ແມນຊິຕີ້ ເລັງເປົ້າ ເວີດຊ໌ ຮ່ວມທີມ ເປ໊ບ ຫວັງໄດ້ຕົວມາແທນ ເດິ ບຣອຍນ໌

ສື່ເຢຍລະມັນ ລາຍງານວ່າ ແມນຊິຕີ້ ໂດດເຂົ້າຮ່ວມວົງລ່າຕົວ ຟລໍເຣຍນ ເວີດຊ໌ ນັກເຕະຕົວສ້າງເກມຂອງ ໄບເອີ ເລເວີຄູເຊັນ ມາເປັນຕົວຕາຍຕົວແທນຂອງ ເຄວິນ ເດິ ບຣອຍນ໌ ທີ່ອຳລາທີມຫຼັງຈົບລະດູການນີ້

ເວີດຊ໌ ອາຍຸ 22 ປີ ຕົກເປັນເປົ້າໝາຍເບີ 1 ຂອງ ບາເຢີນ ມິວນິກ ທີ່ຢາກໄດ້ຕົວມາຄ້າແຂ້ງ ແຕ່ຫຼ້າສຸດ ສື່ເຢຍລະມັນ ຫຼາຍແຫ່ງລາຍງານຕົງກັນວ່າ ເປ໊ບ ກວາດິໂອລາ ກຸນຊືອ ເຮືອໃບສີຟ້າ ແມນເຊສເຕີ ຊິຕີ້ ທີ່ຕ້ອງການໄດ້ຕົວມາແທນທີ່ ດາວເຕະທີມຊາດເບລຢຽມ ເນື່ອງຈາກເລັງເຫັນເຖິງສັກກະຍາພາບທັງ ພອນສະຫວັນ, ຄວາມຄິດສ້າງສັນ ແລະ ທັດສະນະຄະຕິ ທີ່ຄ້າຍຄືກັນກັບ ເດິ ບຣອຍນ໌ ເມື່ອຄັ້ງຄວ້າຕົວມາຈາກໂວຟສ໌ບວກ ໃນປີ 2015

ເວີດຊ໌ ສະແດງຟອມກັບ ເລເວີຄູເຊັນ ພາຍໃຕ້ການຄຸມທີມຂອງ ຊາບີ ອະລອນໂຊ່ ດ້ວຍການຄວ້າແຊມບຸນເດສລີກາ ລະດູການກ່ອນ ເຮັດໃຫ້ ລາວໄດ້ຮັບຄວາມສົນໃຈຈາກ ລິເວີພູລ, ອາຊີນອລ, ເປແອສເຊ ລວມທັງ ເຣອັລ ມາດຣິດ ໂດຍປັດຈຸບັນ ເຈົ້າຕົວເຫຼືອສັນຍາກັບ ຫ້າງຂາຍຢາ ເຖິງປີ 2027 ແລະ ຄາດວ່າ ທີມທີ່ຕ້ອງການໄດ້ຕົວລາວໄປຮ່ວມທີມ ອາດຕ້ອງໃຊ້ງົບປະມານເຖິງ 135 ລ້ານຢູໂຣ ເທົ່າໆກັບ ສະຖິຕິເກົ່າຂອງ ຟຸດບອນເຢຍລະມັນ ທີ່ ອຸສມານ ເດມເບເລ ຍ້າຍຈາກ ດອດມຸນ ໄປ ບາເຊໂລນາ ໃນປີ 2017

ສະແດງຄຳຄິດເຫັນ