ໂຊລ 14 ພຶດສະພາ – ທ່ານ ອີ ແຈ-ມຽງ ຜູ້ສະໝັກຊິງຕໍາແໜ່ງປະທານາທິບໍດີເກົາຫລີໃຕ້ທີ່ຖືກມອງວ່າເປັນຜູ້ນໍາໜ້າທີ່ຈະຊະນະການເລືອກຕັ້ງ

ໄດ້ນໍາໃຊ້ກົນລະຍຸດຫາສຽງດ້ວຍນະໂຍບາຍ ‘ຫລຸດເວລາເຮັດວຽກຕໍ່ອາທິດ’ ໃຫ້ເຫລືອພຽງແຕ່ 4.5 ວັນ ໂດຍຫວັງໃຫ້ເກີດຄວາມສົມດຸນລະຫວ່າງການເຮັດວຽກແລະຊີວິດສ່ວນຕົວ (work-life balance) ເພື່ອດຶງຄະແນນສຽງຈາກຄົນເຮັດວຽກແລະຄົນລຸ້ນໃໝ່

ທ່ານ ອີ ແຈ-ມຽງ ຈາກພັກປະຊາທິປະໄຕ ຊຶ່ງເປັນພັກຝ່າຍຄ້ານທີ່ມີແນວທາງເສລີນິຍົມ ແລະ ເປັນຜູ້ນໍາໜ້າໃນການເລືອກຕັ້ງທີ່ຈະມີຂຶ້ນໃນວັນທີ 3 ມິຖຸນານີ້ ໄດ້ນໍາສະເໜີນະໂຍບາຍຫາສຽງທີ່ກໍາລັງຖືກກ່າວເຖິງຢ່າງຫຼວງຫຼາຍ

ນັ້ນຄື ການປັບຊົ່ວໂມງການເຮັດວຽກໃຫ້ເຫຼືອ 4.5 ວັນຕໍ່ອາທິດ ຫຼື ຈາກ 40 ຊົ່ວໂມງເຫຼືອ 36 ຊົ່ວໂມງຕໍ່ອາທິດ ໂດຍທີ່ບໍ່ຫຼຸດຄ່າຈ້າງ ໂດຍຫວັງເອົາໃຈກຸ່ມຜູ້ມີສິດອອກສຽງຄົນໄວເຮັດວຽກທີ່ຕ້ອງການສ້າງສົມດຸນການໃຊ້ຊີວິດ ຫຼື ເວີຄ-ໄລຟ-ບາລານຊ (work-life balance)

ສ່ວນພັກພະລັງປະຊາຊົນ ຊຶ່ງເປັນພັກຂອງລັດຖະບານ ໄດ້ສະເຫນີມາດຕະການບໍ່ຫລຸດຊົ່ວໂມງການເຮັດວຽກລວມ ແຕ່ໃຫ້ປ່ຽນເປັນການເຮັດວຽກເພີ່ມວັນລະ 1 ຊົ່ວໂມງ ໃນວັນຈັນເຖິງວັນພະຫັດ ເພື່ອໃຫ້ໄດ້ຢຸດເຄິ່ງວັນໃນວັນສຸກ ໂດຍບໍ່ໄດ້ບັງຄັບໃຊ້ກັບທຸກບໍລິສັດ ແຕ່ເປີດທາງໃຫ້ໄປຕັດສິນໃຈກັນເອງ

ນະໂຍບາຍຫລຸດເວລາເຮັດວຽກໄດ້ເຮັດໃຫ້ພາກທຸລະກິດເລີ່ມສະແດງຄວາມກັງວົນ ໂດຍສະເພາະຕໍ່ຂໍ້ສະເຫນີຂອງພັກປະຊາທິປະໄຕ

ໂດຍຊີ້ວ່າ ການຫລຸດຊົ່ວໂມງການເຮັດວຽກໂດຍບໍ່ເພີ່ມຜົນຜະລິດ ຈະຍິ່ງສ້າງພາລະໃຫ້ທຸລະກິດ ໂດຍສະເພາະບໍລິສັດຂະຫນາດກາງແລະນ້ອຍ ທີ່ກຳລັງປະເຊີນກັບບັນຫາການຂາດແຄນແຮງງານ ແລະ ມີຕົ້ນທຶນເພີ່ມ.

ຢ່າງໃດກໍຕາມ, ສະຫະພາບແຮງງານຫລັກຂອງປະເທດໄດ້ອອກມາສະຫນັບສະຫນູນແນວຄິດນີ້ ພ້ອມຊີ້ວ່າບໍລິສັດຍັກໃຫຍ່ຫລາຍແຫ່ງ ເຊັ່ນ: ເອສເຄ ເທເລຄອມ (SK Telecom), ໂພສໂຄ (POSCO) ບໍລິສັດຜະລິດເຫລັກກ້າ ແລະ ຊຳຊຸງ (Samsung) ຕ່າງກໍມີນະໂຍບາຍລັກສະນະນີ້ຢູ່ແລ້ວ ເຊັ່ນ: ຢຸດທຸກວັນສຸກ ເດືອນລະ 2 ຄັ້ງ

ຜູ້ຊ່ຽວຊານເຫັນວ່າ ການປ່ຽນຜ່ານເພື່ອໄປສູ່ການຫລຸດເວລາເຮັດວຽກຕໍ່ອາທິດໄດ້ຈິງອາດຕ້ອງໃຊ້ເວລາ 4-5 ປີ ຄ້າຍຄືກັບການປ່ຽນຈາກການເຮັດວຽກອາທິດລະ 6 ວັນ ເປັນ 5 ວັນໃນອະດີດ ນອກຈາກນີ້ຍັງຕ້ອງໄດ້ຮັບການສະຫນັບສະຫນູນຢ່າງເຂັ້ມແຂງຈາກພາກລັດ ເຊັ່ນ: ເງິນອຸດຫນູນ ຫລື ການຫລຸດພາສີ ທີ່ຈະຊ່ວຍໃຫ້ນະໂຍບາຍນີ້ເປັນຈິງຂຶ້ນມາໄດ້ໄວຂຶ້ນ.

ສະແດງຄຳຄິດເຫັນ