ອາລ-ນາຊເຊີ່ ມີບັນຫາ! ໂຣນັລໂດ ຕັ້ງເງື່ອນໄຂ 3 ຂໍ້ເພື່ອຕໍ່ສັນຍາ

ຄຣິສເຕຍໂນ ໂຣນັລໂດ ໄດ້ຕັ້ງເງື່ອນໄຂ 3 ຂໍ້ໃຫ້ທີມອາລ-ນາຊເຊີ່ ຖ້າຕ້ອງການໃຫ້ລາວຕໍ່ສັນຍາ: ປົດຜູ້ອຳນວຍການກິລາ, ປົດໂຄ້ດພິໂອລີ ແລະ ຍ້າຍນັກເຕະດັງຫຼາຍຄົນອອກ – ເນັ້ນວ່າຖ້າບໍ່ມີການປ່ຽນແປງ ທີມຈະບໍ່ໄດ້ແຊມລາຍການໃຫຍ່.

ຄຣິສເຕຍໂນ ໂຣນັລໂດ ກັບຕັນທີມອາລ-ນາຊເຊີ່ ແຈ້ງກັບທາງສະໂມສອນວ່າລາວຈະຍອມຕໍ່ສັນຍາຖ້າສະໂມສອນດຳເນີນການຕາມເງື່ອນໄຂ 3 ຂໍ້ທີ່ລາວຕ້ອງການ, ຕາມລາຍງານຈາກ “ໂອຄາຊ ສປອດ” ສື່ກິລາໃນປະເທດຊາອຸດີ ອາຣາເບຍ.

ໂຣນັລໂດ ເຊັນສັນຍາມາຫຼິ້ນໃຫ້ອາລ-ນາຊເຊີ່ ໃນປີ 2023 ເຮັດໃຫ້ຫຼາຍຄົນຄາດຫວັງວ່າລາວຈະພາທີມໄດ້ແຊມຫຼາຍລາຍການ ແຕ່ຈົນຮອດປັດຈຸບັນ ລາວໄດ້ແຊມກັບທີມພຽງລາຍການດຽວຄື ອາຣັບ ຄລັບ ແຊມປຽນສ໌ ຄັບ ຫຼື ລາຍການແຂ່ງຂັນສະເພາະສະໂມສອນໃນເຂດອາຣັບ ປະຈຳປີ 2023 ເທົ່ານັ້ນ.

ປັດຈຸບັນ ໂຣນັລໂດ ເຫຼືອສັນຍາກັບອາລ-ນາຊເຊີ່ ພຽງແຕ່ຮອດວັນທີ 30 ມິຖຸນານີ້ເທົ່ານັ້ນ ແລະ ຍັງບໍ່ມີສັນຍານໃດໆທີ່ຈະມີການຕໍ່ສັນຍາ. ໂດຍກ່ອນໜ້ານີ້ມີລາຍງານວ່າການເຈລະຈາຖືກລະງັບໄວ້ຊົ່ວຄາວ.

ຫຼ້າສຸດ “ໂອຄາຊ ສປອດ” ລາຍງານວ່າ ໂຣນັລໂດ ຕັ້ງເງື່ອນໄຂ 3 ຂໍ້ເພື່ອຕໍ່ສັນຍາ:

1. ປົດ ເຟຣນານໂດ ເອຍໂຣ ອະດີດກອງຫຼັງຊື່ດັງຈາກຕຳແໜ່ງຜູ້ອຳນວຍການກິລາຂອງສະໂມສອນ ແລະ ເອົາຄົນໃໝ່ທີ່ມີອຳນາດໃນການເສີມທີມຢ່າງເຕັມທີ່
2. ປົດ ສເຕຟາໂນ ພິໂອລີ ຈາກຕຳແໜ່ງຜູ້ຝຶກສອນຂອງທີມ ທ່າມກາງຂ່າວລືວ່າ ໂຣນັລໂດ ບໍ່ເຫັນດີກັບເທັກນິກຂອງພິໂອລີເທົ່າໃດ
3. ການຈັດການດ້ານນັກເຕະ ໂດຍລາວຕ້ອງການໃຫ້ທີມຍ້າຍນັກເຕະຫຼາຍຄົນອອກ ເຊັ່ນ: ອາຍເມິຣິກ ລາປອກຕ໌ ກອງຫຼັງຊື່ດັງ, ເບນໂຕ ຜູ້ຮັກສາປະຕູຊາວບຣາຊິລ, ອັງເຈໂລ ກາເບຣຍລ ກອງກາງຊາວບຣາຊິລ ແລະ ເວສລີ່ຍ໌ ນັກເຕະຊາວບຣາຊິລອີກຄົນໜຶ່ງ. ພ້ອມກັນນັ້ນຕ້ອງການໃຫ້ ຊາດິໂອ ມາເນ່ ແລະ ຈອນ ດູຣານ ຢູ່ຮ່ວມທີມກັບລາວຕໍ່ໄປ

ໂຣນັລໂດ ເຫັນວ່າຈະຕ້ອງມີການປັບປ່ຽນທັງເລື່ອງໃນສະໜາມ ແລະ ນອກສະໜາມ ຖ້າທີມຕ້ອງການຈະໄດ້ແຊມລາຍການໃຫຍ່ໆ.

ສະແດງຄຳຄິດເຫັນ