ຄອມພິວເຕີທີ່ພວກເຮົາໃຊ້ທຸກມື້ນີ້ ມັກມີພື້ນທີ່ເກັບຂໍ້ມູນທີ່ເອີ້ນວ່າ Drive C ແລະ Drive D, ເຊິ່ງເບິ່ງຄືວ່າສາມາດໃຊ້ງານໄດ້ຄ້າຍຄືກັນ. ຫຼາຍຄົນຈຶ່ງສົງໄສວ່າ ໄດຣຟ໌ທັງສອງນີ້ມີຄວາມແຕກຕ່າງກັນແນວໃດ, ແຕ່ລະໄດຣຟ໌ມີໜ້າທີ່ສະເພາະຫຍັງ, ແລະ ຖ້າສາມາດເກັບຂໍ້ມູນປະເພດດຽວກັນໄດ້ ເປັນຫຍັງຈຶ່ງຕ້ອງແຍກອອກຈາກກັນ.

Drive C ແມ່ນຫຍັງ? Drive C ຄື ໄດຣຟ໌ຫຼັກ (Primary Drive) ຂອງລະບົບຄອມພິວເຕີ

ໜ້າທີ່ຫຼັກ:

• ເກັບລະບົບປະຕິບັດການ (OS) ເຊັ່ນ Windows, IOS ເປັນຕົ້ນ
• ເກັບໄຟລ໌ໂປຣແກຣມທີ່ຕິດຕັ້ງໃນເຄື່ອງ
• ໃຊ້ເປັນພື້ນທີ່ເຮັດວຽກສຳລັບໂປຣແກຣມຕ່າງໆ ແລະ ໄຟລ໌ຊົ່ວຄາວ (Temporary Files)

ຂໍ້ຄວນລະວັງ:

• ບໍ່ຄວນເກັບໄຟລ໌ທີ່ບໍ່ຈຳເປັນໃນໄດຣຟ໌ນີ້ຫຼາຍເກີນໄປ ເພາະພື້ນທີ່ທີ່ຫຼຸດລົງອາດເຮັດໃຫ້ລະບົບເຮັດວຽກຊ້າລົງ

Drive D ແມ່ນຫຍັງ? Drive D ມັກຖືກໃຊ້ເປັນ ໄດຣຟ໌ເສີມ (Secondary Drive)

ໜ້າທີ່ຫຼັກ:

• ເກັບຂໍ້ມູນສ່ວນຕົວ ເຊັ່ນ ຮູບພາບ, ວິດີໂອ, ເອກະສານ ແລະ ໄຟລ໌ອື່ນໆ
• ໃຊ້ເປັນພື້ນທີ່ສຳຮອງ (Backup) ຫຼື ພື້ນທີ່ແຍກສຳລັບເກັບຂໍ້ມູນທີ່ບໍ່ກ່ຽວຂ້ອງກັບລະບົບປະຕິບັດການ

ຂໍ້ດີ:

• ຫຼຸດຄວາມສ່ຽງທີ່ໄຟລ໌ສ່ວນຕົວຈະສູນຫາຍຫາກລະບົບປະຕິບັດການໃນໄດຣຟ໌ C ເສຍຫາຍ
• ຊ່ວຍຈັດການຂໍ້ມູນໃຫ້ງ່າຍຂຶ້ນແລະມີລະບຽບ

ເປັນຫຍັງຈຶ່ງຕ້ອງແຍກ Drive C ແລະ Drive D?

