ເຈນີວາ 12 ພຶດສະພາ – ສະຫະລັດ ແລະ ຈີນ ເປີດເຜີຍວ່າ ໄດ້ບັນລຸຂໍ້ຕົກລົງທີ່ຈະພັກການໃຊ້ພາສີຕອບໂຕ້ກັນເປັນເວລາ 90 ວັນ ແລະ ຈະຫຼຸດພາສີຕອບໂຕ້ລົງຝ່າຍລະຮ້ອຍລະ 115

 

ທ່ານ ສະກອດ ເບັສເຊັນ ລັດຖະມົນຕີຄັງສະຫະລັດ ກ່າວກັບນັກຂ່າວໃນມື້ນີ້ ຫຼັງຈາກສຳເລັດການເຈລະຈາການຄ້າກັບຈີນໃນຊ່ວງວັນເສົາ ແລະ ວັນອາທິດທີ່ນະຄອນເຈນີວາຂອງສະວິດເຊີແລນ ວ່າ ທັງ 2 ຝ່າຍເຫັນພ້ອມກັນວ່າ ຈະພັກການໃຊ້ມາດຕະການພາສີຕອບໂຕ້ກັນເປັນເວລາ 90 ວັນ

 

ແລະ ຈະຫຼຸດພາສີຕອບໂຕ້ລົງຝ່າຍລະ 115 ໂດຍຫຼຸດລົງຈາກຮ້ອຍລະ 125 ເຫຼືອຮ້ອຍລະ 10 ແຕ່ພາສີສຸນລະກາກອນທີ່ສະຫະລັດເກັບກັບສິນຄ້ານຳເຂົ້າຈາກຈີນຮ້ອຍລະ 20 ເພາະເລື່ອງຢາແກ້ປວດເຟນທານິນທີ່ເປັນສານເສບຕິດຍັງຄົງມີຜົນບັງຄັບໃຊ້ຢູ່ ເທົ່າກັບສະຫະລັດຈະເກັບພາສີຈີນໃນອັດຕາຮ້ອຍລະ 30

ລາຍງານຂ່າວລະບຸວ່າ ທັງສະຫະລັດ ແລະ ຈີນເຜີຍຕົງກັນວ່າ ຈະເດີນໜ້າຫາລືເລື່ອງນະໂຍບາຍເສດຖະກິດ ແລະ ການຄ້າກັນຕໍ່ໄປ ຂະນະທີ່ຕະຫຼາດເງິນຕະຫຼາດທຶນພາກັນປັບຕົວຂຶ້ນຮັບຂ່າວດີດັ່ງກ່າວ.

ສະແດງຄຳຄິດເຫັນ