາງຈຳໜ່າຍເກມອອກໄປ ຊຶ່ງເລື່ອງນີ້ເປັນໄປຕາມຄາດຂອງເກມເມີທົ່ວໂລກຢູ່ແລ້ວວ່າຣັອກສະຕາໜ້າຈະຕ້ອງເລື່ອນການວາງຈຳໜ່າຍອອກໄປ ເພາະຕົວເກມຍັງບໍ່ມີທີທ່າທີ່ຈະພັດທະນາສຳເລັດສົມບູນ ໂດຍທີ່ການວາງຈຳໜ່າຍຈະເລື່ອນໄປຈາກກຳນົດການເດີມອີກ 17 ເດືອນ

Grand Theft Auto 6 ພ້ອມວາງຈຳໜ່າຍ 26 ພຶດສະພາ 2026 ເທິງແພລດຟອມ PlayStation 5, Xbox Series X ແລະ Xbox Series S

ສະແດງຄຳຄິດເຫັນ