ໃນຄວາມເປັນຈິງແລ້ວ, ຂໍ້ມູນທັງໝົດສາມາດຈັດເກັບຮ່ວມກັນໄວ້ໃນໄດຣຟ໌ດຽວໄດ້ ແຕ່ຫາກເກີດບັນຫາກ່ຽວກັບລະບົບ ເຊັ່ນ ລະບົບປະຕິບັດການເສຍຫາຍຈົນຕ້ອງນຳເຄື່ອງໄປສ້ອມແປງ, ການເກັບຂໍ້ມູນແບບບໍ່ເປັນລະບຽບອາດສ້າງຄວາມຫຍຸ້ງຍາກໃນການຈັດການຂໍ້ມູນ. ການແຍກເກັບຂໍ້ມູນໃນໄດຣຟ໌ທີ່ເປັນລະບຽບຈຶ່ງມີຂໍ້ດີດັ່ງນີ້:

1. ປ້ອງກັນຂໍ້ມູນສູນຫາຍ
   • ຫາກລະບົບປະຕິບັດການໃນໄດຣຟ໌ C ມີບັນຫາ ເຊັ່ນ ໄວຣັສ ຫຼື ລະບົບລົ້ມ, ຂໍ້ມູນໃນໄດຣຟ໌ D ຈະຍັງປອດໄພ
2. ເພີ່ມຄວາມສະດວກໃນການຈັດການ
   • ຊ່ວຍໃຫ້ຜູ້ໃຊ້ງານສາມາດແຍກຂໍ້ມູນສຳຄັນອອກຈາກຂໍ້ມູນທົ່ວໄປ, ເຮັດໃຫ້ຄົ້ນຫາແລະຈັດການໄຟລ໌ໄດ້ງ່າຍຂຶ້ນ
3. ເພີ່ມປະສິດທິພາບຂອງຄອມພິວເຕີ
   • ການເກັບຂໍ້ມູນໃນໄດຣຟ໌ D ແທນໄດຣຟ໌ C ຊ່ວຍຫຼຸດການໃຊ້ງານພື້ນທີ່ຂອງລະບົບຫຼັກ, ເຮັດໃຫ້ຄອມພິວເຕີເຮັດວຽກໄດ້ໄວຂຶ້ນ
4. ສະໜັບສະໜູນການແບັກອັບ
   • ການເກັບຂໍ້ມູນໃນໄດຣຟ໌ D ເຮັດໃຫ້ການແບັກອັບຂໍ້ມູນສະເພາະໄຟລ໌ສ່ວນຕົວງ່າຍຂຶ້ນ ໂດຍບໍ່ຕ້ອງກ່ຽວຂ້ອງກັບໄຟລ໌ລະບົບ

ຂໍ້ຄວນລະວັງໃນການໃຊ້ງານ Drive C ແລະ D

• ຢ່າເກັບໄຟລ໌ສຳຄັນໃນໄດຣຟ໌ C ໂດຍບໍ່ຈຳເປັນ ເພາະອາດສູນຫາຍໄດ້ງ່າຍເມື່ອລະບົບມີບັນຫາ
• ກວດສອບພື້ນທີ່ໄດຣຟ໌ D ເປັນປະຈຳ ແລະ ແບັກອັບຂໍ້ມູນສຳຄັນໄວ້ໃນທີ່ປອດໄພ ເຊັ່ນ ຮາດດິສກ໌ພາຍນອກ ຫຼື Cloud Storage

ການເຂົ້າໃຈຫຼັກການໃຊ້ງານຂອງໄດຣຟ໌ຕ່າງໆ ໃນຄອມພິວເຕີຊ່ວຍໃຫ້ທ່ານຈັດເກັບຂໍ້ມູນໄດ້ຢ່າງເປັນລະບຽບ, ແຍກໄຟລ໌ລະບົບປະຕິບັດການ, ໂປຣແກຣມ ແລະ ຂໍ້ມູນສ່ວນຕົວອອກຈາກກັນຢ່າງຊັດເຈນ. ວິທີນີ້ບໍ່ພຽງແຕ່ຊ່ວຍໃຫ້ການຈັດການຂໍ້ມູນງ່າຍຂຶ້ນ ແຕ່ຍັງຊ່ວຍຫຼຸດຄວາມສ່ຽງຕໍ່ການສູນຫາຍຂອງຂໍ້ມູນສຳຄັນໃນກໍລະນີທີ່ລະບົບເກີດບັນຫາ.

ສະແດງຄຳຄິດເຫັນ