ເຣອານ ມາດຣິດ ເຈາະເອົາໄຊຊະນະມາຢອກກາ ຕໍ່ໂອກາດລຸ້ນແຊ້ມລາ ລີກາ ອອກໄປອີກ

ເຣອານ ມາດຣິດ ຍັງບໍ່ຍອມຖອດໃຈໃນເສັ້ນທາງລຸ້ນແຊ້ມລາ ລີກາ ລະດູການນີ້ ແມັດຫຼ້າສຸດຍິງປະຕູຊັຍຊ່ວງທົດເຈັບແຊງຊະນະມາຢອກກາ ເຮັດໃຫ້ຕໍ່ໂອກາດອອກໄປອີກ

ການແຂ່ງຂັນຟຸດບານລາ ລີກາ ສະເປນ ເມື່ອວັນທີ 14 ພຶດສະພາ “ຣາຊັນຊຸດຂາວ” ເຣອານ ມາດຣິດ ເປີດສະໜາມເອສຕາດິໂອ ຊານຕິອາໂກ ເບິນາເບວ ຮັບການມາຢ້ຽມຢາມຂອງ “ຊາວເກາະ” ມາຢອກກາ

ເກມນີ້ມາຢອກການຳກ່ອນຈາກ ມາຕິນ ວັນເຢັນທ໌ ນາທີ 11 ແຕ່ມາດຣິດຍິງແຊງຈາກ ຄີລິຢັນ ແອມບັບເປ ນາທີ 68, ຮາໂກໂບ ຣາມອນ ນາທີ 90+5 ເຮັດໃຫ້ “ຣາຊັນຊຸດຂາວ” ເຈາະຊະນະ 2-1 ຕໍ່ໂອກາດລຸ້ນແຊ້ມລະດູການນີ້ອອກໄປອີກ

ຜ່ານໄປ 36 ນັດ ມາດຣິດເກັບເພີ່ມເປັນ 78 ຄະແນນ ຍຶດຮອງຈ່າຝູງເຊັ່ນເດີມ ຕາມຫຼັງຈ່າຝູງບາເຊໂລນາ 4 ແຕ້ມ ແຕ່ມາດຣິດເຕະຫຼາຍກວ່າ 1 ນັດ ແລະ ມາດຣິດເຫຼືອເກມເຕະ 2 ແມັດ ໂອກາດລຸ້ນແຊ້ມຍັງຄົງເລືອນລາງຢ່າງຍິ່ງ ດ້ານມາຢອກກາມີ 47 ຄະແນນ ຢູ່ອັນດັບ 9

ຜົນຄູ່ອື່ນ ບີຢາເຣອານ ຊະນະ ເລກາເນສ 3-0, ເດປອຕິໂບ ອະລາເບສ ຊະນະ ບາເລນເຊຍ 1-0

ສະແດງຄຳຄິດເຫັນ