ຈົບສິ້ນການຜະຈົນໄພໃນລີກຊາອຸຯ! ອັລ-ອາຫ໌ລີ ຍືນຍັນແຍກທາງກັບ ໂຣແບັດໂຕ ເຟີມີໂນ ຫຼັງຈົບລະດູການນີ້ ເຖິງແມ່ນວ່າລາວຫາກໍ່ມີສ່ວນສຳຄັນໃນການຄວ້າແຊມລະດັບທະວີບກໍຕາມ

ວັນທີ 14 ພຶດສະພາ 68 ລາຍງານຈາກ ysscores ເປີດເຜີຍວ່າ ອັລ ອາຫ໌ລີ ສະໂມສອນຊື່ດັງແຫ່ງລີກຊາອຸດີອາຣະເບຍ ໄດ້ບັນລຸຂໍ້ຕົກລົງກັບ ໂຣແບັດໂຕ ເຟີມີໂນ ກອງໜ້າຊາວບຣາຊິລຽນອາຍຸ 33 ປີ ໃນການຍຸດຕິສັນຍາຂອງລາວຫຼັງສິ້ນສຸດລະດູການປັດຈຸບັນນີ້ເປັນທີ່ຮຽບຮ້ອຍແລ້ວ

ການຕັດສິນໃຈຄັ້ງນີ້ເກີດຂຶ້ນພຽງບໍ່ດົນ ຫຼັງຈາກທີ່ ເຟີມີໂນ ຫາກໍ່ມີສ່ວນສຳຄັນໃນການນຳທັບ “ອັລ ອາຫ໌ລີ” ສ້າງປະຫວັດສາດ ຄວ້າແຊມ ACL Elite ຊຶ່ງເປັນແຊມລະດັບທະວີບຄັ້ງທຳອິດຂອງສະໂມສອນໄດ້ສຳເລັດ ເຖິງຢ່າງໃດກໍຕາມ ກ່ອນໜ້ານີ້ລາວຖືກຕັດຊື່ອອກຈາກທີມຊຸດລຸຍສຶກຊາອຸດິ ໂປຣລີກ ເຫຼືອພຽງແຕ່ລາຍການບອນຖ້ວຍເອເຊຍໃຫ້ລົງຫຼິ້ນເທົ່ານັ້ນ

ຄາລິດ ອັລ ກັມດີ ປະທານສະໂມສອນ ອັລ ອາຫ໌ລີ ໄດ້ອອກມາຢືນຢັນເຖິງເລື່ອງນີ້ດ້ວຍຕົວເອງ ໂດຍລະບຸວ່າ:

“ສະໂມສອນໄດ້ບັນລຸຂໍ້ຕົກລົງຂັ້ນສຸດທ້າຍກັບ ໂຣແບັດໂຕ ເຟີມີໂນ ກອງໜ້າຊາວບຣາຊິນແລ້ວ ໂດຍຈະຍຸດຕິສັນຍາຂອງລາວກັບທີມຫຼັງສິ້ນສຸດລະດູການປັດຈຸບັນນີ້ ຫຼັງຈາກບັນລຸຂໍ້ຕົກລົງໃນການຈ່າຍຄ່າຊົດເຊີຍໃນທີ່ສຸດ”

ອັລ ກັມດີ ຍັງກ່າວເສີມອີກວ່າ ທັງສອງຝ່າຍສາມາດຕົກລົງເລື່ອງຄ່າຊົດເຊີຍທາງການເງິນກັນໄດ້ດ້ວຍດີ ເຮັດໃຫ້ ເຟີມີໂນ ຈະສາມາດຍ້າຍອອກຈາກທີມໄປໄດ້ໂດຍບໍ່ມີບັນຫາໃດໆ ຊຶ່ງຖືເປັນການປິດສາກການຄ້າແຂ້ງຂອງລາວກັບສະໂມສອນແຫ່ງນີ້ຢ່າງເປັນທາງການ

ສຳລັບ ເຟີມີໂນ ຍ້າຍຈາກ ລິເວີພູນ ມາຮ່ວມທັບ ອັລ-ອາຫ໌ລີ ເມື່ອຊ່ວງລະດູຮ້ອນປີ 2023 ດ້ວຍຄວາມຄາດຫວັງທີ່ສູງ ແຕ່ຜົນງານໂດຍລວມຂອງລາວກັບບໍ່ເປັນໄປຕາມທີ່ສະໂມສອນຕ້ອງການ ເຮັດໃຫ້ຝ່າຍບໍລິຫານຕັດສິນໃຈຍຸດຕິສັນຍາກັນດ້ວຍຄວາມເຂົ້າໃຈທັງສອງຝ່າຍ

ເຖິງແມ່ນວ່າຟອມການຫຼິ້ນສ່ວນຕົວອາດຈະບໍ່ໂດດເດັ່ນເທົ່າທີ່ຄາດຫວັງ ແຕ່ປະຕິເສດບໍ່ໄດ້ວ່າ ເຟີມີໂນ ກໍມີບົດບາດສຳຄັນໃນການຊ່ວຍໃຫ້ ອັລ-ອາຫ໌ລີ ປະສົບຄວາມສຳເລັດຄັ້ງປະຫວັດສາດ ດ້ວຍການຄວ້າແຊມ AFC Champions League ມາຄອງໄດ້ສຳເລັດ

ໃນຂະນະດຽວກັນ, ເບນ ຈາຄັອບ ນັກຂ່າວຊື່ດັງ ໄດ້ລາຍງານເພີ່ມເຕີມວ່າ ຟລາເມງໂກ ສະໂມສອນຍັກໃຫຍ່ໃນລີກບຣາຊິນ ຊຶ່ງເປັນທີມບ້ານເກີດຂອງ ເຟີມີໂນ ກຳລັງໃຫ້ຄວາມສົນໃຈໃນການດຶງຕົວລາວກັບໄປຄ້າແຂ້ງໃນບ້ານເກີດອີກຄັ້ງ ຊຶ່ງຄົງຕ້ອງຕິດຕາມກັນຕໍ່ໄປວ່າອະນາຄົດຂອງ “ບັອບບີ້” ຈະເປັນແນວໃດຫຼັງສິ້ນສຸດສັນຍາກັບ ອັລ-ອາຫ໌ລີ ໃນຊ່ວງລະດູຮ້ອນນີ້

ສະແດງຄຳຄິດເຫັນ