ເຈນີວາ 12 ພຶດສະພາ – ສະຫະລັດແລະຈີນຕ່າງສະແດງຄວາມຊື່ນຊົມຕໍ່ການເຈລະຈາການຄ້ານັດທຳອິດເມື່ອຊ່ວງທ້າຍອາທິດທີ່ຜ່ານມາວ່າ ການເຈລະຈາມີຄວາມຄືບໜ້າແລະເປັນໄປຢ່າງສ້າງສັນ ແຕ່ບໍ່ເປີດເຜີຍໃນລາຍລະອຽດ

ທ່ານເຫີ ລີ່ເຟິງ ຮອງນາຍົກລັດຖະມົນຕີຈີນ ເຊິ່ງເປັນຫົວໜ້າຄະນະເຈລະຈາການຄ້າຂອງຈີນເປີດເຜີຍກັບຜູ້ສື່ຂ່າວຫຼັງສຳເລັດການເຈລະຈາ 2 ວັນທີ່ນະຄອນເຈນີວາຂອງສະວິດເຊີແລນວ່າ ການເຈລະຈາເປັນໄປຢ່າງຕົງໄປຕົງມາ, ເຈາະເລິກ, ແລະມີຄວາມສ້າງສັນ.

ການພົບປະກັນຄັ້ງນີ້ມີຄວາມຄືບໜ້າຢ່າງຫຼວງຫຼາຍ ແລະ ມີບັນລຸສັນທາມະຕິທີ່ສຳຄັນດ້ວຍ.

ທັງຈີນແລະສະຫະລັດໄດ້ດຳເນີນການເຈລະຈາໂດຍຍຶດຫຼັກຄວາມເຄົາລົບເຊິ່ງກັນແລະກັນແລະຄວາມເທົ່າທຽມ, ຍຶດຖືຜົນປະໂຫຍດຮ່ວມກັນ, ເຈລະຈາກັນດ້ວຍຄວາມເປັນມືອາຊີບແລະມີປະສິດທິພາບ.

ທ່ານສະກັອດ ເບສເຊັນ ລັດຖະມົນຕີກະຊວງການຄັງສະຫະລັດ ເຊິ່ງເປັນຫົວໜ້າທີມເຈລະຈາຂອງສະຫະລັດກ່າວວ່າ ການເຈລະຈາຄັ້ງນີ້ມີຄວາມຄືບໜ້າທີ່ສຳຄັນກ່ຽວກັບການຄີ່ຄາຍຄວາມຕຶງຄຽດຂອງສົງຄາມການຄ້າລະຫວ່າງຈີນແລະສະຫະລັດ.

ນອກຈາກນີ້ຍັງບັນລຸຂໍ້ຕົກລົງກັບຈີນໃນການຫຼຸດການຂາດດຸນການຄ້າ. ສ່ວນລາຍລະອຽດອື່ນໆນັ້ນ, ທ່ານເບສເຊັນກ່າວວ່າ ຈະມີການເປີດເຜີຍໃນວັນຈັນນີ້ຕາມເວລາທ້ອງຖິ່ນ.

 

ດ້ານທ່ານເຈມີສັນ ເກຣຍ ຜູ້ແທນການຄ້າສະຫະລັດ ເຊິ່ງຮ່ວມໃນທີມເຈລະຈາຂອງສະຫະລັດກ່າວວ່າ ຄວາມເຫັນຕ່າງລະຫວ່າງຈີນກັບສະຫະລັດບໍ່ໄດ້ຫຼາຍຢ່າງທີ່ເຄີຍຄາດໄວ້ກ່ອນໜ້ານີ້.

 

ເພິ່ນກ່າວເຖິງຄະນະເຈລະຈາຂອງຈີນວ່າ ມີຄວາມຄ່ຽວຫຼາຍ, ແລະວ່າຂໍ້ຕົກລົງທີ່ບັນລຸກັບຈີນໃນການເຈລະຈາຄັ້ງນີ້ຈະຊ່ວຍຫຼຸດຍອດຂາດດຸນການຄ້າສິນຄ້າທົ່ວໂລກຂອງສະຫະລັດທີ່ສູງເຖິງ 1.2 ລ້ານລ້ານໂດລາສະຫະລັດ (ລາວ 40 ລ້ານລ້ານບາດ). ຣອຍເຕີລາຍງານເພີ່ມເຕີມວ່າ ສະຫະລັດຂາດດຸນການຄ້າສິນຄ້າໃຫ້ຈີນ 295,000 ລ້ານໂດລາສະຫະລັດ.

 

ການເຈລະຈາປັນຫາການຄ້າລະຫວ່າງສະຫະລັດກັບຈີນຄັ້ງນີ້ຖືເປັນຄັ້ງທຳອິດນັບຕັ້ງແຕ່ທ່ານໂດນັລ ທຣັມປ໌ ເລີ່ມປະກາດຂຶ້ນພາສີນຳເຂົ້າຈາກຈີນມາຕັ້ງແຕ່ເດືອນກຸມພາໂດຍເລີ່ມຈາກຮ້ອຍລະ 20 ແລະຫຼັງຈາກນັ້ນກໍມີການປັບຂຶ້ນອີກຫຼາຍຄັ້ງຈົນລ່າສຸດຢູ່ທີ່ຮ້ອຍລະ 145,

 

ຂະນະທີ່ຈີນຂຶ້ນພາສີຕອບໂຕ້ສະຫະລັດຫຼາຍຮອບເຊັ່ນກັນ ຈົນລ່າສຸດຢູ່ທີ່ຮ້ອຍລະ 125. ສົງຄາມການຄ້າລະຫວ່າງຍັກໃຫຍ່ດ້ານເສດຖະກິດຂອງໂລກທັງສອງປະເທດໄດ້ສ້າງຄວາມໂກລາຫົນຢ່າງໜັກໃຫ້ກັບເສດຖະກິດທົ່ວໂລກ.

ສະແດງຄຳຄິດເຫັນ